33 އަހަރުގެ ޕޮޕް ލަވަކިޔުންތެރިޔާ ރިހާނާއަކީ މިހާރު ބިލިއަނަރެއްކަމަށް ފޯބްސް މަޖައްލާއިން ބުނެފިއެވެ. މިއާއި އެކު ރިހާނާ ވެގެންގޮސްފައިވަނީ އެންމެ މުއްސަނދި އަންހެން މިޔުޒީޝަނަށެވެ.
ރިހާނާގެ މިލްކިއްޔާތުގައި މިހާރު 1.7 ބިލިއަން އެމެރިކާ ޑޮލަރު އެބަހުއްޓެވެ. މީގެއިތުރުން އޭނާގެ ކޮސްމެޓިކް ކުންފުނި ފެންޓީ ބިއުޓީން 1.4 ބިލިއަން އެމެރިކާ ޑޮލަރު ލިބޭނެކަމަށް ވަނީ ލަފާކޮށްފައެވެ. މީގެއިތުރުން އޭނާގެ ލިންގެރީ ކުންފުނި، ސެވޭޖް އެކްސް ފެންޓީން 270 މިލިއަން އެމެރިކާ ޑޮލަރު ލިބޭނެކަމަށްވެސް ވަނީ ލަފާކޮށްފައެވެ.
މި ނަމްބަރުތަކާއި އެކު ރިހާނާ މިވަނީ މުނިފޫހިފިލުވުމުގެ ދާއިރާގައި ދެވަނަ އަށް އެންމެ މުއްސަނދި އަންހެން ފަންނާނުގެ މަޤާމު ހޯދާފައެވެ. އެއްވަނައިގައި އުޅެނީ އޮޕެރާ ވިންފްރީއެވެ.
ރޮބީން ފެންޓީ ނުވަތަ ރިހާނާ އޭނާގެ ފެންޓީ ބިއުޓީ ލައިން ކުންފުނި ލޯންޗުކޮށްފައިވަނީ 2017 ވަނަ އަހަރު އަގުބޮޑު ތަކެތި ވިއްކާ ކުންފުންޏެއްކަމަށްވާ އެލްވީއެމްއެޗް އާއެކުގައެވެ. މި ކުންފުނިން އޭނާވަނީ ތަފާތު 40 ވައްތަރުގެ ފައުންޑޭޝަން ޝޭޑްސް ނެރެފައެވެ. އަދި ފެންޓީ ބިއުޓީއަށް ފުރަތަމަ އަހަރު އާމްދަނީގެ ގޮތުގައި 550 މިލިއަން އެމެރިކާ ޑޮލަރު ވަނީ ލިބިފައިވެއެވެ.
ނަމަވެސް ރިހާނާގެ ހުރިހާ ވިޔަފާރިއަކުން މިވަރުގެ އާމްދަނީއެއް ނުލިބެއެވެ. ފެންޓީ ފެޝަން ލޭބަލްގައި ރިހާނާއި އެލްވީއެމްއެޗް ގުޅިގެން ހިންގި ވިޔަފާރި ދެ އަހަރުވެސް ނުވަނީސް ވަނީ ހުއްޓާލަން ޖެހިފައެވެ.