ޖަޕާންގެ ވެރިރަށް ޓޯކިޔޯގައި މިހާރު ކުރިއަށްދާ އޮލިމްޕިކް ކުޅިވަރު މުބާރާތުގެ އަންހެން ފުޓްބޯޅަ ބައިން އެމެރިކާ ތިންވަނަ މަގާމް ހޯދައިފިއެވެ.
މިބައިން އެމެރިކާ ތިންވަނަ ހޯދީ އޮސްޓްރޭލިއާއާ ބައްދަލުކުރި މެޗް 4 ލަނޑު 3 ލަނޑުން ކާމިޔާބުކޮށްގެންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި އޮސްޓްރޭލިއާއިން ގިނައިރު ބޯޅަ ގެންގުޅުނު ނަމަވެސް ގިނަ ހަމަލާތައް އުފައްދާފައި ވަނީ އެމެރިކާއިންނެވެ. މިމެޗްގެ ފުރަތަމަ ލަނޑު މެޗްގެ 8 ވަނަ މިނެޓްގައި ޖަހާ ލީޑު ނެގީ އެމެރިކާއިންނެވެ.
މިލަނޑު އެޓީމަށް ޖަހާދިނީ މޭގަން ރެޕިނޮއިއެވެ. މިމެޗްގައި އޮސްޓްރޭލިއާއިން ޖެހި ފުރަތަމަ ލަނޑު މެޗްގެ 17 ވަނަ މިނެޓްގައި ޖަހާދިނީ ސޭމް ކާރއެވެ. ނަމަވެސް މިލަނޑު ޖެހިތާ ހަތަރު މިނެޓް ފަހުން އެމެރިކާއިން ވަނީ ދެވަނަ ފަހަރަށް ލީޑު ނަގާފައެވެ. މިލަނޑުވެސް ޖަހާދިނީ ރެޕިނޮއިއެވެ. އަދި ފުރަތަމަ ހާފްގެ އިތުރު ވަގުތުގައި އެމެރިކާގެ ލީޑު ފުޅާކޮށްދިނީ ކާލީ ލޮއިޑް ޖަހާދިން ލަނޑުންނެވެ. އަދި މެޗްގެ 51 ވަނަ މިނެޓްގައި ލޮއިޑް މިމެޗްގައި ޖެހި ދެވަނަ ލަނޑާއެކު އެމެރިކާއިން ތިން ލަނޑުގެ ލީޑެއް ނެގިއެވެ.
މިމެޗްގައި އޮސްޓްރޭލިއާގެ ދެވަނަ ލަނޑު މެޗްގެ 54 ވަނަ މިނެޓްގައި ޖަހާދިނީ ކައިޓްލިން ފޯޑްއެވެ. އަދި އެޓީމްގެ ތިންވަނަ ލަނޑު މެޗްގެ ފަހު މިނެޓްގައި ޖަހާދިނީ އެމިލީ ގިއެލްނިކްއެވެ. މިލަނޑާއެކު މެޗްގެ ފަހު ވަގުތު ކޮޅު އެމެރިކާ ހާސްކަމުގެ ތެރެއަށް ވެއްޓުނު ނަމަވެސް އޮސްޓްރޭލިއާއަށް އިތުރު ލަނޑެއް ކާމިޔާބު ކުރެވޭގޮތެއް ނުވިއެވެ.
މިކާމިޔާބީއާއެކު އަންހެން ފުޓްބޯޅަ އިވެންޓްގެ ތިންވަނަ މަގާމް އެމެރިކާއަށް ލިބިގެންދިޔައިރު މިއީ އޮސްޓްރޭލިއާގެ އަންހެން ޓީމަށް އޮލިމްޕިކްސް ކުޅިވަރު މުބާރާތުގައި މިހާތަނަށް ހޯދުނު އެންމެ ރަނގަޅު ކާމިޔާބީއެވެ.