ޖަޕާނުގެ ވެރިރަށް ޓޯކިޔޯގައި މިހާރު ކުރިއަށްދާ އޮލިމްޕިކް ކުޅިވަރު މުބާރާތުގެ ފިރިހެން ބާސްކެޓް އިވެންޓްގެ ފައިނަލުން އެންމެފަހުގެ ޗެމްޕިއަން އެމެރިކާ ޖާގަހޯދައިފިއެވެ.
އެމެރިކާއިން ފައިނަލުން ޖާގަހޯދީ ސެމިފައިނަލްގައި އޮސްޓްރޭލިއާ އާއި ބައްދަލުކުރިމެޗް 97 ޕޮއިންޓް 78 ޕޮއިންޓުން ކާމިޔާބުކޮށްގެންނެވެ.
އެމެރިކާއިން ވަނީ އެންެ ފަހުން ބޭއްވި އޮލިމްޕިކްސް ތިން މުބާރާތުގައިވެސް ބާސްކެޓްގެ ފިރިހެން އިވެންޓުން ރަން މެޑަލް ހާސިލް ކޮށްފައެވެ. މިމެޗްގެ ދެވަނަ ކްއާޓަރ ގައި އޮސްޓްރޭލިއާއިން ވަނީ 15 ޕޮއިންޓްގެ ލީޑެއް ނަގާ އެމެރިކާ ހާސްކޮށްލާފައެވެ. ނަމަވެސް އެމެރިކާއިން ވަނީ އެކަމުން އަރައި ގަނެ 34 ޕޮއިންޓް ގާތް ގާތުގާ ހޯދާ މެޗްގެ ލީޑު ނަގާފައެވެ. މިމެޗްގައި އެމެރިކާއަށް އެންމެ ރަނގަޅު ކުޅުމެއް ދައްކާފައިވަނީ ކެވިން ޑުރާންޓް އާއި ޑެވިން ބޫކަރއާއެވެ. މިގޮތުން ޑުރާންޓް 23 ޕޮއިންޓް ހޯޑާދިން އިރު ބޫކަރވަނީ 20 ޕޮއިންޓް ހޯދާދީފައެވެ.
މިކާމިޔާބީއާއެކު އެމެރިކާ މިމުބާރާތުގެ ފައިނަލުން ޖާގަހޯދާފައިވާއިރު ފައިނަލްގައި އެމެރިކާ ބައްދަލުކުރާނީ ފަރަންސޭސިވިލާތާއެވެ. ފަރަންސޭސި ޓީމް ފައިނަލުން ޖާގަހޯދީ ސެމީފައިނަލްގައި ސްލޮވީނިއާ އާއި ބައްދަލުކޮށް 90 ޕޮއިންޓް 89 ޕޮއިންޓްގެ ކުޑަ ތަފާތަކުން މެޗް ކާމިޔާބުކޮށްގެންނެވެ.