"އިންޑިއަން އައިޑޮލް" ސީޒަން 12 ގެ ފިނާލޭގައި ލެޖެންޑްރީ ލަވަކިޔުންތެރިޔާ އުދިތް ނާރަޔަން އަދި ދަރިފުޅު އަދިތްޔާ ނާރަޔަން ލައިވްކޮށް އެކުގައި ލަވަކިޔާނެއެވެ. މި ޝޯ އޮންނާނީ އިންޑިއާގެ މިނިވަން ދުވަސްކަމަށްވާ އޯގަސްޓް 15 ގައެވެ.
ޝޯގައި އަދިތްޔާ ކިޔާނީ ބައްޕަގެ ހިޓް ލަވަތައް ކަމަށްވާ "ޑޯލީ ސަޖާކޭ ރަކްނާ" ، "ޕާޕާ ކެހެތޭ ހޭ" ، ''ޖާދޫ ތޭރީ ނަޒަރް" އަދި "ޕެހެލާ ނަޝާ" ފަދަ ލަވަތެކެވެ. އަދި އުދިތް ކިޔަން ހަމަޖެހިފައިވަނީ އަދިތްޔާގެ ބައެއް ހިޓް ލަވަތައް ކަމަށްވާ "ތަދަތް ތަދަތް" އަދި "އިޝްގިޔާ ދިޝްގިޔާން" ފަދަ ލަވަތަކެވެ.
.
މިހާރު ކުރިއަށްދާ "އިންޑިއަން އައިޑޮލް" ސީޒަން 12 ނިންމާލަން އުޅޭއިރު މި ޝޯއަށްވަނީ ވަރަށް ބޮޑެތި ފާޑުކިޔުންތަކެއްވެސް އަމާޒުވެފައެވެ. ޝޯގައި ބައިވެރިވާ މެހްމާނުންނާއި ޖަޖުން ލައްވާ ޝޯގެ ބައިވެރިންނަށް ޙައްޤު ނޫން ތަޢުރީފް ކުރަން މަޖްބޫރު ކުރުވާކަމަށް ބުނެ ގިނަ ފަރާތްތަކަކުން ވަނީ ޝޯއަށް ފާޑުކިޔާފައެވެ. މީގެތެރޭގައި ޝޯގެ ކުރީގެ ޖަޖުން އަދި ބައިވެރިންވެސް ހިމެނެއެވެ.
2004 ވަނަ އަހަރުން ފެށިގެން ސޮނީ ޓީވީ ދައްކަމުންދާ އިންޑިއަން އައިޑޮލް ޝޯ އަށް އާންމުންގެ ވަރަށް ބޮޑު ތަރުޙީބެއް އަންނަނީ ލިބެމުންނެވެ.