ޖަޕާންގެ ވެރިރަށް ޓޯކިޔޯގައި މިހާރު ކުރިއަށްދާ އޮލިމްޕިކް ކުޅިވަރު މުބާރާތުގެ އަންހެނުންގެ ފުޓްބޯޅަ އިވެންޓްގެ ސެމީފައިނަލުން އެންމެފަހުގެ ޗެމްޕިއަން އެމެރިކާ ޖާގަހޯދައިފިއެވެ. އެމެރިކާ މިމުބާރާތުގެ ސެމިފައިނަލުން ޖާގަހޯދީ ކްއާޓަރ ފައިނަލްގައި ނެދަލަންޑްސް އާއި ބައްދަލުކޮށް ފުރިހަމަ ވަގުތާއި އިތުރު ވަގުތުގައި 2 ލަނޑު 2 ލަނޑުން ދެޓީމް އެއްވަރު ވުމުން ޕެނަލްޓީ ޖަހައިގެން 4 ލަނޑު 2 ލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގެ ފުރަތަމަ ލަނޑު މެޗްގެ 16 ވަނަ މިނެޓްޣައި ޖަހާދިނީ ނެދަލަންޑްސްގެ ވިވިއަން މިއެޑެމާއެވެ. މިމެޗްގައި އެމެރިކާއިން އެޓީމްގެ ފުރަތަމަ ލަނޑު ޖަހާ މެޗްގެ ނަތީޖާ ހަމަހަމަކުރީ މެޗްގެ 28 ވަނަ މިނެޓްގައި ސޭމް މެވިސް ޖަހާދިން ލަނޑުންނެވެ. އަދި އޭގެ ތިން މިނެޓްފަހުން ލީން ވިލިއަމް އަޖާދިން ލަނޑާއެކު އެމެރިކާއިން މިމެޗްގައި ފުރަތަމަ ފަހަރަށް ލީޑު ނެގިއެވެ. ނަމަވެސް މެޗްގެ 54 ވަނަ މިނެޓްގައި މިއެޑެމާ މިމެޗްގައި ޖެހި ދެވަނަ ލަނޑާއެކު މެޗްގެ ނަތީޖާ ނެދަލަންޑްސްއިން ހަމަހަމަ ކުރިއެވެ. މިއީ މިފަހަރުގެ މުބާރާތުގައި އޭނާ ކާމިޔާބުކުރި 10 ވަނަ ލަނޑެވެ. އަދި މިމެޗްގެ 81 ވަނަ މިނެޓްގައި ނެދަލަންޑްސްއަށް ޕެނަލްޓީއެއްވެސް ލިބިގެންދިޔައެވެ. ނަމަވެސް ލިއެކޭ މާޓޭންސް ފޮނުވާލި މި ޕެނަލްޓީ ވަނީ އެމެރިކާގެ ކީޕަރ އެލީސާ ނެއިހަރ ދިފާއުކޮށްފައެވެ.
އިތުރު ވަގުތުގައި ދެޓީމަށްވެސް ލަނޑު ޖަހާނެ ރަނގަޅު ފުރުސަތު ލިބިގެން ދިޔަ ނަމަވެސް އެއިން އެއްވެސް ހަމަލާއެއް ދެޓީމުން ކުރެ އެއްވެސް ޓީމަކަށް ކާމިޔާބު ކުރެވޭގޮތެއް ނުވިއެވެ. އިތުރު ވަގުތުގައި އެމެރިކާއިން ޖެހި ދެ ލަނޑެއް އޮފްސައިޑްގެ ސަބަބުން ގަބޫލް ކޮށްފައި ނުވާއިރު ނެދަލަންޑްސްއިންވެސް އޮފްސައިދް އެއްލަނޑު ޖަހާފައިވިއެވެ. ޕެނަލްޓީ ޝޫޓްއައުޓްގައި އެމެރިކާގެ ތަރިއަކަށް ވެގެންދިޔައީ ކީޕަރ އެލީސާ ނެއިހަރއެވެ. އޭނާވަނީ ނެދަލަންޑްސްގެ ދެ ޕެނަލްޓީ މަތަކޮށްފައެވެ. ސެމީފައިނަލްގައި އެމެރިކާ ބައްދަލުކުރާނީ ކެނެޑާ އާއެވެ. މިމުބާރާތުގެ ސެމީފައިނަލުން ކެނެޑާ ޖާގަހޯދީ ކްއާޓަރ ފައިނަލްގައި ބްރެޒިލް އާއި ބައްދަލު ކުރި މެޗް ޕެނަލްޓީ ޖަހައިގެން 4 ލަނޑު 3 ލަނޑުން ކާމިޔާބުކޮށްގެންނެވެ.