ސްޕެނިޝް ލަލީގާގައި ސެވިއްޔާއަށް ކުޅެމުންދާ ބްރަޔަން ގިލް އިންގްލިޝް ޕްރިމިއަރ ލީގުގެ ޓޮޓްނަމް ހޮޓްސްޕަރއަށް ސޮއިކޮށްފިއެވެ. މަޢުލޫމާތު ލިބިފައިވާގޮތުގައި ގިލް ސްޕަރސްއަށް ސޮއި ކޮށްފައިވަނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ.
އުމުރުން 20 އަހަރުގެ ގިލްވަނީ ސެވިއްޔާއަށް 14 މެޗު ކުޅެދީފައެވެ. ނަމަވެސް އެއީ މުޅިންވެސް ބަދަލުކުޅުންތެރިއެއްގެ ގޮތުގައެވެ. ގިލްވަނީ ސްޕެއިން ޤައުމީ ޓީމަށް މިއަހަރުގެ މާރޗްމަހު ފުރަތަމަ ފަހަރަށް ކުޅެފައެވެ. އަދި މިހާރު ކުރިއަށްދާ އޮލިމްޕިކްސްގައި ވާދަކުރަމުންދާ ސްޕެއިން ޓީމުގައި ގިލް ހިމެނެއެވެ.
ގިލް ސްޕަރސްއަށް ގެންދިއުމުގެ އެއްބަސްވުމުގެ ދަށުން ސްޕަރސްއަށް ކުޅެމުންދިޔަ އާޖެންޓީނާގެ ބައިނަލްއަޤްވާމީ ކުޅުންތެރިޔާ އެރިކް ލަމޭލާވަނީ ސެވިއްޔާއަށް ބަދަލުވެފައެވެ. އަދި ސެވިއްޔާއިންވަނީ ލަމޭލާ އެ ޓީމާއި ގުޅުނުކަންވެސް ހާމަކޮށްފައެވެ. ލަމޭލާ ސްޕަރސްއާއި ގުޅިފައިވަނީ 2013ވަނަ އަހަރު އޭ.އެސް. ރޯމާއިން 25.7 މިލިއަން ޕައުންޑަށެވެ.
ލަމޭލާއަކީ އޭރުގެ ދުނިޔޭގެ ރިކޯޑް އަގެއް ކަމަށްވާ 85 މިލިއަން ޕައުންޑަށް ގެރެތު ބޭލް ރިއާލް މެޑުރިޑަށް ވިއްކާލުމަށްފަހު ސްޕަރސްއިން އެޓީމަށް އޭރު ގެނައި 7 ކުޅުންތެރިންގެ ތެރެއިން އެއް ކުޅުންތެރިޔާއަށެވެ. އަދި އޭނާވެފައިވަނީ އެ ކުޅުންތެރިންގެ ތެރެއިން ސްޕަރސް ދޫކޮށްދާ ފަހު ކުޅުންތެރިޔާއަށެވެ. ލަމޭލާވަނީ ސްޕަރސްއަށް 255 މެޗު ކުޅެދީ 37 ލަނޑު ޖަހާދީފައެވެ.