މެއި ހައެއްގެ ހަމަލާގެ ތަހުގީގަކީ މިހާތަނަށް ފުލުހުން ހިންގާފައިވާ އެންމެ ބޮޑު އަދި އެންމެ ކާމިޔާބު ތަހުގީގުކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
މޯލްޑިވްސް ޕޮލިސް ސަރވިސް އާއި ޕްރޮސެކިއުޓަރ ޖެނެރަލްގެ އޮފީހާއި ގުޅިގެން ރޭ ބޭއްވި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ޓެރެރިސްޓް ހަމަލާއާ ގުޅިގެން ފުލުހުން ކުރިއަށްގެންދާ ޚާއްސަ ތަހުގީގުގެ އެންމެ ފަހުގެ މައުލޫމާތު ވަނީ ހިއްސާކޮށްފައެވެ. އެގޮތުން މީގެކުރިން ނޭނގޭ ކިތަންމެ މައުލޫމާތެއްވެސް ފުލުހުން ވަނީ ހާމަކޮށްފައެވެ.
ހޯމް މިނިސްޓަރު އިމްރާން އަބްދުﷲ ކުރެއްވި ޓްވީޓެއްގައި ވިދާޅުވީ މެއި ހައެއްގެ ޓެރެރިސްޓް ހަމަލާގެ ތަހުގީގަކީ މިހާތަނަށް ފުލުހުން ހިންގާފައިވާ އެންމެ ބޮޑު އަދި އެންމެ ބުރަ، ކާމިޔާބު އެއް ތަހުގީގު ކަމަށެވެ. އަދި ގިނަ ގޮންޖެހުންތަކަކާއިއެކު ފުލުހުންގެ ހުރިހާ ބަހާތަކެއްގެ ގިނަ ފުލުހުންތަކެއްގެ ބައިވެރިވުމާއިއެކު އެ ތަހުގީގު ކާމިޔާބު ކުރުމަށް ކުރެވުނު މަސައްކަތްތައް ބަލައިގަންނަކަމަށް ހޯމް މިނިސްޓަރ އިމްރާން އަބްދުﷲ ވިދާޅުވިއެވެ.
May6ge hamalaage thahuqeeq akee mihaathanah fuluhun hingaafaivaa emme bodu, emme bura adhi emme kaamiyaabu eh thahuqeeq. Gina gonjehun thakaa eku fuluhun ge hurihaa bahaathakehge ethah satheyka fuluhunge baiverivumaaeku thahuqeeq kaamiyaabu kurumah kurevunu masahkayi balaigannan.
— Imran Abdulla (@ShimranAb) July 24, 2021
6 މޭގެ ހަމަލާއާ ގުޅިގެން ފުލުހުން ހިންގަމުންދާ ތަހުޤީޤަށް މަޖިލީހުގެ ސަލާމަތީ ޚިދުމަތްތަކާއިބެހޭ ކޮމިޓީގެ މުޤައްރިރު، ހިތަދޫ މެދު ދާއިރާގެ މެމްބަރު މުހައްމަދު އަސްލަމްވެސް ވަނީ ތަޢުރީފްކުރައްވާފައެވެ. އެގޮތުން ފުލުހުންގެ ތަހުޤީޤަށް ތައުރީފްކުރައްވަމުން އަސްލަމް ވިދާޅުވީ ފުލުހުންގެ ތަހުޤީޤް ނިމޭއިރު، ހަމަލާގެ އެންމެ ފުނަށް ވާސިލު ވެވޭނެ ކަމަށް އުއްމީދު ކުރައްވާކަމަށެވެ.
6 މެއި ގައި @MohamedNasheed އަވާހާރަ ކޮއްލުމަށް ދިން ބޮމުގެ ހަމަލާ ގެ ތަޚްޤީގު ގައި @PoliceMv އިން ހޯއްދަވަމުން ގެންދަވާ ކުރިއެރިއެރުން ތަކަށް ތައުރީފުކުރަން. މި ތަޚްޤީގު ނިމޭއިރު މި ހަމަލާގެ އެންމެ ފުނަށް ވާސިލު ވެވޭނެ ކަމަށް އުއްމީދު ކުރަން!
— Mohamed Aslam (@aslamdp) July 24, 2021
ފުލުހުންގެ މަސައްކަތަށް ގިނަ ބަޔަކު ތައުރީފްކުރަމުންދާއިރު، ބައެއް ފަރާތްތަކުން ބުނާގޮތުން ފުލުހުންގެ ތަހުޤީޤުން ހާމަވެެގެންދަނީ ސަރުކާރުން އަދި ރައީސް އިބްރާހިމް މުހައްމަދު ސާލިހު މިމައްސަލަ ވަރަށް ސީރިއަސް މައްސަލައެއްގެ ގޮތުގައި ނެންގެވިކަންކަމަށެވެ. އަދި އަނިޔާވެރި ހަރުކަށި ފިކުރު ނައްތާލަންޖެހޭކަމަށާއި އެކަން ކުރަންވާނީ ސިޔާސީ ޕާޓީތަކާއި ދީނީ އިލްމުވެރިންނާއި ރައްޔިތުންގެ ބައިވެރިވުމާއެކުކަމަށް ބައެއް ފަރާތްތަކުން ބުންޏެވެ.
ފުލުހުންގެ ވަރަށް ބުރަ އަދި ފުރިހަމަ ތަހުގީގެއް. ޔަގީންވި އެއްކަމަކީ ސަރުކާރުން އަދި ރައީސް @ibusolih މިމައްސަލަ ވަރަށް ސީރިއަސްކޮށް ނެންގެވިކަން.
— Ahmed Mahloof (@AhmedMahloof) July 25, 2021
އަނިޔާވެރި ހަރުކަށިފިކުރު ނައްތާލަންޖެހޭ،އެކަން ކުރަންވާނީ ސިޔާސީ ޕާޓީ ތަކާއި ދީނީ އިލްމުވެރިންނާއި ރައްޔިތުންގެ ބައިވެރިވުމާއެކު.
6 މޭގެ ހަމަލާއާ ގުޅިގެން ފުލުހުން ކުރި މަސައްކަތުގެ ތެރޭގައި 5600 ގަޑިއިރުގެ ސީސީޓީވީ ފްޓޭޖު ހޯދައި، ދިރާސާކުރުން ހިމެނެއެވެ. އޭގެތެރެއިގާ އަމިއްލަ މީސްމީހުންގެ 109 ތަނެއްގެ ސީސީޓީވީ ފްޓޭޖްގެ އިތުރުން މާލެ އާއި ހުޅުމާލެ ހިމެނޭހެން 190 ސަރަހައްދެއްގައި ހަރުކޮށްފައިވާ 372 ޕޮލިސް ސީސީޓީވީ ފްޓޭޖްވެސް ފުލުހުންގެ ތަހުގީގަށް ހޯދިފައިވާކަން ފުލުހުން ފާހަގަކުރައްވައެވެ. އަދި މި މައްސަލައިގައި މިހާތަނަށް 640 ވުރެ ގިނަ މީހުންނާއި ބައްދަލުކޮށް މައުލޫމާތު ހޯދާ 228 މީހަކާއި ސުވާލުކޮށް ބަޔާން ނަގާފައިވާކަމަށް ފުލުހުން ބޭއްވި ނޫސްވެރިންގެ ބައްދަލުވުމުގައި ވިދާޅުވިއެވެ. އަދި 830 އަށްވުރެ ގިނަ މާއްދީ ހެކި ވަނީ ހޯދާފައެވެ. މި ހުރިހާ މަސައްކަތަކާއެކު ހަމަލާގެ އެންމެ އަޑިއަށް ދެވޭނެ ކަމުގެ ބޮޑު އުންމީދެއް ފުލުހުން ވަނީ ދެއްވާފައެވެ.