ޔޫރޯ 2020 ފުޓްބޯޅަ މުބާރާތުގެ އެންމެ މޮޅު ކުޅުންތެރިޔާގެ މަޤާުމު އިޓަލީވިލާތުގެ ކީޕަރު ޖިޔަންލުއިޖީ ޑޮނަރުންމާއަށް ލިބިއްޖެއެވެ.
އިނގިރޭސިވިލާތުގެ ވެރިރަށް ލަންޑަނުގެ ވެންބްލީ ސުޓޭޑިޔަމުގައި ކުޅުނު ފައިނަލް މެޗުގައި އިނގިރޭސިވިލާތުން ޖެހި 5 ޕެނަލްޓީގެ ތެރެއިން 2 ޕެނަލްޓީވަނީ ޑޮނަރުންމާ މަތަކޮށްފައެވެ. އަދި މުބާރާތުގައި އިޓަލީވިލާތުން ކުޅުނު 7 މެޗުގެ ތެރެއިން 3 މެޗުގައި އެ ޤައުމުގެ ކޮޅަށް ގޯލެއް ވަދެފައެއް ނުވެއެވެ.
ޑޮނަރުންމާއަކީ ޔޫރޯ މުބާރާތެއްގެ މޮޅު ކުޅުންތެރިޔާގެ މަޤާމު ހޯދި ދެވަނަ ކީޕަރެވެ. އެ މަޤާމު އެންމެ ފުރަތަމަ ހޯދާފައިވަނީ 1992 ވަނަ އަހަރުގެ މުބާރާތް ކާމިޔާބުކުރި ޑެންމާކުގެ ކީޕަރު ޕީޓަރ ޝުމައިކަލެވެ.
ޔޫރޯ 2020ގެ އެންމެ މޮޅު ޒުވާން ކުޅުންތެރިޔާގެ މަޤާމު ލިބުނީ ސުޕެއިންގެ ޕެޑްރީއަށެވެ. އަދި މުބާރާތުގައި އެންމެ ގިނަ ގޯލް ޖެހި ކުޅުންތެރިޔަކީ ޕޯޗުގަލްގެ ކެޕްޓަން ކްރިސްޓިޔާނޯ ރޮނާލްޑޯއެވެ.