ގަސްތުގައި ބަޔަކު މަރާލުމުގެ ތުޙްމަތުގައި ބަންގުލަދޭޝުގެ ކާބޯތަކެތި ބަންދުކުރާ ކާރުޚާނާއެއްގެ ވެރިމީހާ ޙައްޔަރުކޮށްފިއެވެ. އޭނާ ޙައްޔަރުކުރީ އެ ކާރުޚާނާގައި ޖުލައި މަހުގެ 8ވަނަ ދުވަހު ހިނގި އަލިފާނުގެ ހާދިޘާއެއްގައި 52 މީހުން މަރުވުމުންނެވެ.
ބަންގްލަދޭޝްގެ ވެރިރަށް ޑާކާގައި ހުންނަ ހަ ފަންގިފިލާގެ ކާރުޚާނާ އިމާރާތްކޮށްފައިވަނީ ޙުއްދަތައް ނުހޯދައެވެ. ބަންގްލަދޭޝްގެ ފުލުހުން ބުނީ އެ ތަނުގައި އަލިފާނުގެ ހާދިޘާއެއް ހިނގައިފިނަމަ ކުއްލި ޙާލަތުގައި ބޭނުންކުރާނެ އެއްވެސް ވަޞީލަތެއް ނެތްކަމަށާއި އެފަދަ ހާދިޘާއަކުން ސަލާމަތްވުމަށް ރައްކާތެރިކަމުގެ ފިޔަވަޅުތަކެއްވެސް އަޅާފައި ނުވާކަމަށެވެ.
އަލިފާނުގެ ހާދިޘާ ހިނގި ވަޤުތު ކާރުޚާނާގެ އެތެރޭގައި ތާށިވި ބައެއް މީހުންވަނީ ސަލާމަތްވުމަށް އިމާރާތުގެ ފުރާޅަށް އަރައިފައެވެ. ނަމަވެސް ސިޑިގޮޅިން ފުރާޅަށް އެރުމަށް ހުންނަ ދޮރެއް ތަޅުލާފައި ހުރުމުގެ ސަބަބުން ގިނަ ޢަދަދެއްގެ މީހުންނަށް ސަލާމަތް ވެވިފައި ނުވާކަމަށް ފުލުހުން ބުނެއެވެ. ކާރުޚާނާގައި ހިފާފައިވާ ވަރުގަދަ އަލިފާންގަނޑު ނިއްވާލެވުނީ ޖުލައި މަހުގެ 9ވަނަ ދުވަހުގެ ވަރަށް ލަސް ވަޤުތެއްގައެވެ. ކާރުޚާނާގައި އަލިފާން ރޯވި ސަބަބު ހޯދުމުގެ މަސައްކަތް ފުލުހުންވަނީ ފަށައިފައެވެ.
ކެމިކަލާއި އަލިފާން ހިފާފަދަ އެހެނިހެން ތަކެތި ރައްކާކޮށްފައިވާ ކާރުޚާނާގެ ވެރިމީހާއާއި އޭނާގެ ތިން ދަރިންގެ އިތުރުން ކުންފުނީގެ އިސް ތިން މީހުންވަނީ އަލިފާނުގެ ހާދިޘާއާ ގުޅިގެން ޙައްޔަރުކޮށްފައެވެ. ބަންގްލަދޭޝުގެ ފުލުހުން ބުނީ އެ ކާރުޚާނާގައި ކުޑަކުދިން ލައްވާ މަސައްކަތްކުރުވާކަމުގެ ތުޙުމަތުތަކާ ގުޅިގެން ވަކި ތަަޙްޤީޤެއްވެސް ފަށާފައިވާކަމަށެވެ. އެ ކާރުޚާނާގައި 11 އަހަރުގެ ކުދިން މަސައްކަތްކުރާކަމަށްވެސް ބައެއް މަސްދަރުތަކުން ބުނެއެވެ.
އަލިފާނުގެ ހާދިޘާތަކުގައި ބަންގްލަދޭޝުގައި އަހަރަކު އެތައް ސަތޭކަ މީހުން މަރުވެއެވެ. އެފަދަ ގިނަ ހާދިޘާތައް ހިނގަނީ އިމާރާތްތަކުގައި އަޅާފައިވާ ރައްކާތެރިކަމުގެ ފިޔަވަޅުތައް އުޞޫލަށް ނުފެތޭތީއެވެ. 2013ވަނަ އަހަރު ޑާކާގެ ހެދުން އުފައްދާ ކާރުޚާނާއެއް ވެއްޓި 1،000އަށްވުރެ ގިނަ މީހުން މަރުވުމުން ބަންގްލަދޭޝުގެ ސަރުކާރުންވަނީ އިމާރާތްތަކުގެ ރައްކާތެރިކަން ކަށަވަރުކުރުމަށް އިތުރު މަސައްކަތްތައް ކުރުމަށް ވަޢުދުވެފައެވެ.