ކޮޕާ އެމެރިކާ ފުޓްބޯޅަ މުބާރާތުގެ ތިންވަނަ ކޮލަންބިޔާ ހޯދައިފިއެވެ. މުބާރާތުގެ ތިންވަނަ މަޤާމު ކޮލަންބިޔާ ހޯދާފައިވަނީ ތިންވަނަ ހޮވަން ކުޅުނު މެޗުގައި 3 ލަނޑު 2 ލަނޑުން ޕެރޫ ބަލިކޮށްގެންނެވެ.
ދެ ޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މެޗުގައި ޕެރޫއިން ގިނައިން ބޯޅަ ގެންގުޅުނު ނަމަވެސް ގިނަ ހަމަލާ އުފައްދާފައިވަނީ ކޮލަންބިޔާއެވެ. މެޗުގެ ފުރަތަމަ ލަނޑު 45ވަނަ މިނެޓުގައި ޖަހާފައިވަނީ ޕެރޫގެ ޔުޝީމާ ޔޮޓުންނެވެ. ނަމަވެސް ދެވަނަ ހާފުގެ ކުޅުން ފެށުނުތާ 4ވަނަ މިނެޓުގައި ކޮލަންބިޔާގެ ހުއާން ކުއަޑުރާޑޯވަނީ ލަނޑެއް ޖަހާ މެޗުގެ ނަތީޖާ ހަމަހަމަކޮށްފައެވެ. މެޗުގައި ދެން ފެނުނީ 66ވަނަ މިނެޓުގައި ކޮލަންބިޔާގެ ލުއިސް ޑިއާޒް ލަނޑެއް ޖަހައި މެޗުގެ ލީޑު އެ ޤައުމަށް ނަގާދިން ތަނެވެ.
މެޗުގެ 82ވަނަ މިނެޓުގައި ޕެރޫގެ ޖިއާންލޫކާ ލަޕަޑޫލާ ޖަހާދިން ލަނޑުން މެޗުގެ ނަތީޖާ ހަމަހަމަވެ ޕެނަލްޓީ ޖަހަންޖެހޭނެކަމަށް ގިނަ ބަޔަކަށް ޤަބޫލުކުރެވުނެވެ. ނަމަވެސް ކޮލަންބިޔާގެ ޑިއާޒްގެ ވިސްނުންހުރީ ޕެނަލްޓީއަށް ނުގޮސް މެޗު ކާމިޔާބުކުރާށެވެ. އެ ގޮތުން މެޗުގެ އިތުރު ވަގުތުގެ 4ވަނަ މިނެޓުގައި އޭނާ ކާމިޔާބު ކޮށްދިން ލަނޑާއެކު ކޮލަންބިޔާއިން މެޗު ކާމިޔާބުކުރިއެވެ. މުބާރާތުގެ ފައިނަލް މެޗު ކުޅުމަށް ހަމަޖެހިފައިވަނީ މިރޭ ފަތިހުއެވެ. އެ މެޗުގައި ބައްދަލުކުރާނީ އެންމެފަހުގެ ޗެންޕިޔަން ބްރެޒިލާއި ވާދަވެރި އާޖެންޓީނާއެވެ.