ވިންބަލްޑަން ޓެނިސް މުބާރާތުގެ ފިރިހެނުންގެ ސިންގަލްސް ފައިނަލުން އެންމެ ފަހުގެ ޗެމްޕިއަން ސަރބިޔާގެ ނޯވަކް ޖޯކޮވިޗާއި އިޓަލީވިލާތުގެ މަޓިޔޯ ބެރެޓީނީ ޖާގަ ހޯދައިފިއެވެ. އެ ދެކުޅުންތެރިންވެސް ފައިނަލުން ޖާގަހޯދާފައިވަނީ ސެމީ ފައިނަލުގައި ވާދަކޮށް ކުޅުނު ދެ މެޗުވެސް ކާމިޔާބުކޮށްގެންނެވެ.
އެންމެ ފަހުގެ ޗެމްޕިއަން އަދި ދުނިޔޭގެ އެއްވަނައަށް ކުޅުންތެރިޔާ ޖޯކޮވިޗް ފައިނަލުން ޖާގަ ހޯދާފައިވަނީ ސެމީ ފައިނަލުގައި ކެނެޑާގެ ޑެނިސް ޝަޕޮވަލޯވާއި ބައްދަލުކުރި މެޗު ސީދާ ތިން ސެޓުން ކާމިޔާބުކޮށްގެންނެވެ. އެ މެޗު ސީދާ ތިން ސެޓުން ޖޯކޮވިޗް ކާމިޔާބުކުރި ނަމަވެސް އެ މެޗަކީ އޭނާއަށް އެހާ ފަސޭހަ މެޗެއް ނޫނެވެ. އެ ގޮތުން ޝަޕޮވަލޯވްވަނީ މެޗު ފެށުނީއްސުރެ ނިމެންދެން ޖޯކޮވިޗް ހާސްކަމުގެ ތެރޭގައި ބަހައްޓައިފައެވެ. އެ މެޗުގެ ފުރަތަމަ ސެޓު ޓައި ބްރޭކަކަށް ދިޔުމަށްފަހު 7-6ން ޖޯކޮވިޗް ކާމިޔާބުކުރިއެވެ. އަދި ދެވަނަ ސެޓް ޖޯކޮވިޗަށް ކާމިޔާބުކޮށްފައިވަނީ 7-5ންނެވެ. ފަހު ސެޓްވެސް ޖޯކޮވިޗް ކާމިޔާބުކުރީ ހަމަ އެ ނަތީޖާއިންނެވެ.
މެޗަށްފަހު ވާހަކަދައްކަމުން ޖޯކޮވިޗް ބުނީ މެޗުގެ ނަތީޖާއިން ޙަޤާޤަތް ހާމަވެގެން ނުދާކަމަށާއި މެޗުގައި ޝަޕޮވަލޯވް ދެއްކި މޮޅު ކުޅުމަށް ތަޢުރީފުކުރާކަމަށެވެ. ޝަޕޮވަލޯވް ބުނީ މެޗުގެ މުހިންމު ވަގުތުތަކުގައި ޖޯކޮވިޗުގެ މޮޅު ކުޅުން ފެނުނުކަމަށާއި މެޗުގެ ތަފާތަކަށްވީ އެ ވަގުތުތަކުގެ ބޭނުން އޭނާއަށް ނުހިފުމުންކަމަށެވެ.
މުބާރާތުގެ ފައިނަލުގައި ޖޯކޮވިޗާ ވާދަކުރާ ބެރެޓީނީވަނީ ސެމީފައިނަލުގައި ޕޯލެންޑުގެ ހުބަރޓް ހަރކާޒް tިން ސެޓު އެއް ސެޓުން ބަލިކޮށްފައެވެ. މެޗުގެ ސެޓުތައް ބެރެޓީނީ ކާމިޔާބުކޮށްފައިވަނީ 6-3، 6-0، 7-6 އަދި 6-4ންނެވެ. އެއާއެކު އޭނާވަނީ ފުރަތަމަ ފަހަރަށް މުބާރާތުގެ ފައިނަލުން ޖާގަ ހޯދައިފައެވެ.
ވިންބަލްޑަން ޓެނިސް މުބާރާތުގެ ފިރިހެނުންގެ ފައިނަލް މެޗު ކުޅުމަށް ހަމަޖެހިފައިވަނީ މާދަމާ ރެއެވެ.