އަފްޣާނިސްތާނުގައި ޙަރަކާތްތެރިވާ ޠާލިބާން ހަނގުރާމަވެރިންނާ ދެކޮޅަށް ހަނގުރާމަކުރަމުންދާ އެ ޤައުމުގެ އަސްކަރީ ފައުޖުތަކަށް ބޮޑެތި ނާކާމިޔާބީތަކެއް ލިބެމުންދާ ދަނޑިވަޅެއްގައި ސަރަޙައްދީ ރޮނގު ހުރަސްކޮށް އަވަށްޓެރި ތަޖިކިސްތާނުން ރައްކާތެރިކަން ހޯދަން ފަށައިފިއެވެ.
ޠާލިބާނުންނާއި އެމެރިކާއާ ދެމެދު ވެފައިވާ އެއްބަސްވުމެއްގެ ދަށުން ސެޕްޓެންބަރު މަހުގެ 11ވަނަ ދުވަހުގެ ކުރިން އަފްޣާނިސްތާނުގައި ޙަރަކާތްތެރިވާ އެމެރިކާގެ ސިފައިން އެ ޤައުމުން ބޭލުމަށް އެމެރިކާގެ ރައީސް ޖޯ ބައިޑަންވަނީ ވަޢުދުވެވަޑައިގެންފައެވެ. އެ މަސައްކަތުގެ ދަށުން އަފްޣާނިސްތާނުގައި ޤާއިމުކޮށްފައިވާ އެމެރިކާގެ އަސްކަރީ މައި މަރުކަޒުކަމަށްވާ ބަގުރާމު ވައިގެ މަރުކަޒުވަނީ އަފްޣާނިސްތާނުގެ ފައުޖުތަކާ ޙަވާލުކޮށްފައެވެ.
އަފްޣާނިސްތާނުގެ އުތުރުގައި ޠާލިބާނުން ދެމުންދާ ވަރުގަދަ ޙަމަލާތަކުގައި އެ ޖަމާޢަތުގެ ބާރުގެ ދަށަށް ގިނަ ސަރަޙައްދުތަކެއްވަނީ ގެނެސްފައެވެ. އެ ޙަމަލާތަކުގެ ވަރުގަދަކަމުން އަފްޣާނިސްތާނުގެ 1،000އަށްވުރެ ސިފައިންވަނީ ރައްކާތެރިކަން ކަށަވަރުކުރުމަށް ސަރަޙައްދީ ރޮނގު ހުރަސްކޮށް ތަޖިކިސްތާނަށް އެތެރެވެފައެވެ. ތަޖިކިސްތާނުގެ ސަރުކާރުންވަނީ އެ ޤައުމުގެ ސަލާމަތާއި ރައްކާތެރިކަން ކަށަވަރުކުރުމަށް އެ ސަރަޙައްދަށް 20،000 ސިފައިން ފޮނުވުމަށް ނިންމައިފައެވެ. ގާތް އަސްކަރީ ގުޅުންތަކެއް ޤާއިމުކޮށްފައިވާ ތަޖިކިސްތާނަށް ބޭނުންވާ އެހީތެރިކަމާއި އެއްބާރުލުން ދިނުމަށް ރަޝިޔާއިން ތައްޔާރަށް އޮތްކަމަށް އެ ޤައުމުންވަނީ ބުނެފައެވެ.
އަފްޣާނިސްތާނުގެ ސަރުކާރުން ބުނެފައިވަނީ ޠާލިބާނުން ޙަމަލާތައް ދީފައިވަނީ އެ ޤައުމުގެ އަސްކަރީ ފައުޖުތައް ތައްޔާރުނުވެ ތިއްބައިކަމަށާއި ރައްދުގައި އެ ޖަމާޢަތާ ދެކޮޅަށް ޙަމަލާތަކެއް ދިނުމަށް ތައްޔާރުވަމުންދާކަމަށެވެ.