ފަލަސްޠީނުގެ ސަރުކާރު ބަދަލުކުރުމަށް ގޮވާލައި ހުޅަނގު އައްސޭރީގައި ކުރަމުންދާ މުޒާހަރާތަކުގައި ބޮޑެތި ހަމަނުޖެހުންތަކެއް ހިނގައިފިއެވެ.
ސަލާމަތީ ބާރުތަކުގެ ބެލުމުގެ ދަށުގައި ހުއްޓައި ފަލަސްޠީނުގެ ރައީސް މަޙްމޫދު ޢައްބާސަށް އެންމެ ބޮޑަށް ފާޑުކިޔަމުންދިޔަ އެއް ސިޔާސީވެރިޔާކަމަށްވާ ނިޒާރު ބަނާތު މަރުވުމުން ހުޅަނގު އައްސޭރީގައި ކުރަމުންދާ މުޒާހަރާތަކަށްވަނީ ހަތަރު ދުވަސް ވެފައެވެ. މުޒާހަރާތަކުގައި ހަމަނުޖެހުންތައް ހިނގާފައިވަނީ ޢައްބާސް އިސްތިޢުފާ ދެއްވުމަށް ގޮވާލަމުންދިޔަ ބަޔަކާ ހުޅަނގު އައްސޭރީގައި ވެރިކަންކުރާ ފަތަޙަ ޖަމާޢަތަށް ތާޢީދުކުރާ ބަޔަކާ ދެމެދުގައެވެ.
ހަމަނުޖެހުންތައް އެންމެ ފުރަތަމަ ފެށުނު ޖޫން މަހުގެ 26ވަނަ ދުވަހު ރާމަﷲގައި ހުންނަ ޢައްބާސްގެ ރަސްމީ އިދާރާ ދޮށަށް އެއްވުމަށް ޢާންމުންގެ ގިނަ ބަޔަކުވަނީ މަސައްކަތްކޮށްފައެވެ. އެ ދުވަހުވެސް މުޒާހަރާގެ ބައިވެރިންނާ ދެކޮޅަށް ޢައްބާސަށް ތާއީދުކުރާ މީހުންނާއި ސަލާމަތީ ބާރުތަކުން ނުކުތުމުން ބޮޑެތި ކުރިމަތިލުންތަކެއް ހިނގާފައިވެއެވެ. އޭގެ ފަހުން ފާއިތުވި ދުވަސްތަކުގައި ދެ ފަރާތުގެ ދެމެދުގައި ހިނގަމުންދާ ކުރިމަތިލުންތައްވަނީ އިތުރުވެފައެވެ. މުޒާހަރާ ކަވަރުކުރުމުގައި ޙަރަކާތްތެރިވާ ނޫސްވެރިންނަށް ހުރަސް އަޅަމުންދާކަމަށްވެސް ބައެއް ނޫސް އިދާރާއަކުން ބުނެއެވެ. އެ ގޮތުން ކެމެރާތައް ކުރިމައްޗަށް ބަޔަކު އަރައި ބައެއް ނޫސްވެރިންގެ ކެމެރާތައް ހަލާކުކޮށްފައިވެއެވެ.
ބަނާތުގެ ޢާއިލާއިން ބުނީ ޖޫން މަހުގެ 24ވަނަ ދުވަހުގެ ފަތިހުގެ ވަޤުތެއްގައި އަލްޚާލީލުގައި ހުންނަ ބަނާތު ދިރިއުޅޭ ގެއަށް ފުލުހުން ވަދެ ދަގަނޑު ހޮޅިއަކުން އޭނާއަށް އަނިޔާކޮށްފައިވާކަމަށެވެ. އޭނާ ޙައްޔަރުކުރީ އޭގެ ފަހުންކަމަށް ޢާއިލާއިން ބުނެއެވެ. އޭނާ ހައްޔަރުކުރުމާ މަރުވުމާ ދެމެދު ވޭތުވި ގަޑިއިރެއްހާއިރުގެ ތެރޭގައި އޭނާގެ ބޮލަށާއި މެޔަށާއި ކަރަށާއި އަތްފަޔަށް ބޮޑެތި އަނިޔާތަކެއް ކޮށްފައިވެއެވެ. ނަމަވެސް އަލްޚަލީލުގެ ގަވަރުނަރު ޖިބުރީން އަލްބަކުރީ ވިދާޅުވެފައިވަނީ ބަނާތު މަރުވީ އޭނާ ޙައްޔަރުކުރަން އުޅުމުގެ ތެރޭގައި އޭނާގެ ޞިއްޙީ ޙާލަތު ގޯސްވުމުންކަމަށެވެ. ބަނާތު މަރުވި ޙާދިޘާ ތަޙްޤީޤުކުރައްވާނެކަމަށް ޢައްބާސްވަނީ ވިދާޅުވެފައެވެ. ނަމަވެސް ޢާންމުން ހިތްހަމަޖެހޭ ވަރުގެ މަސައްކަތްތަކެއް މިހާތަނަށް ސަރުކާރުން ކޮށްފައެއް ނުވެއެވެ.
2005ވަނަ އަހަރުން ފެށިގެން ފަލަސްޠީނުގެ ރައީސްގެ މަޤާމުގައި ޢައްބާސް ހުންނަވަނީ ޙައްދުފަހަނައަޅާފައިވާ އިސްރާއީލުގެ ދަޢުލަތާއި ހުޅަނގުގެ ތާޢީދާއެކުއެވެ. ޢާންމުންގެ މެދުގައިވަނީ އޭނާގެ މަޤްބޫލުކަން ވަރަށް ބޮޑަށް ކުޑަވެފައެވެ. ޤައުމުގައި ޚިޔާނާތާއި ފަސާދަ އިތުރުވެ އިޤްތިޞާދީ ގޮތުން ގިނަ ދަތިތަކެއް ކުރިމަތިވުމުގެ ސަބަބުން ޢާއްމުންވަނީ ވަރަށް ބޮޑަށް ހިތްހަމަ ނުޖެހިފައެވެ. ބަނާތަކީ ޢައްބާސާ ދެކޮޅަށް ޚިޔާނާތުގެ ގިނަ ތުޙްމަތުތަކެއް ކުރައްވައި ފަލަސްޠީނުގެ ޢާންމު އިންތިޚާބު ފަސްކުރުމަށް ޢައްބާސް ނިންމެވި ނިންމެވުމާ ދެކޮޅަށް ވަރަށް ބޮޑަށް ފާޑުވިދާޅުވި ބޭފުޅެކެވެ. އޭނާ މަރުވީ އިންތިޚާބުގައި ވާދަކުރެއްވުމަށް އޭނާގެ ނަންވެސް ހުށަހަޅުއްވަފައިވަނިކޮށެވެ.