މާލޭ ބިން ހެޔޮގޮތުގައި ބޭނުންކުރުމާއި ގުޅޭ ޕްލޭނާ ގުޅޭގޮތުން ޕްލޭނިންގ މިނިސްޓްރީއާއި ސިޓީ ކައުންސިލުން މާލެ ސިޓީގެ ރައްޔިތުންނާ ބައްދަލުކުރުމަށް ނިންމައިފިއެވެ.
މާލޭ ލޭންޑް ޔޫސް ޕްލޭންގައި ހިމަނާފައިވާ ކަންކަމާއި އަދި އަލަށް ގެންނަން ފެންނަ ބަދަލުތަކާއި ގުޅޭގޮތުން ރައްޔިތުންގެ ޚިޔާލު ހޯދުމަށް ބާއްވާ މިބައްދަލުވުން ބޭއްވުމަށް ހަމަޖެހިފައިވަނީ މިރޭ 8:30ގައި ޒޫމް މެދުވެރިކޮށެވެ. ބައްދަލުވުމުގައި ބައިވެރިވުމަށް ޝައުގުވެރިވާ ފަރާތްތަކަށް މި ލިންކު ސަރުކާރުގެ ގެޒެޓާއި މާލެ ސިޓީ ކައުންސިލްގެ ރަސްމީ ޓުވިޓަރ އެކައުންޓު މެދުވެރިކޮށް ފެންނާނެއެވެ.
މިނިސްޓްރީ އޮފް ނޭޝަނަލް ޕްލޭނިންގ ހައުންސިން އެންޑް އިންފްރާސްޓްރަކްޗަރއާއި މާލެ ސިޓީ ކައުންސިލުން ރައްޔިތުންނާ ބައްދަލުކުރުމަށް ހަމަޖެހިފައިވާއިރު މިއީ އަލަށް އިންތިޚާބުވި ކައުންސިލުން ރައްޔިތުންނާއެކު ބާއްވާ މިފަދަ ފުރަތަމަ ބައްދަލުވުމެވެ. އަދި މިބައްދަލުވުމުގައި ރައްޔިތުންގެ ފަރާތުން ހުށައަޅަން ފެންނަ ކަންކަމާއި ދޭން ބޭނުންވާ ޚިޔާލާއި ލަފާ ޒޫމްގެ ޗެޓް މެދުވެރިކޮށް ބައްދަލުވުމުގެ ތެރެއިން ހިއްސާކުރެވޭނެކަމަށް މާލެ ސިޓީ ކައުންސިލުން ވިދާޅުވެއެވެ. އަދި ވަގުތު އޮތް މިންވަރަކުން ބައްދަލުވުމުގައި ވާހަކަދެއްކުމުގެ ފުރުސަތުވެސް ދޭނެކަމަށް ކައުންސިލުން ވިދާޅުވެއެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދަށުން ސިޓީ ކައުންސިލްތަކުގެ މަސްއޫލިއްޔަތުތަކާއި ބާރުތަކުގެ ތެރޭގައި މުޅި ސިޓީގެ ތަރައްޤީގެ ޕްލޭނަށް ރިޢާޔަތްކޮށްގެން ތަރައްޤީގެ މަޝްރޫޢުތައް ރޭވުމާއި، ބަޖެޓް ތައްޔާރުކުރުމާއި، ތަރައްޤީގެ މަޝްރޫޢުތައް ތަންފީޒުކުރުން ހިމެނެއެވެ. އަދި ތަރައްޤީގެ އެކިއެކި މަޝްރޫޢުތައް ރާވައި ހިންގުމުގައި ސަރުކާރުގެ މިނިސްޓްރީތަކަށް ރައްޔިތުންގެ ފަރާތުން ލަފަޔާއި މަޝްވަރާ ދިނުމާއި، ސަރުކާރުގެ މިނިސްޓްރީތަކުން ކައުންސިލްގައި ހިންގާ މަޝްރޫޢުތައް ހިނގާނު ހިނގާގޮތް ބެލުމުގައި އެހީތެރިވެދީ، އެ މިނިސްޓްރީތަކަށް ޖަވާބުދާރީވެ، އެ މިނިސްޓްރީތަކުން ކަނޑައަޅާގޮތަކަށް ޤަވާއިދުން ރިޕޯޓް ހުށަހެޅުން ހިމެނެއެވެ.
މީގެ އިތުރުން ސިޓީއާއި ސީޓީގައި ހިމެނޭ އަވަށް އަވަށުގެ ބިމާއި ސިޓީ ކައުންސިލްގެ ސަރަޙައްދުތެރޭގައި ހިމެނޭ ރަށްރަށުގެ ބިން ބޭނުންކުރުމާބެހޭ ގޮތުން ސަރުކާރުގެ ކަމާބެހޭ މިނިސްޓްރީތަކާއި އަވަށު އޮފީސްތަކުގެ މަޝްވަރާއާއެއްގޮތަށް ލޭންޑް ޔޫސް ޕްލޭން އެކުލަވާލުމަކީވެސް ކައުންސިލްތަކުގެ މަސްއޫލިއްޔަތުތަކުގެ ތެރޭގައި ހިމެނޭކަމެކެވެ.