މާލޭގައި ފެނުގެ ބެކަޕް ސިސްޓަމް ޤާއިމުކުރުމަށް ބޭނުންވާ ބިން ސަރުކާރުން އެމްޑަބްލިއުއެސްސީއަށް ދީފައިވާކަމަށް އެކުންފުނިން ހާމަކުރައްވައިފިއެވެ. މިއީ މާލެއަށް ދިމާވާ ފެނުގެ މައްސަލަތައް ޙައްލުކުރުމަށް ކުރިއަށްގެންދާ މައި މަޝްރުޢެކެވެ.
މީގެ 6 އަހަރުކުރިން 2014ވަނަ އަހަރު މާލެއަށް ކުރިމަތިވި ފެނުގެ ކަރިސާއަށްފަހު އެކުލަވާލާފައިވާ ފެނާއި ނަރުދަމާގެ ޚާއްސަ ޤާނޫނުގެ ދަށުން ކޮންމެ ރަށެއްގައިވެސް 5 ދުވަހުގެ މުއްދަތަކަށް ބޭނުންކުރެވޭނެ ފެނުގެ ރިޒާވެއް ބެހެއްޓުން އެރަށެއްގައި ފެން ފޯރުކޮށްދޭ އިދާރާއެއްގެ މައްޗަށް ލާޒިމުކުރެއެވެ. މިޤާނޫނުގެ ދަށުން މާލޭގައި ފެންފޯރުކޮށްދެމުން އަންނަ މާލޭ ވޯޓަރ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ)އިންވަނީ މިދިޔަ އަހަރު މާލޭގައި ފެނުގެ ރިޒާވެއް ޤާއިމުކުރުމުގެ މަސައްކަތް ފަށާފައެވެ.
ޕީއެސްއެމްނިއުސްގެ ރާއްޖެމިއަދު ޕްރޮގްރާމްގައި ވާހަކަ ދައްކަވަމުން އެކުންފުނީގެ މެނޭޖިންގ ޑިރެކްޓަރ ހަސަން ޝާހް ވިދާޅުވީ މާލޭގައި ތަރައްޤީކުރާ ފެނުގެ ރިޒާވް ޤާއިމުކުރުމަށް ބޭނުންވާ ބިން މިހާރު ސަރުކާރުން އެކުންފުންޏާ ޙަވާލުކޮށްފައިވާކަމަށެވެ. އެގޮތުން ފެން ބިލްޑިންގެ ފުރަގަހުގައި އޮތް ކޮށި ނުވަތަ ކުރީގެ އެސްޓީއޯ "ރެޑީ މިކްސް" ބިން ސަރުކާރުންވަނީ އެމްޑަބްލިއުއެސްސީއަށް ދީފައެވެ. މިތަނުގައި މިވަގުތު ޓޭންކް ތަކުގެ ފައުންޑޭޝަން އެޅުމުގެ މަސައްކަތް ކުރަމުން އަންނަކަމަށް އެމްޑަބްލިއުއެސްސީއިން ވިދާޅުވެއެވެ.
"ޤާނޫނުގައި ބުނާ ފެނުގެ ރިޒާވް ހެދުމަށް ވަރަށް ބޮޑު ސްޓޯރޭޖެއް އެބަ ބޭނުންވޭ ގްރޭޓަރ މާލެ އޭރިއާއަށް. މާލޭގައި ވޯޓަރ ރިޒާވެއް ބިނާކުރުމަށް ސަރުކާރުން މިހާރުވަނީ އެމްޑަބްލިއުއެސްސީއަށް ބިމެއްވެސް ދީފައި. އެތަނުގައި ތޭރަހާސް ޓަނުގެ ދެޓޭންކު ބެހެއްޓުމުގެ މަސައްކަތް މިހާރު އަންނަނީ ކުރަމުން." ޝާހް ވިދާޅުވިއެވެ.
މާލެ ނުވަތަ ހުޅުމާލޭގައި ފެނުގެ މައްސަލައެއް ދިމާވެއްޖެނަމަ މާލެއިން ހުޅުމާލެއަށް ނުވަތަ ހުޅުމާލެއިން މާލެއަށް ފެން ފޮނުވޭނެގޮތަށް ހޮޅިއެއް، ސިނަމާލެ ބްރިޖުގެ ދަށުން އަޅާފައިވާކަމަށްވެސް ޝާހުވަނީ ވިދާޅުވެފައެވެ. އެހެންނަމަވެސް އަދި މިހޮޅިތައް ބޭނުންކުރަން ނުފަށާކަމަށް އޭނާ ވިދާޅުވިއެވެ.
މާލޭގައި ފެނުގެ ރިޒާވެއް އަދި ނެތްއިރު މިހާރު ފެން އުފައްދަމުންދަނީ ދުވަހުން ދުވަހަށް ބޭނުންކުރެވޭ މިންވަރަށެވެ. މާލޭގެ ފެނުގެ ސެކިއުރިޓީ އިތުރުކުރުމަށް 2018ވަނަ އަހަރު އެމްޑަބްލިއުއެސްސީންވަނީ މާލޭގައި ފެން އުފައްދައި އިތުރު ސިސްޓަމެއް ޤާއިމުކޮށްފައެވެ. މި ސިސްޓަމުން ދުވާލަކު 2000 ޓަނުގެ ފެން އުފައްދައެވެ.
މީގެ 6 އަހަރުކުރިން 2014ވަނަ އަހަރު އެމްޑަބްލިއުއެސްސީގައި އަލިފާނުގެ ޙާދިސާއެއް ހިނގައި މުޅި މާލެއިން ފެން ކެނޑިފައި ހަފްތާއެއްގެ މުއްދަތަކަށްވަނީ ދެމިގެންގޮސްފައެވެ. ފެނުގެ ރިޒާވެއް މާލޭގައި ނެތުމުގެ ސަބަބުން ކުއްލި ޙާލަތުގައި ފެން މާލެއަށް ގެނައީ އަތޮޅުތެރޭގެ ރަށްރަށުންނާއި ރާއްޖެއިން ބޭރުންވަނީ ފެން ގެނެސްފައެވެ.