ބްރޫކްލިން ނެޓްސް އާއި މިލްވައުކީ ބަކްސްގެ މެދުގައި ކުޅޭ ކޮންފަރެންސް ސެމީފައިނަލްގެ ފުރަތަމަ މެޗް ނެޓްސް ކާމިޔާބުކޮށްފި
އެން.ބީ.އޭ. ބާސްކެޓްބޯޅަ މުބާރާތުގައި ބްރޫކްލިން ނެޓްސް އާއި މިލްވައުކީ ބަކްސް ބައްދަލުކުރަމުންދާ އީސްޓަރން ކޮންފަރެންސްގެ ސެމީފައިނަލްގެ ފުރަތަމަ މެޗް ނެޓްސް ކާމިޔާބުކޮށްފިއެވެ. މިމެޗް ނެޓްސް ކާމިޔާބުކުރީ 115 ޕޮއިންޓް 107 ޕޮއިންޓުންނެވެ.
މިފަހަރުގެ މުބާރާތް ކާމިޔާބު ކުރުން އެންމެ ގާތްކަމަށް ކިޔާ ޓީމްތަކުގެ ތެރޭގައި ހިމެނޭ ނެޓްސްއިން އެޓީމްގެ އެންމެ މުހިންމު ތިން ކުޅުންތެރިން ކަމަށްވާ ކެވިން ޑުރާންޓް، ޖޭމްސް ހާޑެން އަދި ކައިރީ އަރވިންގ އާއެކު މެޗް ފެށި ނަމަވެސް ފުރަތަމަ މިނެޓްގެ ތެރޭގައި ޖޭމްސް ހާޑެންގެ ފަޔަށް އަނިޔާވެގެން ފައިބަން ޖެހުމުން އެޓީމް ހާސްކަމުގެ ތެރެއަށް ވެއްޓިގެންދިޔައެވެ. މިފަހަރުގެ ސީޒަންގައި ހާޑެންއަށް ވަނީ މީގެކުރިންވެސް އަނިޔާގެ ސަބަބުން 20 މެޗް ގެއްލިގެން ގޮސްފައެވެ. އަދި މިއަނިޔާއާއެކު އަނެއްކާވެސް ގިނަ ދުވަސްތަކަކަށް ކުޅުމާއި ދުރައް ދާން ޖެހިދާނެކަމަށް ވަނީ ބެލިފައެވެ. ހާޑެން ނެތުމަކީ ނެޓްސްއަށް ލިބިގެންދާނެ ވަރަށް ބޮޑު ގެއްލުމެކެވެ. ގިނަ ބަޔަކު ގަބޫލް ކުރާގޮތުގައި ހާޑެން އާއި ޑުރާންޓް އަދި އަރވިންގ ފިޓްކޮށް ތިބެއްޖެނަމަ ނެޓްސް ވާނީ މިފަހަރުގެ އެންމެ ވަރުގަދަ ޓީމަށެވެ. ނަމަވެސް ރެގިއުލަރ ސީޒަންގައިވެސް މިތިން ކުޅުންތެރިންނަށް އެކުގައި ކުޅެވޭވަރުވެފައިވަނީ އެންމެ އަށް މެޗްގައެވެ.
ރޭގެ މެޗްގައި ނެޓްސްއަށް އެންމެ ރަނގަޅު ކުޅުމެއް ދެއްކީ 29 ޕޮއިންޓް ހޯދާދީ 10 ރީބައުންޑް ނަގާދިން ޑުރާންޓްއެވެ. އަދި އަރވިންގވަނީ 25 ޕޮއިންޓް ހޯދާދީ 5 ރީބައުންޑް ނަގާ 8 އެސިސްޓް ކޮށްފައެވެ. އަދި ބަކްސްއަށް އެންމެ ރަނގަޅު ކުޅުމެއް ދެއްކީ 34 ޕޮއިންޓް ހޯދާދީ 11 ރީބައުންޑް ނަގާދިން ޖިއާނިސް އެންޓެޓޮކޮއުންޕޯއެވެ.