އެން.ބީ.އޭ. ބާސްކެޓްބޯޅަ މުބާރާތުގެ ޕްލޭ އޮފްގައި ލޮސް އެންޖެލިސް ކްލިޕަރސް އާއި ޑެލަސް މެވްރިކްސްގެ މެދުގައި ކުޅުނު ހަވަނަ މެޗް ކްލިޕަރސް ކާމިޔާބުކޮށް މިސީރީޒް އަނެއްކާވެސް އެއްވަރުކޮށްފިއެވެ. މިމެޗް ކްލިޕަރސް ކާމިޔާބުކުރީ 104 ޕޮއިންޓް 97 ޕޮއިންޓުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ކްލިޕަރސްއަށް އެންމެ ރަނގަޅު ކުޅުމެއް ދެއްކީ 45 ޕޮއިންޓް ހޯދައިދީ 6 ރީބައުންޑް ނަގާދިން ކައުހީ ލިއޮނާޑްއެވެ. މީގެއިތުރުން ރެޖީ ޖެކްސަންވަނީ އެޓީމަށް 25 ޕޮއިންޓް ހޯދައިދީ 9 ރީބައުންޑް ނަގާފައެވެ. އަދި ޕޯލް ޖޯޖް ވަނީ 20 ޕޮއިންޓް ހޯދައިދީ 13 ރީބައުންޑް ނަގާ 6 އެސިސްޓް ކޮށްފައެވެ. މިމެޗްގައި މެވްރިކްސްއަށް އެންމެ ރަނގަޅު ކުޅުމެއް ދެއްކީ 29 ޕޮއިންޓް ހޯދައިދީ 8 ރީބައުންޑް ނަގާ 11 އެސިސްޓް ދިން ލޫކާ ޑޮންޗިޗްއެވެ. އަދި ޓިމް ހާޑަވޭ ޖޫނިއަރ ވަނީ އެޓީމަށް 23 ޕޮއިންޓް ހޯދައިދީފައެވެ.
މިދެޓީމްގެ މެދުގައި ކުޅެމުންދާ ސީރީޒް މިހާރު 3 މެޗް 3 މެޗުން ދެޓީމް އެއްވަރުވުމުން ނަތީޖާ ނެރުމަށް ހަމަޖެހިފައިވަނީ ހަތްވަނަ މެޗުގައެވެ. އެމެޗް ކުޅުމަށް ހަމަޖެހިފައިވަނީ މާދަމާ ރޭ ލޮސްް އެންޖަލިސްގެ ސްޓޭޕްލް ސެންޓަރގައެވެ. އެމެޗުން މޮޅުވާ ޓީމެއް ވެސްޓަރން ކޮންފަރެންސްގެ ސެމީފައިނަލްގައި ބައްދަލުކުރާނީ ޔުޓާ ޖޭޒްއާއެވެ.
މިމުބާރާތުގެ ކޮންފަރެންސް ސެމީފައިނަލްގެ މެޗްތަކުގެ ކުޅުން މިރޭ ފެށޭނެއެވެ. މިގޮތުން މިރޭ ފެށުމަށް ހަމަޖެހިފައިވަނީ އީސްޓަރން ކޮންފަރެންސްގައި ބްރޫކްލިން ނެޓްސް އާއި މިލްވައުކީ ބަކްސްގެ މެދުގައި ކުޅޭ ސީރީޒްއެވެ.