ޔޫރޯ 2020 އަށް ތައްޔާރުވުމުގެ ގޮތުން ޖަރުމަނުވިލާތާއި ޑެންމާކް ބައްދަލުކުރި ރަހްމަތްތެރިކަމުގެ މެޗް އެއްވަރުވެއްޖެއެވެ. އޮސްޓްރިއާގައި ކުޅުނު މިމެޗް ނިމުނީ އެއްލަނޑު އެއްލަނޑުން ދެޓީމް އެއްވަރުވެގެންނެވެ.
މިމެޗްގައި ދެޓީމްގެ ފަރާތުންވެސް ފެނިގެން ގޮސްފައި ވަނީ ވަރަށް ހަމަހަމަ ކުޅުމެކެވެ. އަދި މިމެޗްގައި ޖަރުމަނުވިލާތުގެ ފަރާތުން އެންމެ އެދެވޭ ރަނގަޅު ކުޅުމެއް ފެނިގެން ގޮސްފައެއް ނުވެއެވެ. މިމެޗްގެ ފުރަތަމަ ލަނޑު މެޗްގެ 48 ވަނަ މިނެޓްގައި ޖަހައިދިނީ ޖަރުމަނުވިލާތުގެ ފްލޯރިއަން ނެއުހައުސްއެވެ. އަދި ޑެންމާކުން އެއްވަރު ކުރި ލަނޑު މެޗްގެ 71 ވަނަ މިނެޓްގައި ޖަހައިދިނީ ޔޫސުފް ޕޯލްސެންއެވެ. މިމެޗްގައި މީގެއިތުރުންވެސް ލަނޑު ޖަހާނެ ފުރުސަތު ޖަރުމަނުވިލާތަށް ލިބިގެން ގޮސްފައިވެއެވެ. މިގޮތުން ސަރޖީ ގްނެބްރީ އާއި ތޯމަސް މުލަރ އަށް ލިބިގެންދިޔަ ފުރުސަތު ފާހަގަވެގެންދިޔައެވެ.
މިމެޗްގައި 2018 ވަނަ އަހަރަށްފަހު ފުރަތަމަ ފަހަރަށް މުލަރ އާއި މެޓްސް ހުމެލް ވަނީ ޖަރުމަނު ޓީމަށް ކުޅެފައެވެ. ޖަރުމަނު ކޯޗް ޖޯހިމް ލޯވަނީ ޒުވާން ކުޅުންތެރިންނަށް ފުރުސަތު ދިނުމަށްޓަކައި އެދެ ކުޅުންތެރިންގެ އިތުރުން ޖެރޯމޭ ބޯޓެންގްވެސް 2018 ވަނަ އަހަރުގެ ފަހުން ޓީމަށް ނެގުން ހުއްޓާލާފައެވެ. މިމެޗްގައި ޔުއޭފާ ޗެމްޕިއަންސް ލީގުގައި ވާދަކުރި ޖަރުމަނުގެ ކުޅުންތެރިން ހިމަނާފައެއް ނުވެއެވެ. އަދި ޓޯނީ ކްރޫސް ކޯވިޑަށް ޕޮސޒިޓިވް ވި ފަހުން އަދި މުޅިން ފިޓްވެފައިނުވާތީ އޭނާވެސް މިމެޗްގައި ބައިވެރިކޮށްފައެއް ނުވެއެވެ.
މިފަހަރުގެ ޔޫރޯގައި ޖަރުމަނުވިލާތް ހިމެނިފައިވަނީ އެންމެ ވަރުގަދަކަމަށް ބެލެވޭ ގްރޫޕް އެފްގައެވެ. އެގްރޫޕްގައި ދެން ހިމެނެނީ ފަރަންސޭސިވިލާތާއި ޕޯޗުގަލް އަދި ހަންގޭރީއެވެ. އަދި ޑެންމާކް ހިމެނެނީ ބެލްޖިއަމް، ރަޝިޔާ އަދި ފިންލަންޑާއެކު ގްރޫޕް ބީ ގައެވެ.