ޔޫރޯ 2020 އަށް ތައްޔާރުވުމުގެ ގޮތުން ނެދަލަންޑްސް އާއި ސްކޮޓްލަންޑް ބައްދަލުކުރި ރަހްމަތްތެރިކަމުގެ މެޗް އެއްވަރުވެއްޖެއެވެ. ޕޯޗުގަލްގައި ކުޅުނު މިމެޗް ނިމުނީ 2 ލަނޑު 2 ލަނޑުން ދެޓީމް އެއްވަރުވެގެންނެވެ.
ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ނެދަލަންޑްސްއިންނެވެ. ނަމަވެސް މިމެޗްގެ ފުރަތަމަ ލަނޑު މެޗްގެ 10 ވަނަ މިނެޓްގައި ޖަހައި ލީޑު ނެގީ ސްކޮޓްލަންޑުންނެވެ. މިލަނޑު އެޓީމަށް ޖަހައިދިނީ ޖެކް ހެންޑްރީއެވެ. ނަމަވެސް މިލަނޑު ޖެހިތާ ހަތްމިނެޓް ފަހުން ނެދަލަންޑްސްގެ މެމްފިސް ޑެޕާއި ޖަހައިދިން ލަނޑުން ވަނީ މެޗްގެ ނަތީޖާ ހަމަހަމަކޮށްފައެވެ. މިމެޗްގައި ސްކޮޓްލަންޑުން ދެވަނަ ފަހަރަށް ލީޑު ނެގީ މެޗްގެ 63 ވަނަ މިނެޓްގައި ކެވިން ނިސްބެޓް ޖަހައިދިން ލަނޑުންނެވެ. ނަމަވެސް ނެދަލަންޑްސްއިން ވަނީ މެޗްގެ 89 ވަނަ މިނެޓްގައި ލިބުނު ހިލޭ ޖެހުމަކުން މެޗްގެ ނަތީޖާ ދެވަނަ ފަހަރަށް ހަމަހަމަކޮށްފައެވެ. މިލަނޑުވެސް ޖަހައިދިނީ ފުރަތަމަ ލަނޑު ޖަހައިދިން ޑެޕާއިއެވެ.
މިމެޗް ސްކޮޓްލަންޑުން ކުޅުނީ ހަތް ކުޅުންތެރިންނާއި ނުލައެވެ. އެއީ އެޓީމުގެ ޖޯން ފްލެކްއަށް ކޯވިޑް-19އަށް ޕޮޒިޓީވް ވުމާގުޅިގެން އޭނާ އާއި އެކުގައި އުޅުނު އިތުރު ހަ ކުޅުންތެރިޔަކު އެކަހެރި ކުރަން ޖެހުމުންނެވެ.
މިދެޓީމްވެސް ޔޫރޯ ފެށުމުގެ ކުރިން ރަހްމަތްތެރިކަމުގެ އިތުރު މެޗެއް ކުޅުމަށްވަނީ ހަމަޖެހިފައެވެ. މިގޮތުން މިއަންނަ އާދީއްތަ ދުވަހު ސްކޮޓްލަންޑް ލަގްޒެންބަރގް އާއި ބައްދަލުކުރާއިރު ނެދަލަންޑްސް ބައްދަލުކުރާނީ ޖޯޖިއާއެވެ.