ޔޫރޯ 2020 އަށް ތައްޔާރުވުމުގެ ގޮތުން އިންގްލަންޑާއި އޮސްޓްރިއާގެ މެދުގައި ކުޅުނު ރަހްމަތްތެރިކަމުގެ މެޗް އިންގްލަންޑް ކާމިޔާބުކޮށްފިއެވެ. މިމެޗް އިންގްލަންޑް ކާމިޔާބުކުރީ އެއްލަނޑު ސުންލަނޑުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ އޮސްޓްރިއާއިންނެވެ. ޔުއޭފާ ޗެމްޕިއަންސް ލީގުގެ ފައިނަލާއި ޔޫރޮޕާ ލީގު ފައިނަލްގައި ވާދަކުރި ތިން ޓީމް ކަމަށްވާ ޗެލްސީ، މެންޗެސްޓަރ ސިޓީ އަދި މެންޗެސްޓަރ ޔުނައިޓެޑުން އިންގްލަންޑް ޓީމަށް ނަގާފައިވާ ކުޅުންތެރިން މިމެޗްގައި ހިމަނާފައެއް ނުވެއެވެ. އެހެންކަމުން އިންގްލަންޑް ޓީމުގައި މިފަހަރުގެ ޔޫރޯގައި ނުހިމެނޭ ބައެއް ކުޅުންތެރިންވެސް އެޓީމްގެ ކޯޗް ގެރެތު ސައުތުގޭޓް ވަނީ މިމެޗްގައި ބޭނުން ކޮށްފައެވެ. މިމެޗްގައި އިންގްލަންޑުގެ ފަރާތުން އެންމެ ރަނގަޅު ކުޅުން ފެނިގެން ގޮސްފައެއް ނުވެއެވެ. މިމެޗްގައި އިންގްލަންޑުން ޖެހި ހަމައެކަނި ލަނޑު މެޗްގެ 56 ވަނަ މިނެޓްގައި ޖަހާދިނީ އާސެނަލްގެ ޒުވާން ކުޅުންތެރިޔާ ބުކާޔޯ ސާކާއެވެ. މިއީ އޭނާ އިންގްލަންޑް ޓީމަށް ޖަހާދިން ފުރަތަމަ ލަނޑެވެ.
ރޭގެ މެޗްގެ ފަހު ވަގުތު ކޮޅުގެ ތެރޭގައި އޮސްޓްރިއާއިންވަނީ އިންގްލަންޑްގެ ގޯލަށް ގިނަ ހަމަލާތަކެއް ފޮނުވާލާފައެވެ. ނަމަވެސް އެއިން އެއްވެސް ހަމަލާއެއް ގޯލަކަށް ބަދަލު ކުރެވޭގޮތެއް ނުވިއެވެ. މިމެޗް ނިމެން ގާތްވެފައިވަނިކޮށް ލިވަޕޫލްގެ ޑިފެންޑަރ ޓްރެންޓް އެލެގްޒެންޑަރ އާނޯލްޑްގެ ފަޔަށް އަނިޔާވިތަން ފެނިގެންދިޔައެވެ. އާނޯލްޑަކީ މިފަހަރުގެ އިންގްލަންޑް ޓީމްގައި ހިމެނުނު ކުޅުންތެރިންގެ ތެރެއިން އެންމެ ގިނަ ބަޔެއްގެ ނަޒަރު ހުއްޓިފާވި ކުޅުންތެރިޔާއެވެ.
ޔޫރޯ މުބާރާތް ފެށުމުގެ ކުރިން ރަހްމަތްތެރިކަމުގެ އެއްމެޗް އިތުރަށް އިންގްލަންޑް ކުޅޭނެއެެވެ. މިއަންނަ އާދީއްތަ ދުވަހު ކުޅޭ މެޗްގައި ބައްދަލުކުރާނީ ޔޫކްރެއިންއާއެވެ.