އެން.ބީ.އޭ. ބާސްކެޓްބޯޅަ މުބާރާތުގެ އީސްޓަރން ކޮންފަރެންސްގެ ސެމީފައިނަލުން ބްރޫކްލިން ނެޓްސް ޖާގަހޯދައިފިއެވެ. ނެޓްސް ސެމީފައިނަލުން ޖާގަހޯދީ ޕްލޭ އޮފް ފުރަތަމަ ބުރުގައި ބޮސްޓަން ސެލްޓިކްސް އާއި ބައްދަލުކުރި ސީރީޒް 4 މެޗް އެއްމެޗުން ކާމިޔާބުކޮށްގެންނެވެ.
މިދެޓީމްގެ މެދުގައި ކުޅުނު ފަސްވަނަ މެޗް ނެޓްސް ކާމިޔާބުކުރީ 123 ޕޮއިންޓް 109 ޕޮއިންޓުންނެވެ. ދެޓީމްގެ ފަރާތުން މޮޅު ކުޅުމެއް ފެނިގެންދިޔަ މިމެޗްގައި ނެޓްސްގެ ޖޭމްސް ހާޑެން ވަނީ 34 ޕޮއިންޓް ހޯދައިދީ 10 ރީބައުންޑް ނަގާ 10 އެސިސްޓް ކޮށް ޓްރިޕްލް ޑަބަލްއެއް ހަދާފައެވެ. އަދި ސެލްޓިކްސްގެ ޖޭސަން ޓެޓުމް ވަނީ 32 ޕޮއިންޓް ހޯދައިދީ 9 ރީބައުންޑް ނަގާ 5 އެސިސްޓް ކޮށްފައެވެ. ސެމީފައިނަލްގައި ނެޓްސް ބައްދަލުކުރާނީ މިލްވައުކީ ބަކްސްއާއެވެ.
މިމުބާރާތުގައި ފީނިކްސް ސަންސް އާއި ލޮސް އެންޖަލިސް ލޭކަރސް ބައްދަލުކުރި ފަސްވަނަ މެޗް ކާމިޔާބުކޮށް ސަންސްވަނީ އެއްމެޗްގެ ލީޑެއް ނަގާފައެވެ. މިދެޓީމްގެ މެދުގައި ކުޅުނު ފަސްވަނަ މެޗް ސަންސް ކާމިޔާބުކުރީ 115 ޕޮއިންޓް 85 ޕޮއިންޓުންނެވެ. މިމެޗްގައި ސަންސްގެ ޑެވިން ބޫކަރވަނީ 30 ޕޮއިންޓް ހޯދައިދީ 7 ރީބައުންޑް ނަގާ ފަސް އެސިސްޓް ކޮށްފައެވެ. އަދި ލޭކަރސްގެ ލެބްރޮން ޖޭމްސްވަނީ 24 ޕޮއިންޓް ހޯދައިދީ 5 ރީބައުންޑް ނަގާ 7 އެސިސްޓް ކޮށްފައެވެ.
މިމުބާރާތުގައި ޑެންވަރ ނަގެޓްސް އާއި ޕޯޓްލަންޑް ޓްރެއިލް ބްލޭޒަރސް ބައްދަލުކުރި ފަސްވަނަ މެޗް ކާމިޔާބުކޮށް ނަގެޓްސްވެސްވަނީ އެއްމެޗްގެ ލީޑެއް މިސީރީޒްގައި ނަގާފައެވެ. މިދެޓީމްގެ މެދުގައި ކުޅުނު ފަސްވަނަ މެޗް ނަގެޓްސް ކާމިޔާބުކުރީ ދެފަހަރު އޯވަރޓައިމްއަށް ގޮސްގެން 147 ޕޮއިންޓް 140 ޕޮއިންޓުންނެވެ. މިމެޗްގައި ނަގެޓްސްގެ ނިކޮލާ ޔޮކިޗްވަނީ 38 ޕޮއިންޓް ހޯދައިދީ 11 ރީބައުންޑް ނަގާ 9 އެސިސްޓް ކޮށްފައެވެ. އަދި ބްލޭޒަރސްގެ ޑާމިއަން ލިލާޑްވަނީ 55 ޕޮއިންޓް ހޯދައިދީ 6 ރީބައުންޑް ނަގާ 10 އެސިސްޓް ކޮށްފައެވެ.