މިމަހުގެ 11 ވަނަ ދުވަހު ފެށުމަށް ހަމަޖެހިފައިވާ ޔޫރޯ 2020 އަށް ތައްޔާރު ވުމުގެ ގޮތުން ޕޯލަންޑާއި ރަޝިޔާގެ މެދުގައި ކުޅުނު ރަހްމަތްތެރިކަމުގެ މެޗު އެއްވަރުވެއްޖެއެވެ. މިމެޗް ނިމުނީ އެއްލަނޑު އެއްލަނޑުންނެވެ.
މިމެޗްގައި ދެޓީމްގެ ފަރާތުންވެސް ފެނިގެންދިޔައީ ވަރަށް ހަމަހަމަ ކުޅުމެކެވެ. މިމެޗްގެ ފުރަތަމަ ލަނޑު މެޗްގެ 4 ވަނަ މިނެޓްގައި ޖަހައިދިނީ ޕޯލަންޑްގެ ޖާކޫބް ސްވިއަރޒޮކްއެވެ. އަދި މިމެޗްގެ ނަތީޖާ ރަޝިޔާއިން ހަމަހަމަ ކުރި ލަނޑު މެޗްގެ 20 ވަަނަ މިނެޓްގައި ޖަހައިދިނީ ޔަޝެޒްލާވް ކަރަވަޔޭވްއެވެ. މީގެއިތުރުންވެސް މިމެޗްގައި ދެޓީމަށް ލަނޑު ޖަހާނެ ރަނގަޅު ފުރުސަތު ލިބިގެން ގޮސްފައިވެއެވެ.
މިފަހަރުގެ ޔޫރޯ މުބާރާތުގައި ޕޯލަންޑް ހިމެނިފައިވަނީ ސްލޮވާކިއާ، ސްޕެއިން އަދި ސްވިޑްން އާއެކު ގްރޫޕް އީގައެވެ. އަދި ފުރަތަމަ މެޗްގައި މިމަހުގެ 14 ވަނަ ދުވަހު ނިކުންނާނީ ސްލޮވާކިއާ އާއި ދެކޮޅަށެވެ. އަދި ރަޝިޔާ ހިމެނިފައިވަނީ ބެލްޖިއަމް، ޑެންމާކް އަދި ފިންލަންޑާއެކު ގްރޫޕް ބީ ގައެވެ. އަދި ފުރަތަމަ މެޗްގައި މިމަހުގެ 13 ވަނަ ދުވަހު ނިކުންނާނީ ބެލްޖިއަމް އާއި ދެކޮޅަށެވެ.