ކުރިއަށް އޮތް ޔޫރޯ 2020 ގައި ވާދަކުރާ އިންގްލަންޑް ފުޓްބޯޅަ ޓީމްގެ ރަސްމީ ލިސްޓް އާންމުކޮށްފިއެވެ. މިގޮތުން އިންގްލަންޑްގެ ކޯޗު ގެރެތު ސައުތުގޭޓް ކުރިން އެކުލަވާލި ވަގުތީ ޓީމުން 7 ކުޅުންތެރިޔަކުވަނީ ބާކީކޮށްފައެވެ.
ސައުތުގޭޓް އެކުލަވާލި ވަގުތީ ޓީމުން ބާކީ ކޮށްފައިވާ ކުޅުންޔެރިންގެ ތެރޭގައި އަނިޔާގެ ސަބަބުން ޓީމާއި ވަކިވި މޭސަން ގްރީންވުޑް އާއި ޖެސީ ލިންގާޑް، އާރޮން ރެމްސްޑޭލް، ބެން ވައިޓް، ބެން ގޮޑްފްރީ، ޖޭމްސް ވާރޑް ޕްރައުސް އަދި އޮލީ ވޮޓްކިންސް ހިމެނެއެވެ. މިފަހަރު އެކުލަވާލި އިންގްލަންޑް ޓީމްގައި މިވަގުތު އަނިޔާގައި ތިބި ދެ ކުޅުންތެރިން ކަމުގައިވާ ހެރީ މެގުއަރ އާއި ޖޯޑަން ހެންޑަސަން ހިމަނާފައިވެއެވެ. އަދި ދެން އެންމެ ބޮޑަށް ގިނަ ބަޔަކު ފާހަގަ ކުރަމުންދަނީ ޓްރެންޓް އެލެގްޒެންޑަރ އާނޯލްޑް ޓީމްގައި ހިމަނާފައިވުމެވެ.
ޓީމު އާންމު ކުރުމަށްފަހު ވާހަކަ ދައްކަމުން ސައުތުގޭޓް ހާމަކުރިގޮތުގައި އިންގްލަންޑް ޓީމް އެކުލަވާލުމަކީ ވަރަށް އުނދަގޫ ކަމެއް ކަމަށެވެ. އެއީ އިންގްލަންޑްގައި ހުނަރުވެރި މޮޅު ކުޅުންތެރިން ގިނަވުމުންނެވެ. މިމަހުގެ 13 ވަނަ ދުވަހު ޔޫރޯގެ ފުރަތަމަ މެޗްގައި އިންގްލަންޑް ވާދަކުރުމުގެ ކުރިން މިއޮތް ދުވަސް ކޮޅުގެ ތެރޭގައި ރަހްމެތްތެރިކަމުގެ ދެމެޗް އިންގްލަންޑް ކުޅޭނެއެވެ. މިގޮތުން މިރޭ އޮސްޓްރިއާ އާއި ދެކޮޅަށް ކުޅޭއިރު މިއަންނަ އާދީއްތަ ދުވަހު ރުމޭނިއާ އާއި ކުޅުމަށްވެސް ވަނީ ހަމަޖެހިފައެވެ.
އިންގްލަންޑް ޓީމްގައި މިފަހަރު ހިމެނެނީ ކީޕަރުންގެ ތެރޭގައި މެންޗެސްޓަރ ޔުނައިޓެޑްގެ ޑީން ހެންޑަރސަން، ވެސްޓް ބްރޮމްގެ ސެމް ޖޯންސްޓޯން އަދި އެވަޓަންގެ ޖޯޑަން ޕިކްފަޑްއެވެ. ޑިފެންޑާރުންގެ ތެރޭގައި މެންޗެސްޓަރ ސިޓީގެ ޖޯން ސްޓޯންސް އަދި ކައިލް ވޯކަރ، މެންޗެސްޓަރ ޔުނައިޓެޑްގެ ލޫކް ޝޯ އަދި ހެރީ މެގުއަރ، ލިވަޕޫލްގެ ޓްރެންޓް އެލެގްޒެންޑަރ އާނޯލްޑް، އެސްޓަންވިލާގެ ޓައިރޮން މިންގްސް، ޗެލްސީގެ ރީސް ޖޭމްސް އަދި ބެން ޗިލްވެލް، ވުލްވަރހެމްޓަން ވޮންޑަރަރސްގެ ކޯނަރ ކޯޑީ އަދި އެޓްލެޓިކޯ މެޑްރިޑްގެ ކިއެރަން ޓްރިޕިއަރއެވެ.
މެދުތެރެއިން ޗެލްސީގެ މޭސަން މައުންޓް، ވެސްޓް ހޭމް ޔުނައިޓެޑްގެ ޑެކްލަން ރައިސް، ލިވަޕޫލްގެ ޖޯޑަން ހެންޑަރސަން، ބޮރޫޝިއާ ޑޯޓްމުންޑްގެ ޖޫޑް ބެލިންގހަމް އަދި ލީޑްސްގެ ކެލްވިން ފިލިޕްސްއެވެ. އަދި ފޯވަޑުންގެ ގޮތުގައި ސްޕަރސްގެ ހެރީ ކޭން، ޔުނައިޓެޑްގެ މާކަސް ރަޝްފަޑް، ސިޓީގެ ރަހީމް ސްޓަރލިންގ އަދި ފިލް ފޯޑަން، އެވަޓަންގެ ކެލްވަރޓް ލުއިން، ވިލާގެ ޖެކް ގްރީލިޝް، ޑޯޓްމުންޑްގެ ޖޭޑަން ސަންޗޯ އަދި އާސެނަލްގެ ބުކާޔޯ ސާކޯއެވެ.
އިންގްލަންޑް މިފަހަރު ހިމެނިފައިވަނީ ކްރޮއޭޝިއާ، ސްކޮޓްލަންޑް އަދި ޗެކް ރިޕަބްލިކް އާއެކު ގްރޫޕް ޑީގައެވެ.