ހޯރަފުށީގައި ހިނގި އަލިފާނުގެ ޙާދިސާގައި އަނދައިގެން ގޮސްފައިވާ ފައިސާގެ ވެރިފަރާތަށް އޭގެ ބަދަލު ދޭނެކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ވިދާޅުވެއްޖެއެވެ.
ހޯރަފުށީގައި ހިނގި އަލިފާނުގެ ޙާދިސާގައި އެރަށުގައި ދިރިއުޅޭ ބިދޭސީއަކު ރައްކާކޮށްފައި ހރި 5،000އަށްވުރެ ގިނަ ރުފިޔާގެ ފައިސާގެ ނޫޓުތައްވަނީ އަނދާފައެވެ. ސޯޝަލް މީޑިއާގައި ދައުރުވާ ފޮޓޯއަކުން ގިނަ ޢަދަދެއްގެ ފައިސާގެ ނޫޓުތަކެއް އަނދާފައިވާތަން ފެންނަން ހުރެއެވެ.
މިޙާދިސާއާ ގުޅިގެން އެމްއެމްއޭއިން ވިދާޅުވީ މިފަދަ ޙާލަތްތަކުގައި ޢަމަލުކުރާނެ އުސޫލެއް އެއިދާރާއިގައި އޮންނަކަމަށެވެ. އެގޮތުން މިފަދަ ޙާދިސާތަކުގައި ހަލާކުވާ ފައިސާގެ ބަދަލު، ކަނޑައެޅިފައިވާ އުސޫލާ އެއްގޮތްވާ މަތިން ލިބޭނެކަމަށް އެމްއެމްއޭއިން ވިދާޅުވެއެވެ.
މިޙާދިސާގައި ފައިސާގެ އިތުރުން ބިދޭސީ މީހާ ދިރިއުޅޭ ގެއަށްވެސްވަނީ އެކިވަރުގެ ގެއްލުންވެފައެވެ. އެކަނި އުޅޭ މިބިދޭސީ މީހާއަށް ލިބުނު ގެއްލުމުގެ ބަދަލު ހޯދުމަށް ހޯރަފުށީ މީހުން އެދެމުން އަންނައިރު އެމީހާއަށް އެކިގޮތްގޮތުން އެހީވެސް އަންނަނީ ލިބެމުންނެވެ.