ސިންގަޕޫރުގެ ބޮޑުވަޒީރު ލީ ޝެއިން ލޮންގުގެ ބައްޕާފުޅުގެ ގެކޮޅާ ގުޅޭގޮތުން މެލޭޝިޔާގެ ނޫސްވެރިޔަކު ޝާޢިރުކުރި ލިޔުމަކާ ގުޅިގެން ކުރެއްވި އަބުރުގެ ދަޢުވާގެ އަޑުއެހުމަކަށް އޭނާ ކޯޓަށް ހާޒިރުވެވަޑައިގެންފިއެވެ.
ބޮޑުވަޒީރުގެ ބައްޕާފުޅު ލީ ކުއާން ޔޫއަކީ 1959ވަނަ އަހަރުން 1990ވަނަ އަހަރަށް ސިންގަޕޫރުގެ ބޮޑުވަޒީރުކަން ކުރައްވާފައިވާ ބޭފުޅެކެވެ. އޭނާ އަވަހާރަވުމުން އޭނާގެ ގެކޮޅާމެދު ޢަމަލުކުރާނެ ގޮތަކާ ގުޅޭގޮތުން ޢާއިލާގެ މެދުގައި ދެބަސްވުންތަކެއް އުފެދިފައިވާކަމަށް ބުނެ މެލޭޝިޔާގެ ރުބާޝިނީ ޝުންމުގަނަތަންގެ ލިޔުމެއް ސިންގަޕޫރުގެ ނޫހަކުންވަނީ ޝާޢިރުކޮށްފައެވެ. އެ ލިޔުމާ ގުޅިގެން ލީވަނީ 2019ވަނަ އަހަރުގެ އޮގަސްޓު މަހުގެ ތެރޭގައި ރުބާޝިނީއާ ދެކޮޅަށް އަބުރުގެ ދަޢުވާކޮށްފައެވެ.
މެއި މަހުގެ 31ވަނަ ދުވަހު އެ މައްސަލައިގައި ބޭއްވި އަޑުއެހުމުގައި ލީވަނީ އިންޓަނެޓު މެދުވެރިކޮށް ބައިވެރިވެޑައިގެންފައެވެ. ޝަރީޢަތުގެ މަޖިލީހުގައި ވާހަކަދައްކަވަމުން ލީ ވިދާޅުވީ އޭނާ މައްސަލަ ހުށަހެޅުއްވީ އެ ލިޔުން ޝާޢިރުކުރުމުން ލިބުނު ގެއްލުމުގެ ބަދަލު ހޯއްދެވުމަށްކަމަށެވެ. ރުބާޝިނީވަނީ ބޮޑެތި ތުޙްމަތުތަކެއް ކޮށްފައިވާކަމަށާއި އެ ލިޔުން ލިޔެފައިވަނީ ލީއަށް ލިބޭ ނޭދެވޭ ސަމާލުކަން އިތުރުވެ މީސްމީޑިޔާގައި އެ ލިޔުން ހަލުވިކަމާއެކު ފެތުރޭނެފަދަ ގޮތަކަށްކަމަށް އޭނާ ވިދާޅުވިއެވެ.
ސިންގަޕޫރުގެ ވެރިކަންކުރާ ޕީޕަލްސް އެކްޝަން ޕާޓީގެ އިސްވެރިން މީގެ ކުރިންވެސްވަނީ ބޭރުގެ ނޫސްތަކާއި އިދިކޮޅު ސީޔާސީވެރިންނާ ދެކޮޅަށް އަބުރުގެ ދަޢުވާކޮށްފައެވެ. އެފަދަ ދަޢުވާތައް ކުރަނީ އަބުރުގެ ރައްކާތެރިކަން ކަށަވަރުކުރުމަށްކަމަށް އެ ބޭފުޅުން ވިދާޅުވެއެވެ. ނަމަވެސް ހިޔުމަން ރައިޓްސް ވޮޗުފަދަ އިންސާނީ ޙައްޤުތަކަށް ވަކާލާތުކުރާ ބައެއް ޖަމުޢިއްޔާތަކުންވަނީ އެފަދަ ދަޢުވާތަކުގެ ސަބަބުން ޚިޔާލުފައުޅުކުރުމުގެ މިނިވަންކަމަށް ހުރަސްއެޅޭކަމަށް ބުނެފައެވެ.
ސިންގަޕޫރުގެ ހައިކޯޓުން މިދިޔަ މާރިޗު މަހުގެ ތެރޭގައިވެސްވަނީ ލީއާ އެއްކޮޅަށް އެފަދަ މައްސަލައެއް ނިންމަވައިފައެވެ. ބުލޮގަރަކާ ދެކޮޅަށް ކުރި އަބުރުގެ ދަޢުވާ ސާބިތުވުމުން ގެއްލުމުގެ ބަދަލުގެ ގޮތުގައި ލީއަށް ގާތްގަނޑަކަށް 100،000 އެމެރިކާ ޑޮލަރު ދިނުމަށް ކޯޓުންވަނީ އަމުރުކޮށްފައެވެ.