ޙައްޔަރުކޮށްފައިވާ މީހުން ބަދަލުކުރުމަށް ނުސީދާ އަދި އަވަސް މަޝްވަރާތަކެއްކުރުމަށް ތައްޔާރަށް ތިބިކަމަށް ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތުން ބުނެފިއެވެ. ޙަމާސުން އެހެން ބުނީ މިދިޔަ މަހުގެ ތެރޭގައި އިސްރާއީލާ ދެކޮޅަށް ވަރުގަދަ ޙަމަލާތަކެއް ބަދަލުކޮށްފައިވަނިކޮށެވެ.
މެއި މަހުގެ 10ން 21އަށް އިސްރާއީލުގެ ޔަހޫދީ ފައުޖުތަކުންވަނީ ޣައްޒާއަށް ވަރުގަދަ ޢުދުވާނީ ޙަމަލާތަކެއް ދީފައެވެ. އެ ޙަމަލާތަކުގައި ޣައްޒާގެ ޢުމުރާނީ ވަޞީލަތްތަކަށް ބޮޑެތި ގެއްލުންތަކެއް ލިބުމުގެ އިތުރުން 250އަށްވުރެ ގިނަ މީހުން ޝަހީދުވިއެވެ. އޭގެ ތެރޭގައި 66 ކުޑަކުދިންނާއި 39 އަންހެނުންނާއި 17 މުސްކުޅިން ހިމެނެއެވެ. އަދި 1،900އަށްވުރެ ގިނަ މީހުން ޒަޚަމުވެފައިވެއެވެ. ޙަމާސް ޖަމާޢަތުންވެސްވަނީ އިސްރާއީލުގެ އަނިޔާވެރި ދަޢުލަތާ ދެކޮޅަށް ވަރުގަދަ ރޮކެޓު ޙަމަލާތަކެއް ދީފައެވެ. އެ ޙަމަލާތަކުގައި އިސްރާއީލް ހުއްޓުމަކަށް ގެނައުމުގެ އިތުރުން 12 ޔަހޫދީން މަރުވެ، އިތުރު 800 ޔަހޫދީން ޒަޚަމުވެފައިވެއެވެ.
އިސްރާއީލާއި ޙަމާސާ ދެމެދު ޙަމަލާބަދަލުކުރުން ހުއްޓައިލުމަށް ވެފައިވާ އެއްބަސްވުން ދެމެހެއްޓޭނެ ގޮތްތައް ދެނެގަތުމަށް މިޞްރުގެ ވަފުދެއްވަނީ ޣައްޒާއަށް ވަޑައިގެންފައެވެ. މިޞްރުގެ ޖާސޫސީ އިދާރާގެ އިސްވެރިޔާ ޢައްބާސް ކަމާލާ ބައްދަލުކުރައްވައި ޣައްޒާގައި ހުންނަވާ ޙަމާސްގެ އިސްވެރިޔާ ޔަޙްޔާ ސިންވާރު ވިދާޅުވީ މިއީ އަސީރުން ބަދަލުކުރުމަށް ލިބޭ ވަރަށް ރަނގަޅު ފުރުޞަތެއްކަމަށާއި އަވަސްގޮތަކަށް ނުރަސްމީ މަޝްވަރާތަކެއްކޮށް ނިންމުމަކާ ހަމައަށް އައުމަށް ޙަމާސުން ބޭނުންވާކަމަށެވެ.
މަޢުލޫމާތު ލިބިފައިވާ ގޮތުގައި މިޞްރުގެ ޖާސޫސީ އިދާރާގެ އިސްވެރިޔާއާއެކު ޙަމާސުން ކުރާ މަޝްވަރާތަކުގައި ޙަމަލާބަދަލުކުރުން ހުއްޓައިލުމުގެ އެއްބަސްވުން ދެމެހެއްޓޭނެ ގޮތްތަކުގެ އިތުރުން އަސީރުން ބަދަލުކުރުމާއި ޣައްޒާ އާރާސްތުކުރުން ހިމެނެއެވެ. ސިންވާރު ވިދާޅުވީ ހަނގުރާމައިގައި ސުންނާފަތިވެފައިވާ ޣައްޒާ އާރާސްތުކުރުމާއި އެތައް އަހަރެއް ވަންދެން އިސްރާއީލުން ބަންދުކޮށްފައިވާ ޣައްޒާގެ ސަރަޙައްދީ އޮނގުތައް ހުޅުވުމާ ގުޅޭގޮތުން މަޝްވަރާކުރުމަށް ޙަމާސުން ތައްޔާރުކަމަށެވެ. ނަމަވެސް އަސީރުން ބަދަލުކުރަންޖެހޭނީ އެއްވެސް ޝަރުތަކާ ނުލައިކަމަށް އޭނާ ވިދާޅުވިއެވެ.
އިސްރާއީލުގެ ޖަލުތަކުގައި ފަލަސްޠީނުގެ 5،000އަށްވުރެ ގިނަ ރައްޔިތުން އެބަތިއްބެވެ. 2014ވަނަ އަހަރު އިސްރާއީލުން ޣައްޒާއަށް ޙަމަލާދިންފަހުން ޙަމާސުންވަނީ ޔަހޫދީ ސިފައިންގެ 2 މީހުންގެ ހަށިގަނޑު ޙަވާލުނުކޮށް ހިފަހައްޓައިފައެވެ. ނަމަވެސް އެ މީހުން މަރުވިކަމެއް ޙަމާސުން ކަށަވަރުކޮށްދީފައެއް ނުވެއެވެ. ޣައްޒާއަށް ވަނުމުން ޙަމާސުންވަނީ އިތުރު 2 ޔަހޫދީން ހައްޔަރުކޮށްފައެވެ.