މިއީ ފަހަކަށް އައިސް ޤައުމީ ޓީމުގެ ގޯލްކީޕަރުންގެ މެދުގައި އެންމެ ވާދަވެރިކަން ފެންނަ ފަހަރުކަމަށް ޤައުމީ ޓީމުގެ އެއްނަންބަރު ގޯލްކީޕަރު މުޙައްމަދު ފައިސަލް ބުނެފިއެވެ.
ފީފާ ވަރލްޑް ކަޕް އަދި އޭޝިއަން ކަޕްގެ ޖޮއިންޓް ކޮލިފައިންގައި ރާއްޖެ އަންނަ މަހުގެ 3ވަނަ ދުވަހު ނިކުންނާނީ ޗައިނާއާއި ދެކޮޅަށް. އޭގެ ފަހުން ޖޫން ހަތެއްގައި ސީރީއާއި ދެކޮޅަށް ނިކުންނައިރު ގްރޫޕް ފަހު މެޗުގައި ނިކުންނާނީ ޖޫން 15ގައި ގުއާމާއި ދެކޮޅަށެވެ.
މިފަހަރު އެކުލަވާލި ގައުމީ ޓީމުގައި އެންމެ ފާހަގަކޮށްލެވެނީ ކީޕަރުންނެވެ. މިގޮތުން ފުރަތަމަ ޝޯޓްލިސްޓުކުރި ފަސް ކީޕަރުންނަކީވެސް ލީގުގައި މިހާތަނަށް ކުޅުނު ގިނަ މެޗުތަކުގައި ކުޅެފައިވާ ކީޕަރުންނެވެ. އެއީ ވެލެންސިޔާގެ މުހައްމަދު ފައިސަލް، ވެލެންސިޔާގެ މުހައްމަދު ޝާފީއު (ޗެކް) މާޒިޔާގެ ކީޕަރު ހުސައިން ޝަރީފް އަދި ސީނިއާ ޓީމުން އަލަށް ޖާގަ ހޯދި ކީޕަރު، ޔުނައިޓެޑް ވިކްޓަރީ ޢަލީ ނާޖިހްއެވެ.
ޤައުމީ ޓީމުގެ އެއްނަންބަރު ކީޕަރު މުޙައްމަދު ފައިސަލް ބުނީ މިއީ ފަހަކަށް އައިސް ކީޕަރުންގެ މެދުގައި އެންމެ ވާދަވެރިކަން ބޮޑު ފަހަރުކަމަށާއި، އެއީ ލިބޭ ބޮޑު ހިތްހަމަޖެހުމެއްކަމަށެވެ. ސްކޮޑުގައި ހިމެނޭ ކޮންމެ ކީޕަރެއްވެސް ލީގުގައި ގިނަ މެޗުތަކެއް ކުޅެފައިވުމުން ކީޕަރުންގެ ފެންވަރުވެސް ރަނގަޅުވަމުން އަންނަތަން ފެންނަކަމަށް އޭނާ ބުންޏެވެ.
ވަރލްޑްކަޕާއި އޭޝިއަން ކަޕްގެ ޖޮއިންޓް ކޮލިފައިންގެ ގްރޫޕް ސްޓޭޖުގެ ފަހު ތިން މެޗަށް ތައްޔާރުވުމަށް ޤައުމީ ޓީމު މިވަގުތު ތަމްރީން ހަދަމުން އަންނީ ދުބާއީގައެވެ. ޤައުމީ ޓީމް ދުބާއީއަށް އައީ މިމަހުގެ ބާވީސްވަނަ ދުވަހުއެވެ.
"އަސްލު މިފަހަރު ކީޕަރުންގެ ފެންވަރު ވަރަށް ތަފާތުކަން ފާހަގަވޭ، ލީގުގައި ގިނަ މެޗުތަކެއް ކުޅެފައިތިބި ކީޕަރުންވީމަ އެކަން ވަރަށް ބޮޑަށް އެބަފެނޭ. ދިވެހި ކީޕަރުންނަށް ޗާންސް ލިބެންޏާ ޕާފޯމް ކުރާނެކަން މީގެއިން އިނގެނީ" ކީރަރު ފައިސަލް ބުންޏެވެ.