ހުޅުމާލޭ ސާފުކުރުމަށް ކުރިއަށްގެންދާ ޕްރޮގްރާމްގައި، 10 ދުވަހުގެތެރޭގައި 50ޓަނަށްވުރެ ގިނަ ކުނި ނަގައިފިއެވެ. މި ޕްރޮގްރާމަކީ ހުޅުމާލެއަކީ ސާފު، ރައްކާތެރި ތަނަކަށް ހެދުމަށް ކުރިއަށްގެންދާ ޕްރޮގްރާމެކެވެ.
ހުޅުމާލޭ ސާފުކުރުރުމަށް ފަށާފައިވާ ޕްރޮގްރާމަކީ ހުޅުމާލޭ ނެއިބަހުޑްތަކާ، އާއްމުކޮށް މީހުން އެއްވެއުޅޭ ސަރަޙައްދުތައް ސާފުކުރުމަށް ފަށާފައިވާ މަސައްކަތެކެވެ. ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ވިދާޅުވީ މި ޕްރޮގްރާމްގެ އެންމެ ބޮޑު ބޭނުމަކީ ހުޅުމާލޭގަ ދިރިއުޅޭ މީހުންނާއި، ހުޅުމާލެއަށް ޒިޔާރަތްކުރާ މީހުންނަށް ހުޅުމާލެއަކީ ސާފު ސިއްޙީ ގޮތުން ރައްކާތެރި ތަނަކަށް ހަދައިދިނުންކަމަށެވެ.
މިޕްރޮގްރާމް ފަށައިގެން ވޭތުވެދިޔަ 10 ދުވަހުގެތެރޭގައި 54 ޓަނުގެ ކުނި ނަގާފައިވާ ކަމަށް އެޗްޑީސީން ބުނެއެވެ. މީގެތެރޭގައި ގިނައިން ހިމެނެނީ ގޭގެއިން ނެރެ އެކި ތަންތަނަށް ޖަމާކޮށްފައިވާ ކުނީގެ ބާވަތްތަކެވެ. އެގޮތުން އެކި ސަރަޙައްދުތަކަށް ޖަމާކޮށްފައިވާ ހަލާކުވެފައި ހުންނަ ފަރުނީޗަރާ އުނދުނާއި އެހެނިހެން ސާމާނު ހިމެނެއެވެ.
HDCs cleaning team has collected over 54 tonnes of waste within last 10 days. We urge the public to refrain from littering & to use services provided by WAMCO to properly dispose household waste.
— HDC (@hdcmaldives) May 30, 2021
Let’s take personal responsibility in maintaining the cleanliness of our roads. pic.twitter.com/6MBgnFpqoc
އެޗްޑީސީންވަނީ ހުޅުމާލެއަކީ ސާފު ތަނެއްގެ ގޮތުގައި ބޭއްވުމަށް އެންމެންގެ އެއްބާރުލުން ބޭނުންވާކަމަށް ބުނެފައެވެ. ހުޅުމާލޭގައި ކުނި އުކާލުމުގެ ޚިދުމަތްދެނީ ވެމްކޯއިންނެވެ. ބަދިގެއިން އުކާލާ ކުނީގެ އިތުރަށް، ގޭގެއިން އުކާލާ ބޮޑެތި ކުނި އުކާލުމުގެ ޚިދުމަތްވެސް ވެމްކޯއިން ދެއެވެ. ހުޅުމާލޭގައި ދިރިއުޅޭ ހުރިހާ ފަރާތްތަކުންވެސް މިޚިދުމަތްތަކުގެ ބޭނުން ހިފާ، ފްލެޓްތަކާ މަގުތަކަށް ކުނި ޖަމާކޮށްފައި ނުބެހެއްޓުމަށް އެޗްޑީސީން ދަނީ އެދެމުންނެވެ. އަދި މަގުމައްޗަށް ކުނި އެޅުމުގެ ބަދަލުގައި، މަގުތަކާއި އާއްމު ތަންތަނުގައި ހުންނަ ޑަސްބިން ބޭނުންކުރުމަށް އަހުލުވެރިވުމަށް ދަނީ އެދެމުންނެވެ.
ހުޅުމާލެއަކީ ސާފު ތަނަކަށް ހެދުމަށް އެޗްޑީސީންދަނީ ގިނަ މަސައްކަތްތަކެއް ކުރަމުންނެވެ. އެގޮތުން ކޮންމެ ދުވަހަކު ގޭގެއިން އުކާލާ ކުނި ވެމްކޯގެ އެހީގަ ނެގުމާއި، މަގުތައް ކުނި ކަހާ ސާފުކޮށް ބެލެހެއްޓުމާއި ގޮނޑުދޮށްތައް ސާފުކުރުމަށް ކުރިއަށްގެންދާ އެކި ޕްރޮގްރާމްތައްވެސް ހިމެނެއެވެ. އަދި ނެއިބަހުޑްތަކާއި ޕާކުތައް ސާފުކުރުމަކީވެސް ސިލްސިލާކޮށް ގެންދާ މަސައްކަތެކެވެ.
ކުނީގެ މައްސަލަ ކުޑަކުރުމަށް، އެއްފަހަރު ބޭނުންކޮށްފަ އުކާލާ ކުނި މަދުކުރުމަށްވެސް އެޗްޑީސީންދަނީ ބާރުއަޅަމުންނެވެ.