ރިޔާސީ 4ވަނަ ދަޢުރަކަށް ސޫރިޔާގެ ރައީސް ބައްޝާރުލް އަސަދު އިންތިޚާބުވެވަޑައިގެންފިއެވެ. އިތުރު ދަޢުރަކަށް ބައްޝާރު އިންތިޚާބުވެވަޑައިގަތީ މެއި މަހުގެ 26ވަނަ ދުވަހު ބޭއްވި ރިޔާސީ އިންތިޚާބުގެ ވޯޓުގެ 95.1 އިންސައްތަ ކާމިޔާބުކުރައްވައިގެންނެވެ. އެއާއެކު ވެރިކަމުގައި އިތުރު 7 އަހަރު ދެމިހުރުމުގެ ފުރުޞަތުވަނީ އޭނާ ލިބިވަޑައިގެންފައެވެ.
ރިޔާސީ އިންތިޚާބުގައި ވޯޓުލުމުގެ ހައްޤު ސޫރިޔާގެ 18 މިލިޔަނަށްވުރެ ގިނަ ރައްޔިތުންނަށް ލިބިފައިވެއެވެ. އޭގެ ތެރެއިން ވޯޓުލާފައިވަނީ 78 އިންސައްތަ މީހުންނެވެ. އެއީ ގާތްގަނޑަކަށް 14 މިލިޔަނެއްހާ ރައްޔިތުންނެވެ. ސޫރިޔާގެ ސަރުކާރުން ބުނީ ފާއިތުވި 10 އަހަރު ދުވަހު ދާޚިލީ ހަނގުރާމައެއްގެ ތެރޭގައި ސޫރިޔާ އޮތް ނަމަވެސް ހަރުދަނާކަމާއެކު އެ ޤައުމު ހިނގަމުންދާކަން އިންތިޚާބުން ދައްކުވައިދިންކަމަށެވެ.
ފާއިތުވި 50 އަހަރު ސޫރިޔާގައި ވެރިކަންކޮށްފައިވަނީ ބައްޝާރު ނިޞްބަތްވަޑައިގަންނަވާ ސޫރިޔާގެ ބާތު ޕާޓީންނެވެ. ސޫރިޔާގެ ރައީސްގެ މަޤާމަށް ބައްޝާރު ޢައްޔަނުކޮށްފައިވަނީ 1979ވަނަ އަހަރުން ފެށިގެން އެ ޤައުމުގައި ވެރިކަންކުރަމުންދިޔަ އޭނާގެ ބައްޕާފުޅު ޙާފިޒު އަލްއަސަދު އަވަހާރަވުމުން 2000ވަނަ އަހަރުގެ ތެރޭގައެވެ.
ސޫރިޔާގައި އިންތިޚާބު ބާއްވާފައިވަނީ އިންތިޚާބުގައި ބައިވެރިވުމުގެ ފުރުޞަތުތައް ވަރަށް ބޮޑަށް ހަނިކުރުމަށްފަހުއެވެ. އެގޮތުން ސޫރިޔާގެ ވެރިކަމަށް ކުރިމަތިލުމުގެ ޝަރުތުތަކުގެ ތެރޭގައި ފާއިތުވި 10 އަހަރު ސޫރިޔާގައި ދިރިއުޅެފައިވުން ހިމެނުމުން އެކި ސަބަބުތަކާހުރެ ބޭރު ޤައުމުތަކުގައި ތިބި އިދިކޮޅު ގިނަ ސިޔާސީވެރިންނަށް އިންތިޚާބުގައި ވާދަކުރުމުގެ ފުރުޞަތު ލިބިފައެއް ނުވެއެވެ. ބައްޝާރާ ދެކޮޅަށް ވާދަކުރައްވާފައިވަނީ އެންމެ ދެ ބޭފުޅުންނެވެ. ސޫރިޔާގެ އިދިކޮޅު ސިޔާސީވެރިންނާއި ވިލާތުގެ އިއްތިޙާދުންނާއި އެމެރިކާއިން ޤަބޫލުކުރާގޮތުގައި އިންތިޚާބު ބޭއްވީ ބައްޝާރަށް އިތުރު ދަޢުރެއް ޔަޤީންކުރުމުގެ މަޤްޞަދުގައެވެ. އަދި އެ އިންތިޚާބަކީ މިނިވަން އަދި އިންސާފުވެރި އިންތިޚާބެއްކަމަކަށް ޤަބޫލުނުކުރާކަމަށް އެ ފަރާތްތަކުންވަނީ ބުނެފައެވެ.
އިންތިޚާބު ކާމިޔާބު ކުރެއްވުމަށްފަހު ބައްޝާރު ވިދާޅުވީ ޤައުމީ ވާޖިބެއްގެ ގޮތުގައި ދެކި ވޯޓުލުމުގައި ބައިވެރިވި ހުރިހާ ރައްޔިތުންނަށް ޝުކުރު އަދާކުރައްވައިކަމަށެވެ. ސޫރިޔާގެ ކުޑަކުދިންނާއި ޒުވާނުންގެ މުސްތަޤްބަލަށްޓަކައި ޤައުމު އާރާސްތުކޮށް ފަހި ދިރިއުޅުމެއްގެ އުންމީދު އައުކޮށްދިނުމަށް މަސައްކަތްކުރައްވާނެކަމަށް އޭނާ ވިދާޅުވިއެވެ.