ޔޫރޯ 2020 އަށް ފަހު ޖަރުމަނުވިލާތުގެ ޤައުމީ ފުޓްބޯޅަ ޓީމްގެ ކޯޗްކަމާއި ބަޔާން މިޔުނިކަށް މިސީޒަންގައި ބުންޑަސްލީގާ ކާމިޔާބުކޮށްދިން ކޯޗް ހާންސީ ފްލިކް ހަވާލުވާކަން އިއުލާންކޮށްފިއެވެ. މިގޮތުން ފްލިކްވަނީ ޖަރުމަނު ފުޓްބޯޅަ އެސޯސިއޭޝަނާއިއެކު 2024 ވަނަ އަހަރުގެ ނިޔަލަށް ޤައުމީ ޓީމްގެ ކޯޗުގެ ގޮތުގައި ހުރުމަށް އެއްބަސްވެ އެއްބަސްވުމުގައި ސޮއިކޮށްފައެވެ.
ޖަރުމަނު ޤައުމީ ޓީމްގެ މިހާރުގެ ކޯޗް ޖޯހިމް ލޯވަނީ މިފަހަރުގެ ޔޫރޯ މުބާރާތަށްފަހު ޤައުމީ ޓީމްގެ ކޯޗްގެ މަގާމުން ވަކިވާކަން ހާމަކޮށްފައެވެ. އެއްބަސްވުމުގައި ސޮއި ކުރުމަށްފަހު ވާހަކަ ދައްކަމުން ފްލިކް ބުނީ އޭނާ މިހިރީ ޤައުމީ ޓީމްގެ ކޯޗުގެ ހައިސިއްޔަތުން މަސައްކަތް ކުރުމަށް ކެތް މަދުވެފައިކަމަށެވެ. އެއީ ޖަރުމަނުގައި މިހާރު ތިބި ހުނަރުވެރި ކުޅުންތެރިން ފެންނާތީ ކަމަށާއި ހާއްސަކޮށް ޒުވާން ހުނަރުވެރިން ވަރަށް ގިނައިން އެބަތިބި ކަމަށެވެ. ޖަރުމަނު ޤައުމީ ޓީމްގެ ޑިރެކްޓަރ އޮލިވަރ ބިއެހޯފް ބުނީ އޭނާގެ ލިސްޓްގެ އެންމެ ކުރީގައި އަބަދުވެސް އޮތީ ފްލިކް ކަމަށާއި އެހެންކަމުން އޭނާ ޤައުމީ ޓީމަށް ގެނެވުމުން ވަރަށް ހިތްހަމަޖެހޭ ކަމަށެވެ.
ފްލިކްވަނީ ބަޔާންގެ މަޤާމް ދޫކޮށްލާކަން މިއަހަރުގެ އެޕްރީލްމަހުގެ ތެރޭގައި ހާމަކޮށްފައެވެ. ބަޔާންގައި ފްލިކް ހޭދަކުރި ދެ އަހަރުގެ ތެރޭގައި އެކްލަބުން ވަނީ ބުންޑަސްލީގާ ދެފަހަރު ކާމިޔާބުކޮށް، ލީގު ކަޕާއި ޗެމްޕިއަންސް ލީގާއި ކްލަބް ވާރލްޑް ކަޕާއި ޔުއޭފާ ސުޕަރ ކަޕް ކާމިޔާބުކޮށްފައެވެ.