އަފްޣާނިސްތާނުގައި ޙަރަކާތްތެރިވާ ބޭރު ޤައުމުތަކުގެ ޚާރިޖީ މުވައްޒަފުންނަށް ރައްކާތެރި މާޙައުލެއް ޔަޤީންކޮށްދޭނެކަމަށް ހަނގުރާމަވެރި ޠާލިބާން ޖަމާޢަތުން ބުނެފިއެވެ. ޠާލިބާނުން އެހެން ބުނެފައިވަނީ ސަލާމަތީ ކަންބޮޑުވުންތަކުގެ ސަބަބުން އަފްޣާނިސްތާނުގައި ހުންނަ އޮސްޓުރޭލިޔާގެ އެންބަސީ ބަންދުކުރަން ނިންމުމުންނެވެ.
ޠާލިބާނު ޖަމާޢަތުން ބުނީ އަފްޣާނިސްތާނުގައި ޙަރަކާތްތެރިވާ ހުރިހާ ޚާރިޖީ މުވައްޒަފުންނާއި އިންސާނީ ޚިދުމަތްތެރިންނަށް އެ ޖަމާޢަތުގެ ފަރާތުން އެއްވެސް ނުރައްކަލެއް ނޯންނާނެކަމަށެވެ. އަދި އެފަދަ ފަރާތްތަކުގެ މަސައްކަތްތައް ކުރުމަށް ރައްކާތެރި މާޙައުލެއް ޔަޤީންކޮށްދޭނެކަމަށެވެ.
އެމެރިކާގެ ކުރީގެ ރައީސް ޑޮނަލްޑު ޓުރަންޕުގެ ސަރުކާރުންވަނީ ޠާލިބާނުންނާއެކު ޞުލްޙައިގެ އެއްބަސްވުމެއްގައި މިދިޔަ އަހަރުގެ ފެބްރުއަރީ މަހުގެ ތެރޭގައި ސޮއިކޮށްފައެވެ. އެ އެއްބަސްވުމުގެ ދަށުން އަންނަ މެއި މަހުގެ 1ވަނަ ދުވަހުގެ ކުރިން އަފްޣާނިސްތާނުގައި ތިބި އެމެރިކާގެ ސިފައިން ބާލަން ޖެހެއެވެ. އެ އެއްބަސްވުމުގެ ދަށުން ފާއިތުވި އަހަރުގެ ތެރޭގައި އަފްޣާނިސްތާނުގައި ތިބި އެމެރިކާގެ ގިނަ ޢަދަދެއްގެ ސިފައިންވަނީ އަނބުރާ ޤައުމަށް ގެންގޮސްފައެވެ. ނަމަވެސް 2،500އެއްހާ އެމެރިކާގެ ސިފައިން އަދިވެސް އަފްޣާނިސްތާނުގައި އެބަ ތިއްބެވެ. ސެޕްޓެމްބަރު މަހުގެ 11ވަނަ ދުވަހުގެ ކުރިން އަފްޣަނިސްތާނުގައި ތިބި އެމެރިކާގެ ސިފައިން އަނބުރާ ގެންދަވާނެކަމަށް އެމެރިކާގެ މިހާރުގެ ރައީސް ޖޯ ބައިޑަންވަނީ އިޢުލާނުކުރައްވައިފައެވެ. އަފްޣާނިސްތާނުގައި ތިބި އެމެރިކާގެ ސިފައިން އަނބުރާ ޤައުމަށް ދިޔުމުގެ މަސައްކަތް އަދިވެސް ދަނީ ކުރިޔަށެވެ.
އެމެރިކާގެ ސިފައިން އަފްޣާނިސްތާނުން ބޭލުމުން އެ ޤައުމުގެ މަޝްރަހު ބަދަލުވާނެ ގޮތާމެދުވަނީ ސުވާލު އުފެދިފައެވެ. އެމެރިކާގެ އެހީތެރިކަމާއެކު އަފްޣާނިސްތާނުގެ ސަރުކާރާއި އަސްކަރިއްޔާ ވަރުގަދަކުރުމަށް ގިނަ މަސައްކަތްތަކެއް ފާއިތުވި 20 އަހަރުގެ ތެރޭގައި ކުރި ނަމަވެސް އެ ޤައުމުގެ ސަރުކާރު އަދިވެސް އޮތީ ބަލިކަށިކޮށެވެ. އެހެންކަމުން އެމެރިކާގެ ސިފައިން އަފްޣާނިސްތާނުން ފޭބުމުން ޠާލިބާނުންގެ ނުފޫޒު އެ ޤައުމުގައި ވަރަށް ބޮޑަށް އިތުރުވާނެއެވެ.