ފަލަސްޠީނުގެ މިނިވަންކަމަށާއި ފަލަސްޠީނުގެ ރައްޔިތުންގެ ޙައްޤުގައި އެންމެ ބޮޑަށް މަސައްކަތްކުރަމުންދާ ޙަމާސް ޖަމާޢަތަށް އިސްރާއީލުގެ ޙައްދުފަހަނައަޅާފައިވާ ބޮޑުވަޒީރު ބެންޔަމިން ނަތަންޔާހޫ ވަރުގަދަ އިންޒާރެއް ދެއްވައިފިއެވެ.
އިސްރާއީލުން އިސްތިޢުމާރުކޮށްފައިވާ ހުޅަނގު ޤުދުސްގައި އެމެރިކާގެ ޚާރިޖީ ވަޒީރު އެންތޮނީ ބުލިންކެންނާއެކު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނަތަންޔާހޫ ވިދާޅުވީ ޙަމަލާބަދަލުކުރުން ހުއްޓާލުމަށް ވެފައިވާ އެއްބަސްވުމާ ޚިލާފަށް ޙަމާސުން އެއްވެސް ކަމެއްކޮށްފިނަމަ އިސްރާއީލުގެ އަސްކަރީ ފައުޖުތަކުން ވަރުގަދަ ރައްދެއް އެ ޖަމާޢަތާ ދެކޮޅަށް ދޭނެކަމަށެވެ. އޭނާވަނީ އެމެރިކާއިން އިސްރާއީލަށް ދެމުންދާ އެއްބާރުލުމަށާއި އެހީތެރިކަމަށް ވަރަށް ބޮޑަށް ޝުކުރުއަދާކޮށްފައެވެ.
އެއްވެސް ޝަރުތަކާ ނުލައި ޙަމާސާ ޙަމަލާބަދަލުކުރުން ހުއްޓާލުމަށް އިސްރާއީލުން ވެފައިވާ އެއްބަސްވުން ދެމެހެއްޓުމަށް ބާރުއެޅުއްވުމަށް މެދުއިރުމައްޗަށް ވަޑައިގެންފައިވާ ބުލިންކެން ވިދާޅުވީ އޭނާގެ ދަތުރުފުޅުގެ ބޭނުކަމީ އިސްރާއީލުގެ ސަލާމަތް ކަށަވަރުކުރުމާއި ފަލަސްޠީނުގެ ހުޅަނގު އައްސޭރިއާއި ޤުދުސަށް ހަމަޖެހުން ގެނައުމާއި ޣައްޒާއަށް ދިމާވެފައިވާ އިންސާނީ ކާރިޘާއިން އަރައިގަތުމަށް އެހީތެރިކަން ފޯރުކޮށްދިނުމާއި ޣައްޒާ އާރަސްތުކުރުމަށް ކުރެވިދާނެ ކަންކަން ދެނެގަތުމެވެ. އޭނާވަނީ ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ލާއިންސާނީ ބޮޑެތި ޖަރީމާތައް ހުއްޓުވުމުގައި އެމެރިކާގެ ސަރުކާރުން ފަސްޖެހޭތީ ބައިނަލްއަޤްވާމީ މުޖުތަމަޢުން ކިޔަމުންދާ ފާޑުކިޔުންތަކަށްވެސް ރައްދުދެއްވައިފައެވެ. އެގޮތުން އޭނާ ވިދާޅުވީ ފަރުދައިގެ ފުރަގަހުގައި އެމެރިކާއިން އެކަށީގެންވާ ދަޢުރެއް އަދާކުރަމުންދާކަމަށެވެ.
އޭގެ އިތުރުން އެމެރިކާގެ ޚާރިޖީ ވަޒީރުވަނީ ރާމަﷲގައި ފަލަސްޠީނުގެ ރައީސް މަޙްމޫދު ޢައްބާސާ ބައްދަކުރައްވައި އެމެރިކާއިން ފަލަސްތީނުގެ ރައްޔިތުންނަށް އެހީތެރިކަން ފޯރުކޮށްދޭނެކަމަށާއި ޣައްޒާ އާރާސްތުކުރުމުގައި މުހިންމު ދަޢުރެއް އަދާކުރާނެކަމުގެ ޔަޤީންކަން ދެއްވައިފައެވެ. ނަމަވެސް ބައިނަލްއަޤްވާމީ މުޖުތަމަޢުން ދޭން ކަނޑައަޅައި އެހީތެރިކަމުގެ ފައިދާ ޙަމާސަށް ނުހޯދޭނެ ގޮތްތަކެއް ހޯދަންޖެހޭކަމަށް އޭނާ ވިދާޅުވިއެވެ.
ޙަމަލާބަދަލުކުރުން ހުއްޓާލުމަށް ވެފައިވާ އެއްބަސްވުން ދެމެހެއްޓުމަށް ބާރުއެޅުއްވުމަށް މެދުއިރުމައްޗަށް ވަޑައިގެންނެވި ބުލިންކަން ޙަމާސްގެ އެއްވެސް އިސްވެރިއަކާ ބައްދަލެއް ނުކުރައްވާނެއެވެ. އޭގެ ބަދަލުގައި އޭނާ ބައްދަލުކުރެއްވީ ފަލަސްޠީނުގެ ރައީސްގެ ގޮތުގައި ހުޅަނގުން ޤަބޫލުކުރައި ޢައްބާސްގެ ސަރުކާރުގެ އިސްވެރިންނާއެވެ. ޣައްޒާގައި ވެރިކަންކުރާ ޙަމާސް ޖަމާޢަތަކީ ޢައްބާސްގެ ބާރުފޯރައި ޖަމާޢަތެއް ނޫނެވެ. އިސްރާއީލާއި ފަަލަސްޠީނުގެ އިސްވެރިންނާ ބައްދަލުކުރެއްވުމުގެ އިތުރުން ބުލިންކެން އުރުދުންނާއި މިޞްރަށް ވަޑައިގަތުމަށްވެސްވަނީ ހަމަޖެހިފައެވެ.
ޙަމާސާ ދެކޮޅަށް ނަތަންޔާހޫ ވަރުގަދަ އިންޒާރެއް ދެއްވާފައިވަނީ މެއި މަހުގެ 10ވަނަ ދުވަހުން 21ވަނަ ދުވަހަށް އެ ޖަމާޢަތާ ދެކޮޅަށް ކުރި ހަނގުރާމާގައި އިސްރާއީލުގެ ޔަހޫދީ ލަޝްކަރުތަކަށް ބޮޑެތި ނާކާމިޔާބީތަކެއް ލިބިފައިވަނިކޮށެވެ. އެގޮތުން ޙަމާސުން ދިން 4،000އަށްވުރެ ގިނަ ޙަމަލާތަކުގައި ޔަހޫދީންގެ ސިނާޢީ ސަރަޙައްދުތަކަށާއި އިމާރާތްތަކާއި އުޅަނދުތަކަށް ބޮޑެތި ގެއްލުންތަކެއް ލިބިފައިވެއެވެ. އަދި އެ ޙަމަލާތަކުގައި ޔަހޫދީންގެ 12 މީހުން މަރުވެ، 800އެއްހާ މީހުން ޒަޚަމުވެފައިވެއެވެ. އެންމެ ޒަމާނީ ވައިގެ ދިފާޢީ ނިޒާމު ޤާއިމުކޮށްފައިވާ އިސްރާއީލަށް ފާއިތުވި 11 ދުވަހުގެ ތެރޭގައި ޙަމާސުން ދިން ޙަމަލާތަކުގައި 2.5 ބިލިޔަން އެމެރިކާ ޑޮލަރުގެ ގެއްލުމެއް ލިބިފައިވާކަމަށް އެ ޤައުމުގެ ނޫސްތަކުން ބުނެފައިވެއެވެ. އަދި އިސްރާއީލުގެ ބައިނަލްއަޤްވާމީ ވައިގެ ބަނދަރާއި އެތެރޭގެ ދަތުރުފަތުރުކުރުމުގެ ނިޒާމުވެސްވަނީ ހުއްޓުމަކަށް އައިސްފައިވެއެވެ. އޭގެ އިތުރުން ފަހުގެ ތާރީޚެއްގައި އެ ޤައުމުގެ ފައިސާގެ އަގު ދަށަށް ނުދާ މިންވަރަށްވަނީ ދަށަށްގޮސްފައެވެ.
އިސްރާއީލުގެ ޔަހޫދީ ފައުޖުތަކުންވަނީ ޣައްޒާގެ އިމާރާތްތަކަށް ވަރުގަދަ ޢުދުވާނީ ޙަމަލާތަކެއް ދީފައެވެ. އެގޮތުން މީހުންގެ ގެދޮރަށާއި ޞިއްޙީ މަރުކަޒުތަކަށާއި މަދަރުސާތަކަށާއި ވިޔަފާރިތަކަށާއި ކާރުޚާނާތަކަށް ޔަހޫދީންވަނީ ޙަމަލާތައް އަމާޒުކޮށްފައެވެ. އެ ޙަމަލާތަކުގައި ޣައްޒާގެ ޢުމްރާނީ ވަޞީލަތްތަކަށް ބޮޑެތި ގެއްލުންތަކެއް ލިބުމުގެ އިތުރުން 250އަށްވުރެ ގިނަ މީހުން ޝަހީދުވިއެވެ. އޭގެ ތެރޭގައި 66 ކުޑަކުދިންނާއި 39 އަންހެނުންނާއި 17 މުސްކުޅިން ހިމެނެއެވެ. އަދި 1،900އަށްވުރެ ގިނަ މީހުން ޒަޚަމުވެފައިވެއެވެ.
ޙަމަލާބަދަލުކުރުން ހުއްޓާލުމަށް ވެފައިވާ އެއްބަސްވުމާ ޚިލާފަށް ޙަމާސުން އެއްވެސް ކަމެއްކޮށްފިނަމަ ޔަހޫދީ ފައުޖުތަކުން ވަރުގަދަ ރައްދެއް އެ ޖަމާޢަތާ ދެކޮޅަށް ދޭނެކަމަށް ނަތަންޔާހޫ ވިދާޅުވެފައިވަނީ އިސްރާއީލުން އެއްސްވުމާ ޚިލާފަށް ގިނަ ކަންތައްތަކެއް ކުރަމުންދާ ދަނޑިވަޅެއްގައެވެ. ޙަމަލާބަދަލުކުރުން ހުއްޓައިލުމަށް ޙަމާސުން އެއްބަސްވެފައިވަނީ އިރުމަތީ ޤުދުސްގައި ޔަހޫދީން އެއްވެސް ޖަރީމާއެއް ނުހިންގުމަށް ޝަރުތުކޮށްފައެވެ. ޙަމާސުން ބުނެފައިވަނީ ޤުދުސަށް އަތްގަދަކޮށް، ފަލަސްޠީނުގެ ރައްޔިތުންގެ ލޭއޮހޮރުވާނަމަ އަނެއްކާވެސް ޔަހޫދީންނާ ދެކޮޅަށް ވަރުގަދަ ޙަމަލާތަކެއް ދޭން ތައްޔާރަށް ތިބިކަމަށެވެ.