ކުރިއަށް އޮތް 4 ދުވަހުވެސް ރާއްޖެއަށް މޫސުން ގޯސްވާނެކަމަށް ލަފާކުރެވޭތީ ރައްކާތެރިކަމުގެ ފިޔަވަޅުއެޅުމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން އިލްތިމާސްކޮށްފިއެވެ. މޫސުމާބެހޭ ޤައުމީ އިދާރާއިން ލަފާކޮށްފައިވަނީ، ޚާއްސަކޮށް އުތުރާއި މެދުރާއްޖެތެރެއަށް މޫސުން ގޯސްވާނެކަމަށެވެ.
މޫސުން ގޯސްވާ ވަގުތުތަކުގައި އުދައެރުމާއި ރަށްރަށުގަ ފެންބޮޑުވުމާއި ކަނޑުމަތީގެ ޙާދިސާތައްވެސް އިތުރެވާތީ ދުރާލައި ރައްކާތެރިކަމުގެ ފިޔަވަޅުތަށް އެޅުމަށް ނެޝަނަލް ޑިޒާސްޓަރ މެނޭޖްމަންޓް އޮތޯރިޓީންވަނީ އިލްތިމާސްކުރައްވާފައެވެ.
ރައްކާތެރިކަމުގެ ގޮތުން އެޅިދާނެ ފިޔަވަޅުތަކުގެ ތެރޭގައި
- ބޯކޮށް ވާރޭވެހިއްޖެނަމަ ނުވަތަ އުދަ އަރައިފިނަމަ ގޭގެއަށް ފެން ނުވަންނާނެހެން، ގޭގެ ދޮރުމަތީގައި ވެލިބަސްތާފަދަ ތަކެތި ޖެއްސުން
- ފެން ބޮޑުވެ ގެއްލުންވާނެހެން ހުންނަ މުދާ ފެނުގެ އަސަރު ނުކުރާނެފަދަ އުސް ތަންތަނަށް ބަދަލުކުރުން ނުވަތަ ރައްކާތެރި ތަނަކަށް ބަދަލުކުރުން
- ގަދަވައިގެ ސަބަބުން ގޭގެ ފުރާޅު އެއްލާލަފާނެކަމަށް ލަފާކުރެވޭނަމަ ދުރާލައި ވައުފަދަ އެއްޗެއް ބޭނުންކޮށްގެން، ހިފެހެއްޓޭނެހެން އެއްސައި ހަރުކުރުން
- ވައިގަދަވެ އެއްލާލަފާނެ ތަކެތި ބަނދެ ރައްކާތެރިކުރުން
- ބޭނުން ނުކުރާނަމަ ކަރަންޓުން ބޭނުންކުރާ ތަކެތި ނިއްވާލާފައި ބެހެއްޓުން
- ކަނޑުމައްޗަށް ނުކުތުމުގެ ކުރިން މުސުމާބެހޭ މަޢުލޫމާތު ހޯދުން އަދި ސަލާމަތީ ކަންކަމާ މުޢާސަލާތީ ވަސީލަތްތައް ހަމަކުރުން
ރާއްޖެއަށް މިހާރު ކުރަމުންދާ ވިއްސާރައަކީ ހުޅަނގު މޫސުމުގެ ވިއްސާރައެވެ. ހުޅަނގު މޫސުމުގެ ބާރުގަދަވެ ކުރިޔަށް އޮތް 4 ދުވަހު ރާއްޖޭގެ މޫސުން ގޯސްވާނެކަމަށް މެޓުން ލަފާކުރެއެވެ. އެ އިދާރާއިން ވިދާޅުވީ ޚާއްސަކޮށް އުތުރާއި މެދުރާއްޖެތެރޭގައި ވައިގަދެވެ ކަނޑުތައް ވަރަށް ގަދަވާނެކަމަށް ލަފާކުރެވޭކަމަށެވެ.
މެޓް އޮފީހުން ވިދަޅުވީ ރާއްޖޭގެ ހުރިހާ ސަރަހައްދަކަށްވެސް އާއްމު ގޮތެއްގައި ގަޑިއަކު 17 މޭލާއި 27 މޭލާއި ދެމެދުގެ ބާރުމިނުގައި ވައިޖެހޭނެކަމަށް ބެލެވޭކަމަށެވެ. އަދި ވިލާގަނޑުގައި 50 މޭލާއި 60 މޭލާއި ދެމެދުގެ ބާރުމިނުގައި ވައިގަދަވާނެކަމަށް ލަފާކުރެވޭކަމަށްވެސް މޫސުމާއި ބެހޭ ޤައުމީ އިދާރާއިން ވިދާޅުވެއެވެ. މީގެއިތުރުން ބައެއް ރަށްތަކަށް ބޯކޮށް ވާރޭވެހި އުދައިގެ އަސަރުކުރުން އެކަށީގެންވާކަމަށްވެސް މެޓް އޮފީހުން ވިދާޅުވެއެވެ.
ރާއްޖެއާއި ދުރުން ބަންގާޅު ކަނޑުގައި ކޮޅިގަނޑެއް އުފެދިފައިވާކަމަށާއި މި ކޮޅިގަނޑު ކުރިޔަށް އޮތް 24 ގަޑިއިރުގެ ތޭރޭގައި ތޫފާނަކަށް ބަދަލުވުން އެކަށިގެންވާކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ. އެ އިދާރާއިން ވިދާޅުވީ ލަފާކުރެވޭ ގޮތުގައި މި ކޮޅިގަނޑު ޖެހެމުންދަނީ އުތުރު ހުޅަނގު އުތުރަށް ރާއްޖޭއާއި ދުރަށެވެ.
މިމަހުގެ މެދުތެރޭގަ ރާއްޖެއަށް ކުރި ވިއްސާރައިގަވެސް ރަށްރަށް ބޮޑެތި ގެއްލުންތައްވެފަވެއެވެ. ޚާއްސަކޮށް އުދަ އަރައިގެން ގޭގެއާ މުދަލަށް ބޮޑެތި ގެއްލުންތައްވަނީ ވެފައެވެ.