އިނގިރޭސި ވިމެންސް އެފް އޭ ކަޕްގެ ފަސްވަނަ ބުރުގައި ޗެލްސީ ވިމެން އާއި އެވަޓަން ވިމެން ބައްދަލުކުރިމެޗް ޗެލްސީ ކާމިޔާބުކޮށް މިމުބާރާތުގެ ކްއާޓަރ ފައިނަލުން ޖާގަހޯދައިފިއެވެ. ޗެލްސީގެ ދަނޑުގައި ކުޅުނު މިމެޗް އެޓީމް ކާމިޔާބުކުރީ 3 ލަނޑު ސުންލަނޑުންނެވެ.
މިއީ ޔުއޭފާ ވިމެންސް ޗެމްޕިއަންސް ލީގުގެ ފައިނަލުގައި ބާސެލޯނާ އަތުން 4 ލަނޑު ސުންލަނޑުން ބަލިވިފަހުން ޗެލްސީ ވިމެން ކުޅުނު ފުރަތަމަ މެޗެވެ. މިމެޗްގެ ފުރަތަމަ ލަނޑު މެޗްގެ 28 ވަނަ މިނެޓްގައި ޗެލްސީއަށް ޖަހާދިނީ ގޫރޯ ރެއިޓެންއެވެ. އަދި ދެވަނަ ލަނޑު މެޗް ނިމެން 15 މިނެޓަށް ވެފައިވަނިކޮށް ޖަހާދިނީ ސޭމް ކާރއެވެ. އަދި ފަހު ލަނޑު މެޗްގެ 86 ވަނަ މިނެޓްގައި ޖަހާދިނީ ޑްރޫ ސްޕެންސަރއެވެ. މިމެޗްގައި މީގެއިތުރުންވެސް ލަނޑު ޖަހާނެ ރަނގަޅު ފުރުސަތު ޗެލްސީއަށް ލިބިގެން ގޮސްފައިވެއެވެ. އަދި ފުރަތަމަ ހާފްގައި ބެތަނީ އިންގްލަންޑް ޖެހި ގޯލެއް އޮފް ސައިޑް ކަމަށް ދެއްކި އިރު މިލީ ބްރައިޓް ފޮނުވާލި ހަމަލާއެއް ވަނީ ގޯލްގެ ދަނޑިއަށް އަމާޒުވެފައެވެ. މިދިޔަ ސީޒަންގައި އެފް އޭ ކަޕްގެ ފައިނަލްގައި ވާދަކުރި އެވަޓަންއަށް މިމެޗްގައި މާރަނގަޅަށް ކުޅެވޭގޮތެއް ނުވިއެވެ. މިމެޗްގައި އެވަޓަން ޓީމްގެ ކެޕްޓަންކަން ކުރީ ފުޓްބޯޅައިން ރިޓަޔަރކުރުމުގެ ކުރިން ފަހު މެޗް ކުޅެމުންދިޔަ ނޯވޭގެ ބައިނަލްއަޤްވާމީ ކުޅުންތެރިޔާ އިންގްރިޑް މޯއި ވޯލްޑްއެވެ.