އެން.ބީ.އޭ. ބާސްކެޓްބޯޅަ މުބާރާތުގައި ބްރޫކްލިން ނެޓްސް އާއި ޝިކާގޯ ބުލްސް ބައްދަލުކުރިމެޗް ނެޓްސް ކާމިޔާބުކޮށްފިއެވެ. މިމެޗް ނެޓްސް ކާމިޔާބުކުރީ 105 ޕޮއިންޓް 91 ޕޮއިންޓުންނެވެ.
ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ނެޓްސްގެ ބްރޫސް ބްރައުން ވަނީ 16 ޕޮއިންޓް ހޯދައިދީ 12 ރީބައުންޑް ނަގާފައެވެ. އަދި ބުލްސްގެ ޓަޑެއުސް ޔަންގް ވަނީ 19 ޕޮއިންޓް ހޯދައިދީ 13 ރީބައުންޑް ނަގާފައެވެ.
މިމުބާރާތުގައި ލޮސް އެންޖަލިސް ލޭކަރސް އާއި އިންޑިއާނާ ޕޭސަރސް ބައްދަލުކުރިމެޗް 122 ޕޮއިންޓް 115 ޕޮއިންޓުން ކާމިޔާބުކުރީ ލޭކަރސްއެވެ. މިމެޗްގައި ލޭކަރސްގެ އެންތަނީ ޑޭވިސްވަނީ 28 ޕޮއިންޓް ހޯދައިދީ 10 ރީބައުންޑް ނަގާފައެވެ. އަދި ޕޭސަރސްގެ ކެރިސް ލެވަރޓް ވަނީ 28 ޕޮއިންޓް ހޯދައިދީ 12 އެސިސްޓް ކޮށްފައެވެ. މީގެއިތުރުން ފީނިކްސް ސަންސް އާއި ސެން އެންޓޯނިއޯ ސްޕަރސް ބައްދަލުކުރިމެޗް 140 ޕޮއިންޓް 103 ޕޮއިންޓުން ކާމިޔާބުކުރީ ސަންސްއެވެ. މިއީ މިސީޒަންގައި ސަންސް ކާމިޔާބުކުރި 50 ވަނަ މެޗެވެ. މިމެޗްގައި ސަންސްގެ ޑެވިން ބޫކަރވަނީ 27 ޕޮއިންޓް ހޯދައިދީފައެވެ. އަދި ސްޕަރސްގެ ޑްރޫ އިއުބޭންކްސް ވަނީ 15 ޕޮއިންޓް ހޯދައިދީ 11 ރީބައުންޑް ނަގާފައެވެ.
މިމުބާރާތުގައި ކުޅުނު އެހެން މެޗްތަކަށް ބަލާލާއިރު ނިއުޔޯކް ނިކްސް އާއި ޗާލޮޓް ހޯނެޓްސް ބައްދަލުކުރިމެޗް 118 ޕޮއިންޓް 109 ޕޮއިންޓުން ނިކްސް ކާމިޔާބުކުރިއިރު ބޮސްޓަން ސެލްޓިކްސް އާއި މިނެސޯޓާ ޓިމްބަރވުލްވްސް ބައްދަލުކުރިމެޗް 124 ޕޮއިންޓް 108 ޕޮއިންޓުން ކާމިޔާބުކުރީ ސެލްޓިކްސްއެވެ. އަދި މިލްވައުކީ ބަކްސް އާއި މައޭމީ ހީޓް ބައްދަލުކުރިމެޗް 122 ޕޮއިންޓް 108 ޕޮއިންޓުން ކާމިޔާބުކުރީ ބަކްސްއެވެ.