އަރަބި ކަނޑުގައި އުފެދުނު ކޮޅިގަނޑު ޠޫފާނަކަށް ބަދަލުވިނަމަވެސް އޭގެ ނުރައްކާ ރާއްޖެއަށް ނުކުރާނެކަމަށް މޫސުމާބެހޭ ޤައުމީ ޢިދާރާއިން ހާމަކޮށްފިއެވެ.
މޫސުމާއިބެހޭ ޤައުމީ އިދާރާއިން ވިދާޅުވީ، އިރުދެކުނު އަރަބިކަނޑުގައި އުފެދުނު ކޮޅިގަނޑުގެ ބާރުގަދަވެ މިހާރު ތޫފާނަކަށް ބަދަލުވެފައިވާކަމަށެވެ.
"ޓައުޓޭ"ގެ ނަމުން ނަންދީފައިވާ މިޠޫފާން މިހާރު ހުރީ ހއ.ތުރާކުނުގެ އުތުރުން ގާތްގަނޑަކަށް 400 މޭލު ދުރުގައިކަމަށާއި، ތޫފާނު ދަތުރުކުރަމުން ދާނީ އުތުރު ހުޅަނގުއުތުރަށް ރާއްޖެއާ ދުރަށް ކަމަށް އެޢިދާރާއިން ވިދާޅުވިއެވެ.
މިއާއެކު މި ތޫފާނާ ގުޅިގެން ރާއްޖޭގެ ސަރަޙައްދަށް ޖެހެމުންދާ ގަދަވަޔާއި ވިއްސާރަ ރެއިން ފެށިގެން މަޑުވާންފަށާފައިވާކަމަށްވެސް މޫސުމާއި ބެހޭ ޤައުމީ ޢިދާރާއިން ވިދާޅުވިއެވެ.
އެހެން ނަމަވެސް ހުޅަނގުމޫސުމުގެ ސަބަބުން ކުރިއަށްއޮތް 24 ގަޑިއިރުވެސް ރާއްޖޭގެ އެކި ހިސާބުތަކަށް ވިއްސާރަ ކުރާނެކަމަށް މެޓް އޮފީހުން ވަނީ ވިދާޅުވެފައެވެ. އެގޮތުން އެޢިދާރާއިން މިހާރުވެސް ވަނީ ބައެއް ސަރަޙައްދުތަކަށް އެލާޓްތައް ނެެރެފައެވެ.
މޫސުމާ ބެހޭ ޤައުމީ ޢިދާރާއިން ވިދާޅުވީ ރާއްޖެއަށް މިހާރު ކުރަމުންދާ ވިއްސާރާއިގައި ވޭތުވެދިޔަ 24 ގަޑިއިރު އެންމެ ބޯކޮށް ވާރޭވެހިފައިވަނީ ދެކުނު ރަށްރަށަށްކަމަށެވެ. އެގޮތުން އެންމެ ގިނައިން ވާރޭވެހުނު އައްޑޫ ސިޓީ ހުޅުމީދޫއަށް 118 މިލިލީޓަރުގެ ވާރޭ ވެހިފައިވާއިރު ސ. ގަމާއި، ގދ. ކާޑެއްދޫ އަދި ގއ. ގެމަނަފުއްޓަށްވަނީ 90 މިލިލީޓަރަށްވުރެ ގިނައިން ވާރޭވެހިފައެވެ. އެންމެ މަދުން ވާރޭ ވެހިފައިވާކަމަށް ރެކޯޑު ކުރެވިފައިވަނީ ލ. ކައްދޫއަށެވެ.
އަރަބި ކަނޑުގައި އުފެދުނު ކޮޅިގަނޑުގެ އަސަރު ރާއްޖެއަށްކޮށް، މިދިޔަ 3 ދުވަސްތެރޭގައި އެކި ރަށްރަށަށް ވަނީ ވިއްސާރައިގެ ސަބަބުން އެކިވަރުގެ ގެއްލުންތަކެއްވެފައެވެ.
ޚާއްސަކޮށް އުތުރުގެ ބައެއް ރަށްރަށަށް ރާޅުއަރާ، ގެއްލުންތަކެއްވެފައިވާއިރު، ދެކުނާއި އެނޫންވެސް ސަރަހައްދުތަކުގެ ރަށްރަށަށް ބޯކޮށް ވާރޭވެހި ފެންބޮޑުވުމުގެ ސަބަބުން ވަނީ ތަފާތު ގެއްލުންތައް ކުރިމަތިވެފައެވެ.