އެމްއެމްޕީއާރުސީ ބޮޑު ޚިޔާނާތުގެ ފައިސާ ލިބުނު މީހުންގެ ތެރެއިން ދައުލަތުގެ އެކި މަޤާމުތަކުގައި ތިއްބެވި މީހުން މަޤާމުތަކުން ވަކިކުރުމަށް ރައްޔިތުންގެ މަޖިލީހުގެ މިމައްސަލަ ދިސާރާކުރާ ސަބް ކޮމިޓީން ފާސްކޮށްފިއެވެ.
މިމައްސަލަ މިގޮތަށް ފާސްކުރުމަށް ހުށަހަޅުއްވީ މަޖިލިސް ނާއިބް ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲއެވެ. ކޮމިޓީން މިހުށަހެޅުން ފާސްކޮށްފައިވަނީ ރޭގެ ބައްދަލުވުމުގައި ބައިވެރިވެ ވަޑައިގެންނެވި މެމްބަރުންގެ އިއްތިފާގުންނެވެ. މިހުށަހެޅުން ސަބް ކޮމިޓީން ފާސްވުމުން، މިމައްސަލަ ބަލާ މައި ކޮމިޓީއަށް މައްސަލަ ފޮނުވޭނެއެވެ. އަދި މައިކޮމިޓީން ނިންމާ ނިންމުން މަޖިލިސް ތަޅުމަށް ފޮނުވާނެއެވެ. މިމައްސަލަ ބަލަމުންދަނީ ރައްޔިތުންގެ މަޖިލީހުގެ ޖުޑީޝަރީ ކޮމިޓީއާއި، ސަލާމަތީ ހިދުމަތްތަކާބެހޭ ކޮމިޓީގެ ޖޮއިންޓް ކޮމިޓީއަކުންނެވެ.
އެމްއެމްޕީއާރުސީގެ ބޮޑު ޚިޔާނާތުގެ ފައިސާގައި ޖެހުނުކަމަށް ބުނާ މީހުންގެ ލިސްޓު ރައްޔިތުންގެ މަޖިލީހުގެ އެދިވަޑައިގަތުމަށް ތަހުގީގީ އިދާރާތަކުން ވަނީ ފޮނުވާފައެވެ. އެ ލިސްޓްގައި އެމްއެމްޕީއާރުސީގެ ޚިޔާނާތުގެ ފައިސާ ލިބުނު 281 މީހެއްގެ ނަން ވަނީ ހިމަނާފައެވެ.
އެމްއެމްޕީއާރުސީގެ ޚިޔާނާތުގެ މައްސަލަ ބެލުމަށް ހޯމަ ދުވަހުގެރޭ ބޭއްވި ކޮމިޓީގެ ބައްދަލުވުމުގައި މަޖިލީހުގެ ނާއިބު ރައީސް އީވާ ޢަބްދުﷲ ވިދާޅުވީ، ޚިޔާނާތުގެ ފައިސާ ލިބުނު މީހުންގެ ލިސްޓުން މިވަގުތު އެންމެ އިސްކަމެއް ދޭންޖެހޭނީ ސަރުކާރުގެ މަޤާމުތަކުގައި މިހާރު ތިއްބެވި މީހުންނަށްކަމަށާއި، ސަބަބަކީ އެމީހުން މަޤާމުގައި ތިބެގެން ތަހުގީގަށް ނުފޫޒް ފޯރުވުމާއި، ދައުލަތުގެ މިސްރާބު ބަދަލުކުރުމަށް މަސައްކަތްކުރުމުގެ ފުރުޞަތު އޮތުމުންކަމަށެވެ.
އެހެންކަމުން ތަހުގީގީ އިދާރާތަކަށް އެމީހުންގެ މައްޗަށް ދައުވާކުރެވޭނެ ވަރަށް ހެކި ނެތްނަމަވެސް އަދި ދައުވާ ސާބިތު ނުކުރެވުނުނަމަވެސް އެމީހުން ސަރުކާރުގެ މަޤާމުތަކުން ދުރުކުރުމަށް މަޖިލީހުގެ ނާއިބު ރައީސް އަދި ގަލޮޅު އުތުރު ދާއިރާގެ މެންބަރު އީވާ ޢަބްދުﷲ ހުށައެޅުއްވިއެވެ.
އެމްއެމްޕީއާރުސީގެ ޚިޔާނާތުގެ ފައިސާ ލިބުނުކަމަށް ބުނާ މީހުންގެ ލިސްޓް ކޮމިޓީން ވަނީ ސިއްރުކޮށްފައެވެ. އެ ލިސްޓް ޢާންމު ނުކުރުމަށް މެންބަރުން ދަނީ ބާރުއަޅަމުންނެވެ. ނަމަވެސް ފައިސާ ލިބުނުކަމަށް ބުނާމީހުންގެ ލިސްޓެއް ވަނީ ލީކް ވެފައެވެ. ނަމަވެސް ކޮމިޓީން ވަނީ ލީކް ވެފައިވަނީ ކޮމިޓީއަށް ލިބިފައިވާ ލިސްޓް ނޫންކަމަށް ބުނެފައެވެ. ޚިޔާނާތުގެ ފައިސާ ލިބުނު މީހުންގެ ލިސްޓް މަޖިލީހުން މިހާރު ވަނީ ޢާންމުކުރުމަށް ނިންމާފައެވެ. އެގޮތުން މަޖިލީހުގެ ވެބްސައިޓްގައި ޝާޢިޢުކުރަނެކަމަށް ކޮމިޓީން ބުންޏެވެ.