ރާއްޖޭގެ މޫސޫން ގޯސްވެ ވިއްސާރަވުމާ ގުޅިގެން މިއަދު ހަވީރު 5 ޖެހުމާއަމަށް ރާއްޖޭގެ އެންމެ ދެކުނުގެ 4 އަތޮޅަށް "ޔެލޯ އެލާޓް" ނުވަތަ ރީނދޫ ސަމާލު ނެރެފިއެވެ.
މޫސުމާއިބެހޭ ޤައުމީ ޢިދާރާއިން ވިދާޅުވީ ބޯކޮށް ވާރޭ ވެހުމާއި ގުގުރުމާއެކު ކަނޑުތައް ގަދަވާނެކަމަށް ލަފާކުރެވޭތީ ލ.އަތޮޅުން ފެށިގެން އައްޑޫ ސިޓީއާ ހަމައަށް ރީނދޫ ސަމާލު ނެރެފައިވާކަމަށެވެ. މިއަދު 13:00އިން 17:00އާ ހަމައަށް އެސަރަހައްދަށް އެލާޓް ނެރެފައިވާއިރު އެހިސާބަށް މިވަގުތުތަކުގެ ތެރޭގައި ގަޑިއަކު 45 މޭލަށް ވައިގަދަވެ ކަނޑުތައް ގަދަވާނެކަމަށް މެޓް އޮފީހުން ވިދާޅުވިއެވެ.
ކުރިއަށްއޮތް 5 ދުވަހު ރާއްޖޭގެ ބޮޑުބަޔަކަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާއިން ވިދާޅުވެފައިވާއިރު، ދެކުނުގެ ސަރަހައްދުތަކުންގެ އިތުރުން އުތުރާއި މެދުތެރޭގެ އަތޮޅުތަކަށްވެސް މިހާރުދަނީ ވިއްސާރަކުރަމުންނެވެ.
މިއާއެކު މެޓް އޮފީހުން ވަނީ މިއަދު 13:00އިން ފެށިގެން އިރުއޮއްސި 18:00އާ ހަމައަށް ރ.އަތޮޅުން ފެށިގެން ތ.އަތޮޅާހަމައަށް ވައިޓް އެލާޓްވެސް ނެރެފައެވެ. މިވަގުތުގައި އެސަރަހައްދުތަކަށްވެސް ބޯކޮށް ވާރޭވެހި ގުގުރުމާއެކު ވިލާގަނޑުގައި ގަޑިއަކު 40 މޭލަށްވައިގަދަވެ، ކަނޑު ގަދަވާނެކަމަށްވަނީ ލަފާކޮށްފައެވެ. މާދަމާއިން ފެށިގެން ކުރިއަށްއޮތް 5 ދުވަހު ރާއްޖޭގެ ބޮޑުބަޔަކަށް ވިއްސާރަކުރާނެކަމަށް ލަފާކުފެވެއެވެ.
މޫސުމާބެހޭ ޤައުމީ ޢިދާރާއިންވަނީ މިއަދު ހެނދުނު 10:00 އިން މާދަމާ ހެނދުނު 10:00 އަށް ރާއްޖޭގެ އެކިހިސާބަށް ވިއްސާރަކުރުމާއެކު ގުގުރާނެ، އަދި ބައެއް ރަށްތަކަށް ބޯކޮށް ވާރޭވެހޭނެކަމަށް ލަފާކޮށްފައެވެ.
އަދި ދެކުނާއި ހުޅަނގުދެކުނުން ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައި ޖެހޭނެކަމަށާއި، ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައި ގަދަވުން އެކަށީގެންވާކަމަށް މެޓް އޮފީހުން ލާފާކުރޭ.
މީގެ އިތުރުން ރާޅުގެ އުސްމިން ހުންނާނީ 3 ފޫޓާއި 7 ފޫޓާއި ދެމެދުކަމަށާއި، ހުރިހައި ފަރާތްތަކުންވެސް ޙާއްސަކޮށް ކަނޑުދަތުރުކުރައްވާ ފަރާތްތަކުން މޫސުމަށް ސަމާލުވުމަށް މޫސުމާބެހޭ ޤައުމީ ޢިދާރާއިންވަނީ ދަންނަވާފައެވެ.