އެމްއެމްޕީއާރުސީގެ ކޮރަޕްޝަން ބެލުމުގެ ބާރު އެމްޑީޕީ ޕީޖީއަށް ދިނުމަށް އެދި ނަޝީދުގެ ޤަރާރެއް

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ކޮރަޕްޝަން މައްސަލައިގައި ދައުލަތަށް ގެއްލިފައިވާ ފައިސާ ހޯދުމަށް ބޭރުގެ މާހިރެއް އައްޔަންކޮށް، އެމައްސަލަ ބެލުމުގެ ބާރު އެމްޑީޕީ ޕާލިމަންޓްރީ ގްރޫޕަށް ދިނުމަށް އެދި އެޕާޓިގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ޤަރާރެއް އެޕާޓީގެ ޤައުމީ މަޖިލީހަށް ހުށައަޅައިފިއެވެ.

ބޭރުގެ މާހިރެއްގެ އެހީތެރިކަމާއެކު އެމްއެމްޕީއާރްސީގެ މައްސަލަ ބެލުމުގެ ހުރިހާކަމެއް ކުރިއަށް ގެންދަން ޕީޖީ ގުރޫޕަށް ބާރު ދިނުމަށް ގޮވާލާ ރައީސް ނަޝީދު ހުށަހެޅުއްވި ޤަރާރުގައި ވަނީ، އެމްއެމްޕީއާރުސީގެ ޚިޔާނާތުގައި ދައުލަތަށް ގެއްލުނު ފައިސާ ހޯދުމަކީ މި ސަރުކާރުގެ އެންމެ މުހިއްމު އެއް ވައުދުކަށްވާއިރު، އެ ތަހުގީގު ހިންގުމަށްޓަކައި މި ވެރިކަމުގައި އެސެޓް ރިކަވަރީ ކޮމިޝަން އުފައްދައި ފުލުހުންނާއި އޭސީސީއާ ގުޅިގެން ޖޮއިންޓް އިންވެސްޓިގޭޝަނެއް ފަށާފައި ވީނަމަވެސް، އެކަށީގެންވާ ނަތީޖާއެއް ފެނިފައި ނުވާކަމަށެވެ.

އެމްޑީޕީގެ އަސާސީ ޤަވާޢިދުގައިވާ ގޮތުން ޤައުމީ މަޖިލީހުގެ 10 މެންބަރުން ސޮއިކޮށް ބައްދަލުވުމެއް ބާއްވައި ދިނުމަށް ހުށަހަޅައިފިނަމަ ބައްދަލުވުމެއް ބޭއްވޭނެ އެވެ. ރައީސް ނަޝީދު އެދިވަޑައިގެންފައި ވަނީ ޤައުމީ މަޖިލީހުގެ މެންބަރުން އެމަނިކުފާނުގެ ގަރާރު ބަލައިގަނެ، އެދިވަޑައިގެންފައިވާ ގޮތަށް ޕީޖީ ގުރޫޕަށް ބާރު ދިނުމަށް ފާސް ކޮށްދިނުމަށެވެ.

ރައީސް ނަޝީދު ހުށައެޅުއްވި ޤަރާރުގައި ވަނީ 2018ވަނަ އަހަރުގެ އޯގަސްޓްމަހުގެ 26ވަނަ ދުވަހު އެމްޑީޕީގެ ޤައުމީ މަޖިލީހުން ފާސްކުރި ގަރާރެއްގެ ދަށުން ބޭރުގެ ފަންނީ ތަޖުރިބާކާރަކު ހޯދައި އެމްއެމްޕީއާރުސީގެ ޚިޔާނާތާގުޅޭ ފައިސާ ދަތުރުކޮށްފައި ވާގޮތާއި، އެ ފައިސާއާބެހޭ މައުލޫމާތާއި އެނޫންވެސް އެންމެހައި ހޯދުންތައް ސަރުކާރަށް ފޯރުކޮށްދީފައިވާނެކަމަށެވެ. ނަމަވެސް އެ މައުލޫމާތުގެ އަލީގައި ފައިސާ ދައުލަތަށް ހޯދުމުގެ މަސައްކަތް އެކަށީގެންވާގޮތެއްގައި ކުރެވިފައިނުވާކަމަށް ރައީސް ނަޝީދުގެ ގަރާރުގައިވެއެވެ. އެހެންކަމުން އެމްއެމްޕީއާރުސީގެ ކޮރަޕްޝަންގެ ފައިސާ އަނބުރާ ދައުލަތަށް ހޯދުމުގެ މަސައްކަތް ކޮށްދޭނެ ބޭރުގެ ފަންނީ މާހިރަކު ހޯދައި، އެ ފަރާތްތަކާއެކު ކުރަންޖެހޭ މަަސައްކަތްތައް އެމްޑީޕީގެ ޕާލިމަންޓްރީ ގުރޫޕުން ކުރުމަށް ނަޝީދުގެ ޤަރާރުގައި އެދިވަޑައިގެންފައި ވެއެވެ.

އެމްއެމްޕީއާރުސީގެ ކޮރަޕްޝަން މައްސަލ ބެލުމުގެ ބާރު އެޕާޓިގެ ޕާލިމަންޓްރީ ގްރޫޕަށް ދެއްވުން އެދި ރައީސް ނަޝީދު، ގަރާރެއް ހުށައަޅުއްވާފައިވާއިރު، މިދިޔަ މަހުގެ 26ވަނަ ދުވަހު ބޭއްވެވި ޖަލްސާގައި ރައީސް ނަޝީދު ވަނީ އެމްއެމްޕީއާރުސީގެ ކޮރަޕްޝަންގެ މައްސަލަ ކޮމިޓީއަށް ފޮނުވައިގެން މާ އެދެވޭ ނަތީޖާއެއް ފެނިފައިނުވާކަމަށް ވިދާޅުވެފައެވެ. އެހެންކަމުން އެ މައްސަލަ އިތުރަށް ތަހުގީގްކުރުމަށް ޕްރޮސެކިއުޓަރ ޖެނެރަލްގެ އޮފީހަށާއި އެންޓި ކޮރަޕްޝަން ކޮމިޝަނަށާއި، އެސެޓް ރިކަވަރީ ކޮމިޝަނަށާއި ފުލުހުންނަށްވެސް ފޮނުވާފައިވާކަމަށް ނަޝީދު ވިދާޅުވެފައިވެއެވެ.

މަޖިލީހުގެ ރައީސް ވިދާޅުވީ، މި މައްސަލަ ބެލުމަށް މަޖިލީހުން ކުރެވެން ހުރި ހުރިހާ ކަމެއް ކުރައްވާނެކަމަށެވެ. އެގޮތުން މެންބަރަކަށް ވިޔަސް، ވަޒީރަކަށް ވިޔަސް، އެމައްސަލަ ބައްލަވާނެކަމަށްވެސް މަޖިލީހުގެ ރައީސް ވިދާޅުވިއެވެ.

އެމްއެމްޕީއާރުސީގެ ކޮރަޕްޝަން ފައިސާ 267 މީހަކަށް ލިބުނުކަމަށް އެމައްސަލަ ތަޙްޤީޤުކުރާ އިދާރާތަކުން ވަނީ ވިދާޅުވެފައެވެ. ކޮރަޕްޝަންގެ ފައިސާ ލިބިފައިވާ ފަރާތްތަކުގެ ތެރޭގައި 18ވަނަ ރައްޔިތުންގެ މަޖިލީހުގެ 44 މެމްބަރަކާއި، ރައްޔިތުންގެ މަޖިލީހުގެ މިހާރުގެ 16 މެމްބަރަކާއި، މިނިވަން މުވައްސަސާތަކުގައި އިސްކޮށް ތިއްބެވި 5 ބޭފުޅަކުވެސް ހިމެނިވަޑައިގަންނަވާކަމަށްވެސް ތަހުގީގީ އިދާރާތަކުން ހާމަކުރައްވާފައިވެއެވެ. މީގެ އިތުރުން މިހާރު ސަރުކާރުގެ މަގާމުގައިތަކުގައި ތިބި 7 ބޭފުޅަކާއި، 7 ފަނޑިޔާރެއްގެ އިތުރުން ސަލާމަތީ ބާރުތަކުގައި ހިމެނޭ 23 އޮފިސަރަކަށްވެސް ޚިޔާނާތުގެ ފައިސާ ލިބިފައިވާ ކަމަށް ތަޙްޤީގު އިދާރާތަކުން ވިދާޅުވެފައިވެއެވެ.

އެމްއެމްޕީއާރުސީގެ ޚިޔާނާތުގެ ފައިސާތައް ބޭނުނުންކޮށްފައި ވަނީ ސިޔާސީ މަންފާތަކެއް ހޯދުމަށް ކަމަށް އެސެޓް ރިކަވަރީ ކޮމިޝަނުންވަނީ ވިދާޅުވެފައެވެ. މިހާތަނަށް ކުރެވުނު ތަހުޤީޤުތަކުން އެނގޭ ގޮތުގައި އެމްއެމްޕީއާރުސީގެ ޚިޔާނާތް 3.4 ބިލިޔަން ރުފިޔާއަށްވުރެ ބޮޑެވެ.