2022 ވަނަ އަހަރުގެ ފޮމިއުލަރ ވަން ކާރު ރޭސް ސީޒަންގައި ވާދަކުރަން ބޭނުންވާކަމަށް ފޯމިއުލަރ ވަންގެ ދުނިޔޭގެ ޗެމްޕިއަން ލުއިސް ހެމިލްޓަން ހާމަކޮށްފިއެވެ. ހެމިލްޓަން ހާމަކުރިގޮތުގައި މިއަހަރަށް ފަހު ފޯމިއުލަރ ވަންގައި އިތުރު އެއް އަހަރު މަޑު ކުރަން ބޭނުން ކަމަށެވެ.
ފޯމިއުލަރ ވަންގެ ޗެމްޕިއަންކަން ހަތް ފަހަރު ކާމިޔާބުކޮށްފައިވާ ހެމިލްޓަން މަރސިޑީޒް އާއެކު ހަދާފައިވަނީ އެއް އަހަރު ދުވަހުގެ އެއްބަސްވުމެކެވެ. އަދި އެ އެއްބަސްވުމާއެކު މިސީޒަނަށްފަހު ހެމިލްޓަން ފޯމިއުލަރ ވަންއިން ރިޓަޔަރ ކޮށްފާނެކަމަށް ގިނަ ބަޔަކަށް އޮތީ ހީވެފައެވެ. ހެމިލްޓަން ހާމަކުރިގޮތުގައި މިސީޒަންގައި ރެޑް ބުލްގެ މެކްސް ވަރސްޓެޕެން އާއެކު ކުރިއަށްދާ ވާދަވެރިކަމާމެދު ވަރަށް ހިތްހަމަޖެހޭ ކަމަށެވެ. އަދި މިވާދަވެރިކަމުގެ ސަބަބުން މިފަހަރުގެ ރޭސްތައް ފޯރިގަދަ ވުމުގެ ފުރުސަތު އެބައޮތް ކަމަށާއި އަދި އެހެން ކަމުން މިސީޒަންގައި މާބޮޑަށް ދުއްވާހިތުން ދުއްވޭ ކަމަށެވެ.
ހެމިލްޓަން ބުނީ އޭނާގެ ޓީމާމެދު ވަރަށް ހިތްހަމަޖެހޭ ކަމަށާއި އަދި އޭނާއާއި މަރސިޑީޒް ގުޅިގެން މިހާރު އަންނަނީ ފޯމިއުލަރ ވަންގެ ތެރެއިން އެހެން ކަންކަމުގައި މީހުންނަށް އެހީތެރިކަން ފޯރުވައިދީ މީހުން ހޭލުންތެރި ކުރުވުމުގެ މަސައްކަތް ކުރަމުން ކަމަށެވެ. އަދި އެކަންތައްތަކާމެދު ހެމިލްޓަން ހުރީ ވަރަށް ހިތްހަމަޖެހި އަދި އުފަލުން ހުރިކަމުގައި އޭނާ ބުންޏެވެ. މަރސިޑީޒް އާއި ހެމިލްޓަން ގުޅިގެން ފަށާފައިވާ ކަންތައްތަކުގެ ތެރޭގައި ރޭސިޒަމް އާއި ދެ ކޮޅަށް އަޑު އުފުލުމާއި އަދި އެކިކަންކަމުގައި މީހުން ހޭލުންތެރި ކުރުވުން ހިމެނެއެވެ. އަދި ޕޯޗުގީޒް ގްރޯން ޕްރީގެ ކުރިން މަރސިޑީޒްއިން ވަނީ އިނގިރޭސިވިލާތުގައި ދިރިއުޅޭ މައިނޯރިޓީ އެތުނިކް ގްރޫޕްތަކުގެ މީހުންނަށް އިންޖިނިއަރިންގެ ދާއިރާއިން ކެރިއަރއެއް ބިޔާކުރުމުގައި އެހީތެރިވެދިނުމުގެ ގޮތުން އިނގިރޭސިވިލާތުގެ ޖަމިއްޔާއެއް ކަމަށްވާ އެސޯސިއޭޝަން ފޯ ބްލެކް އެންޑް މައިނޯރިޓީ އެތުނިކް އިންޖިނިއަރސްއާއެކު ޕާޓްނަރޝިޕެއް ހަދާފައެވެ. ހެމިލްޓަންއަކީ ނަސްލީ ތަފާތު ކުރުން ތަކާއި ދެކޮޅަށް ވަރަށް ފާޅުގައި އަޑު އުފުލާ ފަރާތެކެވެ.