މަނީ ލޯންޑަރިންގެ ކުށް ސާބިތުވެ 5 އަހަރުގެ ޖަލުހުކުމެއް ތަންފީޒުކުރައްވަމުން ގެންދަވާ ކުރީގެ ރައީސް އަބްދުﷲ ޔާމީން އަބްދުލްޤައްޔޫމް ގޭ ބަންދަށް ބަދަލުކުރުމުން ޔުމްނާ މައުމޫން އެކަމަނާގެ ބައްޕާފުޅު ޖަލުގައި ހޭދަކުރެއްވި ދުވަސްތަކުގެ ހަދާން އައު ކުރައްވައިފިއެވެ.
ޖަލު ހުކުމެއް ތަންފީޒުކުރައްވަމުން ގެންދެވި ކުރީގެ ރައީސް ޔާމިން ރޭގެ ވަގުތެއްގައިވަނީ ވަގުތީ ގޮތުން ގޭ ބަންދަށް ބަދަލުކޮށްފައެވެ. މޯލްޑިވްސް ކަރެކްޝަނަލް ސާވިސަސް އިން ވިދާޅުވީ ރައީސް ޔާމީން ގެޔަށް ބަދަލުކުރެއްވީ ކ މާފުށީގައި މި ދަނޑިވަޅުގައި ހަލުވިކަމާއިއެކު ކޯވިޑް ފެތުރި ޖަލުގެ އޮފިސަރުން ޕޮޒިޓިވްވަމުން ދާތީކަމަށެވެ.
ރައީސް ޔާމީންގެ ގެއަށް ބަދަލުކުރެއްވިކަން ހާމަކޮށް ކަރެކްޝަނުން ކުރި ޓްވީޓް ރީ ޓްވީޓްކުރައްވާ ރައީސް ޔާމީނަށް ބޮޑެބޭބެ ވިދާޅުވާ ހެރިޓޭޖް މިނިސްޓަރ ޔުމްނާ މައުމޫން ވިދާޅުވީ ރޯދަމަހެއްގެ ތެރޭގައި ބައްޕާފުޅު ކުރީގެ ރައީސް މައުމޫން އަބްދުލްޤައްޔޫމް ޖަލު ބަންދުގައި ހުންނަވަނިކޮށް އާލާސްކަންފުޅޫ އުޅުއްވާތީ ގެއަށް ބަދަލުކޮށްދޭން ޢާއިލާގެ ފަރާތުން އެތައް ފަހަރެއްގެ މަތިން އެދެމުން ދިޔަ ހަނދާންތައް އާވެއްޖެކަމަށެވެ.
ރޯދަމަހެއްގެ ތެރޭގައި ރައީސް @maumoonagayoom ޖަލުބަންދުގައި ހުންނަވަނިކޮށް އާލާސްކަންފުޅާ އުޅުއްވާތީވެ ގެއަށް ބަދަލުކޮށްދޭން، ޢާއިލާގެ ފަރާތުން، އެތައް ފަހަރެއްގެ މަތީން އެދެމުން ދިޔަ ހަނދާންތައް އާވޭ. https://t.co/pvJDVwLPvS
— Yumna Maumoon (@yumna_maumoon) April 29, 2021
ރައީސް ޔާމީންގެ ވެރިކަމުގައި އެއްބަފާ ބޭބޭފުޅު ރައީސް މައުމޫން 8 މަސްދުވަސް ވަންދެން ޖަލުގައި ހުންނެވިއެވެ. ޖަލުގައި ހުންނެވި ދުވަސްކޮޅު އެމަނިކުފާނުގެ ހާލު ކޮޅު ގޯސްވެ ގެއަށް ބަދަލުކޮށްދޭން ތަކުރާރުކޮށް އަާއިލާއިން އެދުނު އެދުމަށްވެސް ރައީސް ޔާމިންގެ ސަރުކާރުން ދީފައިވަނީ ބީރު ކަންފަތަކެވެ. ރައީސް މައުމޫންގެ ސިއްހީ މައްސަލަތައް ހުރުމުން ހާލުކޮޅު ގޯސްވެފައިވާކަން ބަޔާންކޮށް އެމަނިކުފާނުގެ އަނބިކަނބަލުން ނަސްރީނާ އިބްރާހިމް އޭރުގެ ޕްރޮސެކިއުޓަރ ޖެނެރަލް އައިޝަތު ބިޝާމާއި އޭރު ކްރިމިނަލް ކޯޓް ހިންގެވުމާ ހަވާލުވެ ހުންނެވި އާދަމް އާރިފްއަށް ވަކިވަކިން ފޮނުއްވި ސިޓީތަކަށްވެސް ޖަވާބު ދެއްވާފައެއްވެސް ނުވެއެވެ.
ރައީސް މައުމޫން ޖަލުގައި ހުންނަވާތާ 40 ދުވަސްފަހު މުއްދަތު ޖެހުމަށްކަމަށް ބުނެ މާލެ ގެނެސް 7 ގަޑިއިރުވަންދެން ކޯޓުގައި ބޭންދިއެވެ. މެންދުރުފަހު 03:30 ގައި ކޯޓަށް ގެނައި ގޮތަށް ގިނިކަންޏާ ގޮނޑިއެއްގައި ބޭންދެވުމަށްފަހު މައްސަލަ ކެންސަލްވިކަން އެންގީ އެެރޭ 11 ޖެހިފަހުންނެވެ.
ކޮއްކޯފުޅު ރައީސް އަބްދުﷲ ޔާމީމންގެ ވެރިކަން ވައްޓާލަން އުޅުއްވިކަމުގެ ތުހުމަތުގައި ހައްޔަރުކޮށް ދޫނިދޫގައި 8 މަސްވަންދެން ހައްޔަރުކޮށްފައި ހުރުމަށްފަހު ރައީސް މައުމޫން މިނިވަންވެޑައިގެންނެވީ އިންތިޙާބު ބޮޑު ތަފާތަކުން ރައީސް ޔާމީން ބަލިވެޑައިގެން ދައުލަތުގައި އޮތް އެމަނިކުފާނުގެ ހުރިހާ ބާރެއް މުޅިން ގެއްލި އައު ސަރުކާރު އިންތިޚާބުވި ހިސާބުންނެވެ.