ޖަލު ހުކުމެއް ތަންފީޒުކުރަމުންދާ ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވަގުތީ ގޮތުން ގޭބަންދަށް ބަދަލުކޮށްފިއެވެ.
މޯލްޑިވްސް ކަރެކްޝަނަލް ސަރވިސްއިން ވިދާޅުވީ، ކުރީގެ ރައީސް ޢަބްދު ﷲ ޔާމީން އަބްދުލްޤައްޔޫމް ވަގުތީ ގޮތުން ގޭބަންދަށް ބަދަލުކުރީ ކ.މާފުށީގައި ހަލުވިކަމާއެކު ކޮވިޑް-19 ފެތުރެމުންދާތީކަމަށެވެ.
ރައީސް ޔާމީން މިރޭ ގޭބަންދަށް ބަދަލުކޮށްފައި މިވަނީ، ރައީސް ޔާމީން ގޭބަންދަށް ބަދަލުކޮށްދެއްވުމަށް އެދި އެމަނިކުފާނުގެ އަނބިކަނބަލުން ފާޠިމަތު އިބްރާހީމް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ސިޓީއެއް ފޮނުއްވާފައިވަނިކޮށެވެ. ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ރައީސުލްޖުމްހޫރިއްޔާ ވިދާޅުވެފައިވަނީ، ރައީސް ޔާމީން ގެއަށް ބަދަލު ކުރުމުގައި ބައްލަވަންޖެހޭ ކަންކަން ބައްލަވާނެކަމަށާއި، ރައީސް ޔާމީނަށް ދެރަގޮތެއް ނުވާނެކަމަށެވެ.
މަނީލޯންޑަރިންގެ ކުށް ސާބިތުވެ، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް 5 އަހަރުގެ ޖަލު ހުކުމެއް އިއްވީ 2019 ވަނަ އަހަރުގެ ނޮވެމްބަރުމަހުގެތެރޭގައެވެ. އަދި މި މައްސަލާގައި 5 މިލިއަން ޑޮލަރުން ޖޫރިމަނާވެސް ކޮށްފައެވެ. ދަށުކޯޓުގެ މި ނިންމުމަށް ހައިކޯޓުންވެސް ވަނީ ތާއިދުކޮށްފައެވެ. އަދި އެކޯޓުގެ ނިންމުން އިސްތިއުނާފުކުރުމަށް ރައީސް ޔާމިންގެ ފަރާތްޕުޅުން ސުޕްރީމްކޯޓަށް ހުށައެޅުމުން އެ ކޯޓުން ވަނީ މައްސަލަ ބަލައިގެންފައެވެ.