މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރުކަމަށް ޝިފްލާ އިބްރާހީމް އައްޔަންކުރުމަށް ރައްޔިތުންގެ މަޖިލީހުން ފާސްކޮށްފިއެވެ.
ބްރޯޑްކާސްޓިންގ ކޮމިޝަނުގެ ހުސްވެފައިވާ މެންބަރުކަމުގެ މަޤާމަށް ޝިފްލާ އައްޔަންކުރަން ފާސްވީ މަޖިލީހުގެ ޖަލްސާގައި ވޯޓުދިން 71 މެންބަރުންގެ ވޯޓުންނެވެ.
ބްރޯޑްކޮމްއަށް ޝިފްލާ އައްޔަންކުރަން މަޖިލީހުން ފާސްކޮށްފައިވާއިރު އޭނާ ހިމެނޭހެން ބްރޯޑްކޮމްގެ ހުސްވެފައިވާ މެންބަރުކަމުގެ މަޤާމަށް އައްޔަންކުރުމަށް ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވި 3 ބޭފުޅުންގެ ތެރެއިން ކޮމިޓީގެ ތިންބައިކުޅަ ދެބައި މެންބަރުންގެ އަޣްލަބިއްޔަތުން ފާސްވީ ޝިފްލާގެ ނަމެވެ.
މީގެ ކުރީންވެސް 2 ފަހަރެއްގެ މަތިން ޝިފްލާގެ ނަން ބްރޯޑްކޮމްގެ މެންބަރުކަމަށް އައްޔަންކުރަން ރައްޔިތުންގެ މަޖިލީހަށްވަނީ ފޮނުވާފައެވެ.
މޯލްޑިވްސް ބްރޯޑްކާސްޓިންގ ކޮމިޝަންގެ މެންބަރުކަމަށް ޢައްޔަންކުރުމަށް މަޖިލީހުން މިއަދު ފާސްކުރި ޝިފްލާ އިބްރާހީމް މާސްޓާސް ޑިގްރީ ޙާޞިލުކުރައްވާފައިވަނީ ޖާރނަލިޒަމް އެންޑް މީޑިއާ ކޮމިއުނިކޭޝަން ދާއިރާއިން ދިވެހި ރާއްޖޭގެ އިސްލާމީ ޔުނިވަރސިޓީންނެވެ. މީގެ އިތުރުން ޝިފްލާވަނީ ޤައުމީ ޔުނިވަރސިޓީން ޖާރނަލިޒަމް ދާއިރާއިން ފުރަތަމަ ޑިގްރީ ޙާޞިލުކުރައްވާފައެވެ.
ޝިފްލާއަކީ ޓީވީއެމްގައި ގިނަ އަހަރުތަކެއްވަންދެން ޕްރެޒެންޓަރެއްގެ އިތުރުން، ނޫސްވެރިއެއްގެ ގޮތުންނާއި، ނިއުސް އެންކަރެއްގެ ގޮތުގައި މަސައްކަތްކޮށްފައިވާ ބޭފުޅެކެވެ. މީގެ އިތުރުން ސަން މީޑިއާގައިވެސް މަސައްކަތްކުރައްވާފައިވާ ޝިފްލާ މިހާރު ހުންނެވީ ސަންގު ޓީވީގެ ޕްރެޒެންޓަރެއްގެ ގޮތުގައެވެ.