ގަރާޖެއްގެ ލިޔުން ނެތި އުޅަނދު ރަޖިސްޓްރީކުރެވޭގޮތަށް ހުށައެޅި އިސްލާހުގެ ބިލު އަނބުރާ ކޮމިޓީއަށް
ގަރާޖެއްގެ ލިޔުން ހުށަނާޅައި އެއްގަމު އުޅަނދު ރަޖިސްޓްރީކުރެވޭގޮތަށް އެއްގަމު ދަތުރުފަތުރުގެ ޤާނޫނަށް އިޞްލާހު ގެނައުމަށް ރައްޔިތުންގެ މަޖިލީހަށް ހުށައެޅި ބިލު އަލުން ދިރާސާކުރުމަށް ކޮމިޓީއަށް ފޮނުވައިފިއެވެ.
ގަރާޖް ސިޓީގެ މި ބިލު އަނބުރާ ކޮމިޓީއަށް ފޮނުވަން ފެންނަކަމަށް ފާސްކުރީ 68 މެންބަރުންގެ ވޯޓުންނެވެ. މިބިލު ފޮނުވާލަން ނުފެންނަ ކަމަށް ވޯޓުދެއްވީ އެންމެ މެންބަރެކެވެ.
މިއަދުގެ ޖަލްސާގައި އެއްގަމު ދަތުރުފަތުރުގެ ޤާނޫނަށް އިޞްލާޙު ގެނައުމުގެ ބިލު ޤައުމީ ތަރައްޤީއާއި ތަރިކައިގެ ކޮމިޓީން ދިރާސާކޮށް ނިންމިގޮތުގެ ރިޕޯޓުގެ ބަހުސް މަރުހަލާގައި ސަރުކާރަށް ނިސްބަތްވާ މެންބަރުންނާއި އިދިކޮޅު މެންބަރުންވެސް ބަނީ މިބިލު އަދި އިތުރަށް ފުރިހަމަކުރަން އަލުން ކޮމިޓީއަށް ފޮނުވަން ފެންނަކަމަށް ވިދާޅުވެފައެވެ.
އަދި ޤާނޫނު އެގޮތަށް އިސްލާހު ކުރުމާ ދެކޮޅަށް މާލެއަށް ނިސްބަތްވާ މަޖިލީހުގައި އެމްޑީޕީ ތަމްސީލުކުރައްވާ އިސް ބައެއް މެންބަރުންވެސްވަނީ މިއަދުގެ ޖަލްސާގައި ވާހަކަފުޅުދައްކަވާފައެވެ. ނަމަވެސް މިހާރު ގެންނަން އުޅޭ ބަދަލު ގެންނަންޖެހޭކމަަށްވެސް އެމްޑީޕީގެ އެހެން މެމްބަރުން ގަބޫލުކުރާކަން ހާމަވާގޮތަށްވަނީ ވާހަކަފުޅުދައްކަވާފައެވެ.
މިހާރު ޤާނޫނު އޮންނަގޮތުން އެއްގަމު އުޅަނދު ރަޖިސްޓްރީކުރުމަށް ހުށަހަޅާނަމަ، އެއުޅަނދެއް ބާއްވާނެ ގަރާޖެއްގެ ލިޔުން ހުށަހަޅަންޖެހެއެވެ. އަދި އެއްގަމު އުޅނަދު ރަޖިސްޓްރީކުރުމުގައި ޢަމަލުކުރާނެ އުސޫލުތައް ކަނޑައެޅުމުގެ ބާރުވެސް މިހާރު ޤާނޫނު އޮންނަގޮތުން ލިބިދީފައިވަނީ ޓްރާންސްޕޯޓް އޮތޯރިޓީއަށެވެ.
އޮޅުވާލައިގެން އެއް ގަރާޖެއްގެ ނަންމަތީ އެތައް ވެހިކަލެއް ރަޖިސްޓްރީކޮށްގެން ދުއްވާ މައްސަލައަކީ މާލޭގައި ވަރަށްބޮޑަށް ދިމާވެފައިވާ މައްސަލައެކެވެ. މިކަން ހައްލުކުރުމަށް ޓްރާސްޕޯޓް މިނިސްޓްރީއާއި ސިޓީ ކައުންސިލުން ގުޅިގެން ދަނީ މަސައްކަތް ކުރަމުންނެވެ. އޮޅުވާލައިގެން އެއް ގަރާޖަކަށް އެތައް އުޅަނދެއް ރަޖިސްޓްރީކުރާ މައްސަލަ ބޮޑުވެ، ހުއްދަ ދިނުމުގެ ކުރިން ޚާއްސަ އިންސްޕެކްޝަނެއް ހަދައި އެގަރާޖެއްގައި ރަޖިސްޓްރީ ކޮށްފައިވާ ވެހިކަލްތައް ބެލުމަށްވެސް ފަހުން ނިންމާފައިވެއެވެ.