އެމެރިކާގެ ފެޑެރަލް ކޮންޓްރެކްޓަރުންނަށް އެމީހުން މަސައްކަތްކުރާ ކޮންމެ ގަޑިއިރަކަށް މަދުވެގެން 15 ޑޮލަރު ދިނުމުގެ އަމުރެއް އެޤައުމުގެ ރައީސް ޖޯ ބައިޑަން ނެރުއްވައިފިއެވެ.
އަންގާރަދުވަހު ނިންމާފައިވާ މިނިންމުމުގެ ސަބަބުން މިހާރުގެ މިނިމަމް ވޭޖަށް 37 އިންސައްތައިގެ ކުރިއެރުމެއް އަންނަ އަހަރުގެ މާރިޗްއާއި ހަމައަށް ލިބޭނެއެވެ. މިއަމުރުގެ ސަބަބުން ހާހުން ގުނާލެވޭ މަސައްކަތު މީހުންނަށް ފުލްޓައިމްކޮށް މަސައްކަތް ކުރާކަށް ދެން ނުޖެހޭނެ ކަމަށާއި މީގެ ސަބަބުން އާއިލާތަކުގެ ދިރިއުޅުމުގެ ފެންވަރު ރަނގަޅުވާނެ ކަމަށް ވައިޓް ހައުސްއިން ބުނެއެވެ.
ސާފުކުރާ މީހުންނާއި މަރާމާތުކުރާމީހުން، އަދި ކާނާ ފޯރުކޮށްދޭ މީހުންނަށްވެސް މި އަމުރުގެ ދަށުން މިނިމަމް ވޭޖް ލިބޭނެއެވެ. އަދި މިކަމުގެ ސަބަބުން ޓެކްސް ދައްކާ މީހުންނަށް ގެއްލުމެއް ނުވާނެކަމަށްވެސް ވައިޓް ހައުސްއިން ވަނީ ބުނެފައެވެ.
2020 ވަނަ އަހަރުގެ ރިޔާސީ އިންތިޚާބު ކާމިޔާބު ކުރައްވާފައިވާ ޖޯ ބައިޑަން ވިދާޅުވީ ވޭޖް އިތުރުކުރުމާއި ޔޫނިއަންތައް ވަރުގަދަވުމުން އެމެރިކާގެ މެދު ފަންތީގެ މީހުންގެ ހާލަތު ރަނގަޅުކުރެވޭނެ ކަމަށެވެ.