އަސާސީ ޕެންޝަން ލިބޭ މީހުން ދައުލަތު ވަޒީފާގައި ދެމިހުންނަ މުއްދަތުގައި ޕެންޝަން ނުލިބޭ ގޮތަށް ތޮއްޑޫ ދާއިރާގެ މެންބަރު ޙަސަން ޝިޔާން ޕެންޝަނާއި ބެހޭ ޤާނޫނަށް ހުށައެޅުއްވި އިޞްލާހު މަޖިލީހުން އަނބުރާ ނަގައިފިއެވެ. އެ އިޞްލާހު އަނބުރާ ނަގާފައިވަނީ އެ ބިލަށް ބަހުސްކޮށް ނިމިފައިވަނިކޮށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މަޖިލީހުގެ ރައީސް މުޙައްމަދު ނަޝީދު ވިދާޅުވީ ޕެންޝަނާއި ބެހޭޤާނޫނަށް ހުށައެޅުއްވި އިޞްލާހުތައް ނަގާފައިވަނީ އެ އިޞްލާހު އިތުރަށް ފުރިހަމަކުރުމަށްކަމަށެވެ.
ޕެންޝަނާއި ބެހޭ ޤާނޫނަށް އިޞްލާހު ހުށަހެޅުމުގެ ބޭނުމަކީ، ދައުލަތުގެ ފައިސާ ޚަރަދުކުރުމުގައި ޒިންމާދާރުގޮތެއްގައި ދައުލަތާއި މުޖުތަމަޢަށް އެންމެ ފައިދާ ހުރިގޮތަކަށް ޚަރަދުކުރުމުގެ އިންތިޒާމް ހަމަޖެއްސުމާއި، ދައުލަތުގެ މުވައްޒަފުން ވަޒީފާއިން ވަކިވުމުން ދައުލަތުން ދޭ ޕެންޝަނާއި އެހެނިހެން ޢިނާޔަތްތައް ދިނުމުގެ ކަންކަން ދައުލަތުގެ ބަޖެޓުން ދެމެހެއްޓެނިވި ގޮތަކަށް ކުރުމަށްޓަކައިކަމަށް ޕެންޝަނާއި ބެހޭ ޤާނޫނަށް ހުށައެޅުއްވި އިޞްލާހުގައި ބުނެފައިވެއެވެ.
އެގޮތުން ދިވެހިރާއްޖޭގެ ޕެންޝަނާބެހޭ ޤާނޫނުގެ ދަށުން ޚިދުމަތުގެ މުއްދަތަށް ބަލައި ދައުލަތުގެ ބަޖެޓުން ޚަރަދުކޮށްގެން ފޯރުކޮށްދޭ އެންމެހައި ދައުލަތުގެ އެހެނިހެން ޕެންޝަންގެ ފައިސާ އިދާރީގޮތުން ފޯރުކޮށްދޭނީ ޕެންޝަން އޮފީހުން ކަމުގައި ހަމަޖައްސައި، އެ ޤާނޫނަށް ޢަމަލުކުރަން ފެށުމުގެ ކުރިން އެހެން ޤާނޫނެއްގެ ދަށުން ދެމުން އައި އެހެނިހެން ޕެންޝަން ހުއްޓާލައި، ދައުލަތުގެ އެހެނިހެން ޕެންޝަން ދިނުމާގުޅޭ އިތުރު އުސޫލުތައް ކަނޑައެޅުމަށްޓަކައި، އެ ޤާނޫނަށް ގެންނަންޖެހޭ އިޞްލާޙުތައް ގެނައުމަކީވެސް މި އިޞްލާހު ހުށައެޅުމުގެ މަޤްޞަދެއްކަމަށް ބުނެފައިވެއެވެ.
ޕެންޝަނާއި ބެހޭ ޤާނޫނަށް ހުށައެޅި އިޞްލާހަށް ބައެއް ފަރާތްތަކން ވަނީ ފާޑުކިޔާފައެވެ.
ޙަސަން ޝިޔާން ހުށައެޅުއްވި މި އިޞްލާހާއެކު ދައުލަތުގެ އެހެނިހެން ޕެންޝަނުގެ ފައިސާ އިދާރީ ގޮތުން ފޯރުކޮށްދޭ ފަރާތެއްގެ ގޮތުގައި ޕެންޝަން އޮފީސް ހަމަޖެހިގެންދާނެކަމަށެވެ. އަދި އެހެނިހެން ޕެންޝަން ފޯރުކޮށްދިނުމަށް ބޭނުންވާ ފައިސާ ފިނޭންސް މިނިސްޓްރީން ޕެންޝަން އޮފީހަށް ފޯރުކޮށްދޭނެ އިންތިޒާމު ހަމަޖެއްސުމަށްވެސް ކަނޑައެޅިގެން ދާނެކަމަށްވެސް ވިދާޅުވިއެވެ.