ފިރިހެނުންގެ ޔޫރޯ މުބާރާތެއްގައި މެޗް އޮފިޝަލްކަން ކުރާ ފުރަތަމަ އަންހެން ރެފްރީއަކަށް ފަރަންސޭސިވިލާތުގެ އަންހެން ރެފްރީއެއް ކަމަށްވާ ސްޓެފެނީ ފްރެޕާޓް ހަމަޖެހިއްޖެއެވެ. މިގޮތުން މިއަހަރަށް ފަސް ކުރެވިފައިވާ ޔޫރޯ 2020 ގައި ފްރެޕާޓް ހަރަކާތްތެރިވާނެކަން މިހާރުވަނީ ހާމަކޮށްފައެވެ.
ފްރެޕާޓް ހޮވާފައިވަނީ ސަޕޯޓް މެޗް އޮފިޝަލެއްގެ ގޮތުގައެވެ. އެހެން ކަމުން މިފަހަރުގެ ޔޫރޯ މުބާރާތުގައި ފްރެޕާޓް ފޯތު އޮފިޝަލެއްގެ ގޮތުގައި ހަރަކާތްތެރިވާނެއެވެ. އުމުރުން 37 އަހަރުގެ ފްރެޕާޓް ވަނީ ފިރިހެނުންގެ ޗެމްޕިއަންސް ލީގު މެޗެއްގައި ރެފްރީކަން ކުރި ފުރަތަމަ އަންހެން ރެފްރީއަކަށް މިދިޔަ ޑިސެމްބަރު މަހު ވެގެން ގޮސްފައެވެ. އަދި މިއަހަރުގެ މާރޗްމަހު ފްރެޕާޓްވަނީ ފިރިހެނުންގެ ވާރލްޑް ކަޕް ކޮލިފައިން މެޗެއްގައިވެސް އެންމެ ފުރަތަމަ ރެފްރީ ކަން ކުރި އަންހެން ރެފްރީއަށްވެސް ވެގެން ގޮސްފައެވެ. 2019 ވަަނަ އަހަރުގެ އަންހެން ވާރލްޑް ކަޕްގައި އެމެރިކާ އާއި ނެދަލަންޑްސް ބައްދަލުކުރި ފައިނަލް މެޗްގައިވެސް ރެފްރީކަން ކުރުމުގެ އިތުރުން އެއަހަރު ލިވަޕޫލާއި ޗެލްސީއާ ދެމެދު ކުޅުނު ސުޕަރ ކަޕްގައިވެސް ރެފްރީކަން ކޮށްފައިވަނީ ފްރެޕާޓްއެވެ. މީގެއިތުރުން ފްރެޕާޓްއަކީ ފަރަންސޭސި ލީގް އާން ގެ މެޗްތަކާއި ޔޫރޮޕާ ލީގުގެ މެޗްތަކުގައިވެސް ރެފްރީކަންކޮށްފައިވާ ތަޖްރިބާކާރު އަންހެން ރެފްރީއެކެވެ.