ނިމިދިޔަ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބުގެ، މާލެ ސިޓީގެ 6 ދާއިރާއެއްގެ ވޯޓު ފޮށީގެ މައްސަލަތަކެއް ވެރިކަން ކުރާ މައި ޕާޓީ، އެމްޑީޕީން އިލެކްޝަން ކޮމިޝަނަށް ހުށަހަޅައިފިއެވެ.
އެމްޑީޕީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޗެއާޕާސަން ހަސަން ލަތީފް ވިދާޅުވީ އިންތިޚާބާއި ގުޅިގެން ފާހަގަވި ގިނަ ޝަކުވާތަކެއް އެޕާޓީއަށް ލިބިފައިވާކަމަށާއި، އޭގެތެރޭގައި މާލޭގެ ބައެއް ދާއިރާތަކާއި އަތޮޅުތެރޭގެ ބައެއް ދާއިރާތަކުގައި ވޯޓުގެ ކަންކަން ކުރިއަށް ގެންގޮސްފައިވާ ގޮތުން ހުރި ޝަކުވާތަކެއް ލިބިފައިވާކަމަށެވެ. ޙަސަން ލަޠީފް ވިދާޅުވީ، މިހާތަނަށް އިލެކްޝަން ކޮމިޝަނަށް މާލޭގެ 6 ދާއިރާއެއްގެ ޝަކުވާ ހުށައަޅާފައިކަމަށާއި، އެމައްސަލަތައް ވީހާވެސް އަވަހަށް ބަލައި އެޕާޓީން ހުށަހެޅި ކަންކަމަށް ރިޔާޢަތްތްކޮށް ދެއްވުމަށް އެދިފައިވާނެކަމަށް ހަސަން ލަޠީފް ވިދާޅުވިއެވެ.
އެމްޑީޕީން އިލެކްޝަންސް ކޮމިޝަނަށް ޝަކުވާ ހުށައެޅި 6 ދާއިރާއަކީ މެދެ ހެންވޭރު ދާއިރާ، ހެންވޭރު ދެކުނު ދާއިރާ، ހެންވޭރު ހުޅަނގު ދާއިރާ، މައްޗަންގޮޅި އުތުރު ދާއިރާ، މާފަން އުތުރު ދާއިރާގެ އިތުރުން މާފަންނު ހުޅަނގު ދާއިރާއާއި ގުޅޭ ޝަކުވާތަކެވެ.
"އަޅުގަނޑުމެންނަށް މިހާތަނަށް ފާހަގަވި ކަންކަމަކީ، އެންމެ މަތީގަ އޮތް ކެނޑިޑޭޓަށް، ލިބިފަ އޮތް ވޯޓާއި އެމްޑީޕީގެ ކެނޑިޑޭޓަށް ލިބިފަ އޮތް ވޯޓާއި އެދެމެދުގަ ހުރި ތަފާތަށްވުރެ، އެފަރަގަށްވުރެ ބާތިލް ވޯޓު އެތައް ގުނައަކުން އިތުރުވެފައި ހުރިތަން އަޅުގަނޑުމެންނަށް އެބަފެނެއޭ. މިސާލަކަށް 40 ވޯޓުގެ ފަރަގު އޮތްނަމަ 70 ވޯޓު ވަރު ބާތިލްގެ ގޮތުގައި ކަނޑައެޅިފައިވޭ." ހަސަން ލަތީފް ވިދާޅުވިއެވެ.
އެމްޑީޕީގެ ޗެއަރޕާސަން ވިދާޅުވީ އެކަންކަން ރަނގަޅަށް ބަލައި އަލުން އެ 6 ފޮށި ހުޅުވައިގެން ވޯޓު ގުނުމަށް އެދިފައިވާނެކަމަށެވެ.
އިންތިޚާބާއި ގުޅިގެން އެމްޑީޕީން ޝަކުވާތަކެއް ހުށަހަޅާފައިވާއިރު، އިންތިހާބުގެ ބައެއް ދާއިރާތަކުގެ ނަތީޖާ ޝީޓުގައި މައްސަލަތަކެއް ހުރެގެން އިލެކްޝަންސް ކޮމިޝަނުންވެސް ދަނީ އެމައްސަލަ ބަލަމުންނެވެ. އެގޮތުން އިންތިޚާބުގެ ނަތީޖާ ޝީޓުތަކާ ގުޅިގެން އިލެކްޝަން ކޮމިޝަނަށް ފާހަގަކުރެވުނު 18 ފޮށްޓެއްގެ ނަތީޖާ ޝީޓު ކަށަވަރުކުރުމުގެ މަސައްކަތްކުރަމުންދާކަމަށް އެކޮމިޝަނުން އެންމެ ފަހުން ބޭއްވި ޕްރެސް ކޮންފަރެންސްގައި ވިދާޅުވިއެވެ.
އިލެކްޝަންސް ކޮމިޝަނުން ވިދާޅުވީ އިންތިޚާބާ ގުޅިގެން މިހާތަނަށް 89 ޝަކުވާ އިލެކްޝަންސް ކޮމިޝަނަށް ހުށަހަޅާފައިވާކަމަށެވެ. އޭގެ ތެރެއިން 21 ޝަކުވާއަކީ ސިޔާސީ ޕާޓީތަކުން ހުށަހަޅާފައިވާ ޝަކުވާތައްކަމަށް އެކޮމިޝަނުން ވިދާޅުވެއެވެ. އަދި ދާއިމީ ނަތީޖާ އިއުލާންކުރުމުގެ ކުރިން މިޝަކުވާތައް ބަލައި ނިންމާނެކަމަށް އިލެކްޝަންސް ކޮމިޝަނުން ވިދާޅުވެއެވެ.