އައްޑޫ ސިޓީގެ ފޭދޫ، މަރަދޫފޭދޫ، އަދި މަރަދޫގެ ނަރުދަމާ ނިޒާމު ޢަމަލީ މަސައްކަތް ނިންމައި، ނިޒާމުގެ ހިންގުން ފެނަކަ ކޯޕަރޭޝަނާ މިއަދު ހަވާލުކޮށްފިއެވެ. މީގެ އިތުރުން އެމްޓީސީސީން އައްޑޫގައި ކުރިއަށްގެންދިޔަ އިތުރު ދެ މަޝްރޫޢުގެ މަސައްކަތުގެ ނިމުންވެސް މިއަދުވަނީ ފާހަގަކޮށްފައެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ އެމްޓީސީސީން މަސައްކަތް ނިންމާފައިވާ 3 މަޝްރޫޢުގެ ތެރޭގައި ހިމެނެނީ ސ.ފޭދޫ، މަރަދޫ ފޭދޫ އަދި މަރަދޫގެ ނަރުދަމާ ނިޒާމުގެ މަސައްކަތާއި، ސ.ފޭދޫ ބޭރު ތޮށިލުމުގެ މަޝްރޫޢުގެ މަސައްކަތުގެ އިތުރުން އެމްޓީސީސީގެ އިޖްތިމާޢީ ޒިންމާގެ ދަށުން ސ.ފޭދޫ ހެދިގޮނޑުދޮށް ޙިމާޔަތްކުރުމުގެ މަސައްކަތެވެ.
މީގެތެރެއިން އެންމެ މުހިންމު މަޝްރޫޢެއްގެ ގޮތުގައި ކުރިއަށް ގެންގޮސްފައިވަނީ 3 ރަށުގެ ނަރުދަމާގެ މަސައްކަތް ނިމުމުގެ މަސައްކަތެވެ. އެމްޓީސީސީން މި މަސައްކަތް ނިންމައި ނަރުދަމާގެ ޚިދުމަތް ދިނުމުގެ މަސައްކަތް ފެނަަކަ ކޯޕަރޭޝަނާ ވަނީ ހަވާލުކޮށްފައެވެ. ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަޙުމަދު ސަޢީދު މުޙައްމަދު ވިދާޅުވީ މިޚިދުމަތް މެދުނުކެނޑި ދެމެހެއްޓެނިވި ގޮތެއްގައި ފޯރުކޮށްދިނުމުގެ ޔަގީންކަން ދެއްވާކަމަށެވެ. ސަޢީދު ވިދާޅުވީ ގޭގެއަށް ނަރުދަމާ ކަނެކްޝަން ގުޅައިދިނުމުގެ މަސައްކަތް ފެށުމަށް، ގޭގެއިން ރެޖިސްޓަރވުމަށް މިހާރު ހުޅުވާލާފައިވާކަމަށެވެ.
"ހަރުދަނާ އަދި އާއްމުންނަށް ދަތި ނުވާނެހެން ދެމެހެއްޓެނިވި ޚިދުމަތެއް ފޯރުކޮށްދޭނަން. ރަޖިސްޓްރީވުމަށް މިހާރު ހުޅުވާލާފައިވާއިރު، ހުރިހާ ބޭފުޅުންވެސް އަވަހަށް ރަޖިސްޓަރވުމަށް އެދެން. އޭރުން ގޭގެއަށް އަވަހަށް ޚިދުމަތް ފޯރުކޮށްދޭނަން." އަޙުމަދު ސަޢީދު މުޙައްމަދު ވިދާޅުވިއެވެ.
އެމްޓީސީސީގެ ސީއީއޯ ޢާދަމް އާޒިމް ވިދާޅުވީ އައްޑޫގެ މިތިން ރަށުގެ ނަރުދަމާ ނިޒާމުގެ މަސައްކަތަކީ އެކި މައްސަލަަތަކާހުރެ ދިގުލައިގެން ގޮސްފައިވާ މަސައްކަތްތަކެއްކަމަށެވެ. ނަމަވެސް މިހާރު މަސައްކަތް މުޅިން ނިމި، 1978ގެއަށް ނަރުދަމާގެ ވިއުގަ އަޅާދީފައިވާކަމަށެވެ. މިއީ 129މިލިއަން ރުފިޔާގެ މަޝްރޫޢެކެވެ.
"އައުޓްފޯލްގެ މަސައްކަތްތައް ކުރިއަށްގެންދިއުމަށް ދިގު މުއްދަތެއް ނެގި. އަޅުގަނޑުމެންގެ ޢަމާޒަކީ އަވަސް އަރުވާލައިގެން މަސައްކަތްތައް ގެންދިއުމުގެ ބަދަލުގައި، އަވަހަށް ދިގުމުއްދަތަށް ދެމިގެންވާގޮތަށް މަސައްކަތްތައް ކުރިއަށްގެންދިއުން." ޢާދަމް އާޒިމް ވިދާޅުވިއެވެ.
ސ.ފޭދޫ ގިރާ ސަރަހައްދު ހިމާޔަތް ކުރުމުގެ މަސައްކަތަކީ އެމްޓީސީސީގެ އިޖްތިމާޢީ ޒިންމާގެ ދަށުން ހިލޭ ސާބަހަށް ކުރިއަށް ގެންދިޔަ މަޝްރޫއެކެވެ. މިމަޝްރޫޢުގެ ދަށުން ފޭދޫ ފަތާ ޓްރެކް ސަރަހައްދުގައި 25 ފޫޓު ދިގު 4 ފޫޓު އުސް ރިވެންޓްމެންޓެއްވަނީ ޖަހާފައެވެ.
އެމްޓީސީސީންވަނީ އައްޑޫގެ މަގުތަކުގައި ފެން ބޮޑުވާ މައްސަލަ ޙައްލުކޮށްދިނުމަށް، ފެން ހިންދާ ދެ ޕަމްޕްވެސް އައްޑޫ ސިޓީ ކައުންސިލާ ހަވާލުކޮށްފައެވެ.