އައްޑޫ ސިޓީ ހިތަދޫ ބަނދަރު ތަރައްޤީކުރުމުގެ ޢަމަލީ މަސައްކަތް ފަށައިފިއެވެ. ހިތަދޫގައި މިހާރު ބޭނުންކުރަމުން އަންނަ ބަނދަރަކީ ޒަމާންތަކެއްވެ ވަރަށް ބޮޑަށް ހަލާކުވެ ވީރާނާވެފައިވާ ބަނދަރެކެވެ.
އައްޑޫ ސިޓީ ހިތަދޫ ބަނދަރު ތަރައްޤީކުރުމުގެ މަޝްރޫޢު ކުރިއަށްގެންދިއުމަށް ޙަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އާއެވެ. މިމަޝްރޫޢުގައި ހިމެނެނީ ހިތަދޫގައި މިހާރު ބޭނުންކުރަމުން އަންނަ ބަނދަރު އަލުން މަރާމާރުކޮށް ހެދުމުގެ މަސައްކަތެކެވެ. އެގޮތުން ބަނދަރުގެ 284މީޓަރުގެ ސަރަޙައްދު އަލުން ޒަމާނީ ފެންވަރަށް ތަރައްޤީކުރުމަށްވަނީ ހަމަޖެހިފައެވެ.
މަޝްރޫޢުގެ މަސައްކަތް ފެށުމަށް އައްޑޫ ސިޓީ ހިތަދޫގައިވަނީ ޚާއްސަ ރަސްމިއްޔާތެއް ބާއްވާފައެވެ. މިރަސްމިއްޔާތުގައި އެމްޓީސީސީގެ ސީއީއޯ އާދަމް އާޒިމާއި އައްޑޫ ސިޓީގެ މޭޔަރ ޢަބްދުﷲ ޞާދިޤާއި ރައްޔިތުންގެ މަޖިލީހުގެ އެސިޓީއަށް ނިސްބަތްވާ މެންބަރުންގެ އިތުރަށް ރަށުގެ ރައްޔިތުންވަނީ ބައިވެރިވެފައެވެ.
މި ރަސްމިއްޔާތުގައި ވާހަކަދައްކަވަމުން އައްޑޫގެ މޭޔަރު ޢަބްދުﷲ ޞާދިޤު ވިދާޅުވީ މިބަނދަރަކީ ބޭރުތޮށި ލައިގެން ހަދާފައިވާ ބަނދަރަކަށް ނުވާތީ އޮޑިފަހަރު އަޅާފައި ބޭއްވުމުގައިވެސް ބޮޑެތި ދަތިތަށް އެބަހުރިކަމަށެވެ. އަދި ޒަމާންތަކެއް ވެގެންދިޔައިރު މިހާތަނަށްވެސް ރަށުގެ ރައްޔިތުންނަށް އެކަށީގެން ބަނދަރެއް ލިބިފައި ނުވާކަން އޭނާ ފާހަގަކުރެއްވިއެވެ. ޞާދިޢު ވިދާޅުވީ ބަނދަރާއެކު މަސް ދޯނިފަހަރަށާއި އައިސް ބަލައި އަންނަ ދޯނިފަހަރަށް އަދި އުޅަނދުތަކަށްވެސް ރައްކާތެރިކަން ކަށަވަރުވެގެންދާނެކަމަށް އޭނާ ވިދާޅުވިއެވެ.
"ވަރަށް އަގުބޮޑެތި އުޅަނދުފަހަރު މި ގެންގުޅެނީ. އެކަމަކު ގަދަވާ ދުވަސްވަރު ހޭލައި ތިބެން މިޖެނީ އުޅަނދުތައް ބަލަހައްޓަށް. ބޮޑެތި ގެއްލުމާވެސް ކުރިމަތިވޭ. އާ ބަނދަރާއެކު މުދާ ގެންނަންވެސް ފަސޭހަވާނެ." މޭޔަރު ވިދާޅުވިއެވެ.
އެމްޓީސީސީގެ ސީއީއޯ އާދަމް އާޒިމް ވިދާޅުވީ އައްޑޫ ހިތަދޫ ބަނދަރުގެ މަސައްކަތް ކަނޑައަޅާފައިވާ މުއްދަތުގެ ކުރިން ނިންމަވާނެކަމަށެވެ. ޒަމާންތަކެއްވަންދެން އަޅާނުލައި ދޫކޮށްލާފައި އޮތް، ހިތަދޫ ބަނދަރު އަލުން ތަރައްޤީކޮށް ނިމޭއިރު ވެގެންދާނީ ޒަމާނީ، ބޭނުންކުރަން ފަސޭހަ ބަނދަރަކަށްކަމަށް އޭނާ ވިދާޅުވިއެވެ.
"3ހަފްތާ ތެރޭ ބަނދަރުގެ ކީ ވޯލްގެ މަސައްކަތް ފަށާނަން. ރިވެޓްމަންޓްޖަހާ ބަނދަރު ދިއްލާލާފައި އޮންނާނީ. މިއީ ރާއްޖޭގައި ހަދާ އެންމެބޮޑު ބަނދަރުތަކުގެ ތެރެއިން ބަނދަރަކަށްވާނެ." އާދަމް އާޒިމް ވިދާޅުވިއެވެ.
މި ރަސްމިއްޔާތުގައި ރައްޔިތުންގެ މަޖިލީހުގެ އައްޑޫ ސިޓީއަށް ނިސްބަތްވާ އެކި ދާއިރާތަކުގެ މެންބަރުންވަނީ ބައިވެރިވެވަޑައިގެންފައެވެ. މެންބަރުން ފާހަގަކުރިގޮތުގައި މި މަޝްރޫޢުއަކީ މުޅި އަތޮޅަށްވެސް މުހިންމު މަޝްރޫޢުއެކެވެ. ޚާއްސަކޮށް އައްޑޫ ސިޓީ ވިޔަފާރީގެ ހަބަކަށް ވެގެން އަންނައިރު، މިއީ ކުރެވޭ މުހިންމު މަސައްކަތްތަކެއްކަން މެމްބަރުން ފާހަގަކުރެއްވިއެވެ.
ހިތަދޫ ބަނދަރު ތަރައްޤިކުރުމުގެ މަސައްކަތުގެ އެއްބަސްވުމުގައި ސޮއިކުރައްވާފައިވަނީ 1 އޭޕްރިލްގައެވެ. މިމަސައްކަތުގެދަށުން ބަނދަރު ފުންކުރުމާއި 800 މީޓަރުގެ ސަރަޙައްދުގައި ބޭރު ތޮށި ލުމާއި 1420އަކަމީޓަރުގެ ސަރަޙައްދެއްގައި ޕޭމަންޓް ހެދުމުގެ މަސައްކަތް ހިމެނެއެވެ.
މި ޕްރޮޖެކްޓަކީ 52.43މިލިއަން ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢުއެކެވެ. މި މަސައްކަތް ނިންމުމަށް ހަވާލުކޮށްފައިވަނީ އެއް އަހަރުގެ މުއްދަތުންނެވެ.